Einn fyrir svefninn

Einu sinni vann ég tímabundið með mjög hressri og skemmtilegri konu sem sagði mér eftirfarandi sögu:

Pabbi hennar var áfengiseftirlitsmaður og gekk m.a. á milli vínveitingahúsa um helgar til að athuga hvort verið væri að afgreiða fólk yngra en 20 ára, eitthvað svoleiðis. Mamma konunnar vann sem fangavörður í Reykjavík og stóri bróðir vann á Litla Hrauni.

Eitt sinn stóð pabbinn í langri biðröð í fiskbúð og rétt fyrir framan hann var gamall kunningi hans, eldri maður sem var farinn að missa heyrn. Sá gamli heilsaði kumpánlega og spurði svo hátt yfir fulla fiskbúðina:

„ÞÚ ERT ALLTAF Í BRENNIVÍNINU, ER ÞAÐ EKKI?“
„Jú, það er rétt,“ svaraði pabbinn, enda vann hann við áfengiseftirlit!
„OG KONAN ALLTAF Í TUGTHÚSINU?“ hélt sá heyrnardaufi glaðlega áfram.
„Ha, jú, jú,“ samsinnti okkar maður.
„OG STRÁKURINN ÞINN KOMINN Á HRAUNIÐ, EÞAGGI?“ æpti sá gamli að síðustu og fékk lágvært jáyrði við því. Fólkið í búðinni var orðið svo hneykslað á svipinn að okkar maður dreif sig út og keypti bara bjúgu í kvöldmatinn.  

Athugasemdir

[Guðríður Hrefna Haraldsdóttir, 11.2.2007 kl. 00:15]

... já, eða: „Ertu hætt að berja manninn þinn á laugardagskvöldum?“ Já, sumar spurningar eru erfiðari en aðrar, múahahhahaha!

[Guðný Anna Arnþórsdóttir, 11.2.2007 kl. 01:48]

Það er eins og venjulega með samhengi heilafruma og brosvöðva í andliti hjá þinni bloggvinkoun við sjóinn hinum megin við flóann! Yndilegt. Eigðu góða drauma í nótt.

[Guðný Anna Arnþórsdóttir, 11.2.2007 kl. 05:18]

Nei, alveg er það með ólíkindum!

[www.zordis.com, 11.2.2007 kl. 08:43]

Spurning hvort hún hafi verið glasabarn??? 

[Ólafur fannberg, 11.2.2007 kl. 09:37]

hahahahaha góð

[Hildigunnur Rúnarsdóttir, 11.2.2007 kl. 09:49]

híhíhí

[Pálína Erna Ásgeirsdóttir, 11.2.2007 kl. 10:41]

Varla held ég að karlinum hafi líkað bjúgun

[Guðríður Hrefna Haraldsdóttir, 11.2.2007 kl. 12:42]

Bjúgun voru fín, held ég, alla vega á þessum tíma!

Anna, við Eva erum SVO skyldar ... hún er dóttir hennar Míu systur sem mynd er af hér neðar á síðunni. Og einu sinni var ég svo sæt að fólki fannst miklu líklegra að ég gæti átt Evu en sjálfan erfðaprinsinn ... en stundum lendir maður í því að ala upp míní-útgáfu af fyrrverandi eiginmanni ... en greind erfist gegnum móður þannig að það er í lagi .... 

[Svava frá Strandbergi , 11.2.2007 kl. 19:30]

Hahahahaha