Drjúg eru morgunverkin ...

Mikið var gott að vakna svona snemma á laugardegi, eða hálftíu ... og snúa sér ekki á hina hliðina. Flýta sér að búa til latte og drekka áður en sofaútdjöfullinn fær mig til að skríða upp í aftur. Setti Jónas í gang fljótlega og held að hann sé orðinn eitthvað áttavilltur, hann hamaðist við að ryksuga ganginn og lét varla sjá sig inni í eldhúsi og stofu. Á meðan erfðaprinsinn svaf þrælaði litli bróðir. Þarf að tékka á áttavillunni. Vissulega er gott að hafa ganginn svona tryllingslega hreinan.

Datt ofan í nýja unglingabók eftir Jónínu Leósdóttur í gærkvöldi, hélt áfram með hana morgun og gat ekki hætt fyrr en hún var búin. Ansi hreint skemmtileg. Ekki dugði það á lestrarþorstann, heldur er ég nú þegar komin á blaðsíðu 157 í bókinni Drápin - Tannöd-morðin. Á bóndabænum Tannöd í S-Þýskalandi fundust lík allra heimilismanna og af verksummerkjum að dæma höfðu þau öll verið myrt á hrottalegan hátt ... segir á bókarkápu. Þetta er bók sem hlaut Þýsku glæpasagnaverðlaunin í ár, nokkuð kúl að fá hana þýdda svona fljótt. Hún er bara ansi góð og ég ætla að klára hana á eftir og fara svo í lokin á Harry Potter.

Annars er ég í einhverju hallærislegu tiltektarstuði og langar að gera allt himnaríki hreint og fínt þegar Jónas er búinn að safna nægri orku eftir lætin á ganginum. Mögulega er hann að mótmæla einhverju (kommon, hvor sonanna fæddist á undan?). Spurning hvort ekki séu til sérstakir ryksuguróbótasálfræðingar ... en kannski þarf bara að hreinsa skynjarana með eyrnapinna. Stundum geta einföldustu lausnirnar verið bestar.  

Athugasemdir

[Marta B Helgadóttir, 13.10.2007 kl. 13:19]

Skemmtileg skrif hjá þér að vanda. Góða helgi.

[Þröstur Unnar, 13.10.2007 kl. 14:03]

Þetta gæti verið skemmtileg bók, en er ekkert hættulegt að hýsa svona glæpasögur í Himnaríki, eða eruð þið öll vernduð þarna? Ég mundi fylgjast vel með Jónasi, og hentu svo bara bókinni fram af svölunum þegar þú ert búin með hana, ég skal gríp ´ana. Svona sögur geta haft hin ýmsu áhrif á fjöldskyldur.

[Guðrún Jóhannesdóttir, 13.10.2007 kl. 14:16]

Þröstur, það er gott að eiga góða granna.  Gurrí láttu samt þrifaandann ekki bera þig alveg ofurliði, góða helgi gelz