Tæknimenn, kossar og fordómafull baðbók

Fíni, flotti nýi tónlistarskólinn stóð undir öllum væntingum ... húsnæðislega séð. Enginn matur var þó á boðstólum, eins og ég hlakkaði svo til, bara konfekt og kleinur með kaffinu. Reyndar Nóakonfekt og rosagóðar kleinur en þetta varð til þess að ég keypti lambahrygg í matinn í kvöld. Ætlaði að láta nægja að vera með eitthvað létt. Svona er að fara svöng út í búð. 

Tryggvi, tæknimaður af Aðalstöðinni og víðar, var í tónlistarskólanum, enda sá hann um að tengja stórkostlegt hljóðkerfið á staðnum. Ég spurði hann hvort hann væri enn með cart-spólurnar mínar með tveimur Babe Ruth-lögum (Private Number og Dutchess of Orleans), lögunum sem hann ætlaði að skella á CD fyrir mig á síðustu öld. Hann hélt það nú. Magnús Geir, eitt hirðskálda himnaríkis og Akureyringur, bjargaði mér með seinna lagið fyrir nokkrum mánuðum og hver veit nema elsku Tryggvi minn bjargi mér um hitt.
Hvað er þetta annars með mig, tæknimenn og kossa? Auðvitað kyssti ég Tryggva, enda frábær drengur sem gaman var að hitta (og kyssa). Tveir kossar, tveir tæknimenn, tveir dagar á milli. Mér líður eins og líf mitt sé að breytast í eina allsherjar orgíu.

Gríp stundum með mér létta reyfara, helst um óða baðherbergismorðingja, til að lesa í baði. Þetta heldur mér kúl og viðbúinni því óvænta í lífinu. Baðfélagi minn fyrr í dag heitir Leiftursýn. Bókin er skrifuð eftir bíómyndinni Blink sem gerði það trúlega sæmilegt í bíóhúsum á þessum tíma, enda blóðug spennumynd.  

14. kafli
John Hallstrom hafði ekki sofið mikið undanfarna tvo sólarhringa. Hann hafði haft með að gera mál þar sem negri var myrtur inni á bar, annað þar sem ekið hafði verið á gangandi mann og hann látist. Loks hafði samkynhneigður maður í afbrýðikasti myrt kærasta sinn. Aðkoman hafði verið dæmigerð fyrir slík mál, mikið blóð og hinn látni með á annað hundrað hnífsstungur.

Bókin er frá árinu 1994! Ég sá ekkert athugavert við hana þegar ég las hana á sínum tíma en mikið hefur margt breyst til hins betra og virðing fyrir fólki almennt aukist. Held að orðið negri sé að mestu dottið út úr íslensku máli og engum dettur í hug að setja homma í samhengi við tryllt ástríðumorð með ótal hnífsstungum. (fliss) Nú verðum við að spýta í lófana til að geta hlegið síðar að staðalímyndakjaftæðinu sem enn var svo mikið í gangi þarna einu sinni árið 2007.

Athugasemdir

[Guðríður Haraldsdóttir, 6.10.2007 kl. 19:08]

Ójá, tek undir það með símaskrána. Mikil persónusköpun í gangi og heill hellingur af áhugaverðum persónum þar. Hef tvisvar reynt að taka hana með í bað en með hrikalegum afleiðingum.

[Ragnheiður , 6.10.2007 kl. 19:40]

Mæli ekki með þessari bók við svo vafasamar aðstæður, í fullu baðkari. Af þessu skapast stórhætta enda vont að fá hláturskast í baði.

[Guðríður Haraldsdóttir, 6.10.2007 kl. 19:42]

Ahhhh, seggggðu! Hláturskast í baðkeri er ekki skemmtileg upplifun.

[Jenný Anna Baldursdóttir, 6.10.2007 kl. 19:43]

Ég mæli ekki með þessari færslu við vafasamar aðstæður í baði (t.d.).  Þú ert svo launfyndinn að ég er stundum á leiðinni út af síðunni, þegar ég kveiki á undirliggjandi kvikindishúmornum og flippa út.  Arg.."Tveir kossar, tveir tæknimenn, tveir dagar á milli. Mér líður eins og líf mitt sé að breytast í eina allsherjar orgíu." Þarf ég að segja meir?

[Ásdís Sigurðardóttir, 6.10.2007 kl. 21:10]

2 x 2  sex ekki satt  þú ert alveg drep kona  hahahaha   haltu áfram þessu stuði

[krossgata, 6.10.2007 kl. 22:08]

Ég verð að játa að ég hef aldrei séð neitt að orðinu negri og skil alls ekki moldviðrið í kringum það.  Erum við ekki bara að færa neikvæðar tilfinningar til enska orðsins nigger yfir á það?  Ég er alfarið á móti því að vera að apa svona alltaf allt eftir enskumælandi þjóðum.

En ég er ekki á móti reyfurum í baði. 

[Guðríður Haraldsdóttir, 6.10.2007 kl. 22:15]

Þetta orð var notað af íslenskum kynþáttahöturum og fékk neikvæðan stimpil. Kannski nær það aftur inn, eins og orðin hommi og arabi gerðu. Einu sinni voru þau orð notuð sem uppnefni en þykja alls ekki neikvæð í dag ... held ég. 

[Halldór Sigurðsson, 6.10.2007 kl. 22:41]

Frábært- en ekki nota rafmagnstæki í baði - ipod og þess háttar

[Marta B Helgadóttir, 7.10.2007 kl. 00:16]

Skemmtileg færsla hjá þér

...segi eins og Halldór, ekki rafmagn í baðið

[Magnús Geir Guðmundsson, 7.10.2007 kl. 00:45]

Það þyrfti nú að kenna hinni húsvisku Ásdísi að reikna, 2 x2 eru 4!

En Gurrí mín, verð alltaf jafn hrærður og upp með mér, e þegar þú minnist á garminn mig! En ættir nú ekki einu sinni að hugsa um þetta smotterí með lagið, hvað þá að nefna það hérna!

Tja, rafmagn eða eitthvað rafhlöðuknúið í baði? ERu ´menn búnir að gleyma glæsta atriðinu í "Bittu mig, elskaðu mig" þar sem Victoria Abriel "bregður á leik" í baðkarinu!?