Játningar úr himnaríki plús smá bold

Einhver vírus eða eitthvað virðist vera að ganga á Netinu ... virðulegasta fólk er klukkað, sumt jafnvel fjórum sinnum, og verður að opna hjarta sitt fyrir bloggvinum sem halda virkilega að þeir viti ekki allt ... Reyndi að taka saman eitthvað sem er kannski ekki endilega á allra vitorði ... án þess þó að afhjúpa öll fjölskylduleyndarmálin. Er búin að klukka Dodda og Þröst Unnar. Kann ekkert rosalega vel á svona leiki.  

Átta virkilega háalvarlegar og opinskáar játningar:

1)  Kann ekki að nota matarlím.

2)  Þoli sjaldnast tónleikaútgáfur af lögum.

3)  Hef ekki farið í sund í 20 ár, fyrir utan smásvaml í sundlaug í Hrútafirði á síðustu öld. Heitir pottar eru heldur ekki á vinsældalistanum.

4)  Finnst lax, silungur og slíkt ferlega vondur matur, nema reyktur.

5)  Leigði mér Bodyguard (Whitney Houston) á spólu eitt árið.

6)  Líður langbest í 10-15°C og forsælu ... sól er stórlega ofmetin til baða.

7)  Nagaði neglurnar í 40 ár. Er nýhætt af því að fólk hætti að skipta sér af því.

8)  Þoli ekki nísku, þá meina ég ekki sparsemi eða varkárni í fjármálum.

ANNAÐ:

Ástumálin: Ásta kíkti í stutta heimsókn í kvöld. Fæ sjaldan kvöldgesti á virkum dögum, eins gott að hún þarf að vakna klukkan sex eins og ég, annars værum við enn að spjalla! Spiluðum nokkur Metallica-lög á youtube.com og rifjuðum upp skemmtilega tónleika í Egilshöll. Afrekaði líka að ryksuga himnaríki í dag!

Boldið: Stefanía ÆTLAR að eyðileggja hjónaband Bridgetar og Nicks en fyrrum maður hennar, Eric, sem er líka pabbi Bridgetar, hótaði henni öllu illu ef hún blaðraði frá leyndarmálinu, eða því að Nick og Brooke, mamma Bridgetar, ætla að fórna sér og ást sinni fyrir hamingju Bridgetar. Þetta og samdráttur Jackie, mömmu Nicks, og Erics, pabba Bridgetar og fyrrum eiginmanns Stefaníu, hefur verið það helsta undanfarið. Lofa að fara að fylgjast betur með! Já, og Jackie ætlar ekki að leyfa Stebbu að skemma hjónabandið af því að hún Á þetta barnabarn og Stebba fær ekki að skipta sér af því. Svona ömmuslagur er alltaf spennandi!

Athugasemdir

[Jóna Á. Gísladóttir, 11.7.2007 kl. 22:14]

Ég verð fertug á næsta ári. Þá ætla ég að hætta að naga neglurnar.

[Ragnheiður , 11.7.2007 kl. 22:27]

Ætlaði að setja *skammastsínkall* en kallarnir virka ekki í bili

[Guðríður Haraldsdóttir, 11.7.2007 kl. 22:37]

... fyrir hvað, kæra hross? Að spila Metallicu ... hata lax og silung ... vera hætt að naga neglurnar?

[Magnús Geir Guðmundsson, 11.7.2007 kl. 23:04]

Sæl Gurrí góð!

Skemmtilegar játningar og ekkert svaðalegar haha! En veit ekkert um þennan játningaleik svosem.

En þú þolir tónleikaútgáfur hjá Metallica greinilega, þær allavega undantekningin sem sannar regluna!

Þessir tónleikar héðan eru til í músíkútgáfu, hefur þú heyrt?

[Guðríður Haraldsdóttir, 11.7.2007 kl. 23:08]

Ja, þetta voru nú myndbönd með þeim, ekki af tónleikum. Svo var Rick Wakeman, gamla útgáfan af Arthur, að vísu frá tónleikum en líktist skrambi mikið laginu af plötunni. Þegar ég hlustaði á miklu nýrri tónleikaútgáfu var lagið gjörsamlega ónýtt! En svona er þetta bara. 

[Jenný Anna Baldursdóttir, 11.7.2007 kl. 23:14]

Aldrei hefði ég trúað að þú lægir á þvílíkum leyndarmálum.   Nr. 4 og 7 er það eina sem ég hefði ekki sjálf getað skrifað.  Ertu viss um að pabbi þinn heiti ekki Baldur?  Er mamma þín mamma þín eða jafnvel amma.  Er mamma mín ekki mamma mín.  Systir hjálpaðu mér upp mér finnst ég vera að drukkna.

Love u.

[Guðríður Haraldsdóttir, 11.7.2007 kl. 23:19]

Númer 5 er eiginlega mesta játningin þar sem ég er formaður Whitney Houston-hatarafélagsins. Held að liður 4, hatur á laxi og slíkum óbjóði, sé vegna fjölda beina sem leynist í þessu ... æ, bragðið er heldur ekkert gott. Tókst að sporðrenna hálfu flaki af litlum silungi í hádeginu í dag með helling af salati ... en það var bara gert til að viðhalda gáfunum.

[Hrönn Sigurðardóttir, 11.7.2007 kl. 23:22]

Þetta er sundlaugin í minni sveit

[Guðríður Haraldsdóttir, 11.7.2007 kl. 23:27]

Ég valdi sko flottustu sundlaugina á gúgglinu ... gaman að hún sé yðar, frú Hrönn!

[Nanna Rögnvaldardóttir, 11.7.2007 kl. 23:32]

Þú kannt bara víst að nota matarlím. Ég minni á hvíta súkkulaðibúðinginn.

Þú hefðir bara átt að halda áfram fyrst þú varst einu sinni byrjuð, þá værirðu núna matarlímssnillingur.

[Guðríður Haraldsdóttir, 11.7.2007 kl. 23:38]

Hmm, Nanna ... hún Laufey vinkona var hjá mér og sá eiginlega um þetta allt. Hélt ég því virkilega leyndu fyrir þér?  Hugsa að ég hefði getað búðingin ein og óstudd daginn eftir. Nú fer ég bara að prófa mig áfram. Hvíti súkkulaðibúðingurinn er allt of góður til að búa hann bara til á tíu ára fresti ... 

[Guðríður Haraldsdóttir, 11.7.2007 kl. 23:51]

Anna, stríðnispúki! Það kemur fyrir að ég óttast að fólk trúi því sem þú segir hérna í kommentakerfinu. Ég hef stundum grátbeðið þig að fá þér eins og einn fullkominn kaffibolla áður en þú leggur í hann aftur heim í Árbæinn en þú ert of snobbuð fyrir kaffið mitt! Svo bíð ég ekkert eftir neinum draumaprinsi ... hef alltaf sagt að vinkonur mínar hafi náð í síðustu góðu mennina. Held það ...

[Ólafur fannberg, 11.7.2007 kl. 23:54]

leit við til að klukka þig gamla mín um 8 atriði um sjálfa þig Svo klukkaðu bara aðra 8 um það sama

[Edda Agnarsdóttir, 12.7.2007 kl. 01:46]

Skemmtilegt þetta klukk eftir allt saman og ekki er síður  skemmtilegt framhald af bold and the...

[Inga Dagný Eydal, 12.7.2007 kl. 01:48]

Er sjálf undir sömu sökina seld hvað varðar matarlímið......fletti glaðbeitt fram hjá öllum uppskriftum sem innihalda matarlím, ekkert búðingastand á mínu heimili! Finnst miklu miklu verra að þú skulir hafa leigt The Bodyguard....og borgað með alvöru peningum fyrir? Þetta er alvarlegt athæfi og þú mjög hugrökk að játa

[Guðríður Haraldsdóttir, 12.7.2007 kl. 07:52]

Gott að fleiri kunna ekki á matarlím ... sneiði einmitt vandlega fram hjá öllu sem inniheldur það ... Já, þetta er skemmtilegt klukk ... líður stórum betur að hafa létt þessu með Bodyguard af sál minni ... argggg