Hetjan Inga og viska Hallgríms ...

Vitlaust veður við himnaríki kl. 16.30, ætlaði varla að komast út úr bílnum hennar Ingu, hvað þá þennan stutta spotta upp að dyrum. Reyndi að dekra hana á ýmsan hátt til að koma inn (kjúklingur í kvöldmat, leggja sig í leisígörl) og bíða af sér það versta en hún vildi halda í bæinn. Hetjan. Þannig að hún situr ein að björgunarsveitarmönnunum, dúllan, krúttið. Buxurnar mínar urðu gegnblautar þegar ég hljóp inn í Rekstrarvörur og sótti Sigþóru. Hún fékk að hætta aðeins fyrr til að ná heim.
Hviðumælirinn í Mosó sagði 26 m/sek á Kjalarnesi en engin viðvörun var vegna Hafnarfjalls. Í útvarpinu heyrðum við að hviðurnar þar færu upp í 40 m/sek. Mælirinn hefur kannski fokið.

Í göngunum endursagði ég það sem Hallgrímur læknir talaði um í morgunþættinum á Rás 2 undir átta í morgun. Aldrei hef ég heyrt að maður ætti ekki að tannbursta sig með flúortannkremi ... það dregur víst úr virkni joðs, skjaldkirtillinn starfar því ekki rétt ... bla, bla ... og maður brennir hitaeiningum. Hann talaði líka um nauðsyn þess að borða ávexti á morgnana, helst á 40-60 mínútna fresti fram að hádegisverði. Þá fær maður sér ekki kartöflur með fiskinum eða kjötinu, heldur grænmeti. Ég hlýddi því í hádeginu og borðaði ítalskar kjötbollur með salati. Síðan á ekkert að borða eftir c.a. 5, 6 á kvöldin. Rangt mataræði sljóvgar og býður heim sjúkdómum og orkuleysi, sagði hann.

Hallgrímur læknir er eini læknirinn sem hefur vottorð frá landlækni um að hann sé heill á geði, það kom líka fram í þættinum. Fyrir 15 árum sagði hann að sykur væri fíkniefni, þá var hlegið að honum. Fáir hlæja núna, allra síst ég þar sem ég berst við djöfullegar freistingar á leiðinni upp Súkkulaðibrekkuna á morgnana.

Elskan hann Bjartur fer heim á morgun. Hans verður sárt saknað (ekki af Kubb sem hvæsir á hann ef hann kemur nálægt). Hann er svo góður. Myndin að ofan er af honum, ekki Tomma. Þeir eru svo líkir. Svaka gaman fyrir Míu og Sigþór að hafa farið á West Ham leik þar sem hetjurnar sigruðu, 3:1. Hlakka til að heyra ferðasöguna.  

Athugasemdir

[Ragnheiður , 22.10.2007 kl. 17:05]

Úff ég var alveg viss um að þú kæmist ekki heim í dag, meiri lætin í þessu veðri !

[Jenný Anna Baldursdóttir, 22.10.2007 kl. 17:53]

Ég held að þessi sami Hallgrímur sé sá hinn sami og þvær sér ekki með sápu eða sjampói.  Mér finnst það forvitnilegt - úr fjarlægð

Annars er flott að borða ekki eftir kl. 19,00 en næringarfræðingur sem ég hef aðgang að segir að það sé nauðsynlegt að fá sér aukabita um kl. 21,00.  Og habbðu það sykurgrísinn minn og megadúllurass

Knús í rokið, það hriktir í öllu hjá mér og ég er mjög hamsingjuöm eins og Jenný Una myndi segja.

[Glúmur Gylfason (IP-tala skráð) 22.10.2007 kl. 19:26]

Ekkert eftir kl. 17 ! Eins gott að þingið samþykkt ekki tillögu Vilhjálms Egilssonar um að flýta klukkunni um tvo tíma til samræmis við evrópu!

[Ásdís Sigurðardóttir, 22.10.2007 kl. 21:08]

Vá, ég hafði þvílíkar áhyggjur af þér, eins gott að þetta slapp til í rokinu. Ég mætti umræddum Hallgrími á göngum einhvers sjúkrahúss um daginn, hann var hreinleikinn uppmálaður og flottur kall.  Ég t.d. þvæ mér um hárið (ok læt þvo það) einu sinni í viku og er aldrei með feitt eða ljótt hár. Það er hægt að venja hárið af stöðgum hárþvotti.  Knús til þín og kisulóranna.

[Glúmur Gylfason (IP-tala skráð) 22.10.2007 kl. 21:19]

Ég þarf aldrei að þvo hárið.

[Steingrímur Helgason, 22.10.2007 kl. 21:45]

Jújú, til viðbótar þessu veðurvæli þínu þá hringdi háöldruð móðurómynd mín líka í einkaerfðaprinsinn sinn, (moi), & sagði sitt veður ekki slétt né fellt.  Ég benti henni á að ég væri líka að horfa á Stormí Monday á Baugsstöðinnií sjónvarpinu & þekkt væri að allt vont veður færi norður & niður með tímanum.

Enda rignir núna þvílíkt að ég hefði líklega átt að bera á pallinn aftur í sumar.

Að öðru, það er alþekkt að allt sem að var einu sinni hollt & gott fyrir mann, hættir að vera hollt þegar manni fer að finnast það gott & hollt samkvæmt stúdíu einhverra sem að lærðu af þeim sem að settu fram fyrri kennínguna.

Merkilegt.

S.

[Jensen (IP-tala skráð) 22.10.2007 kl. 22:35]

Talandi um veður og veðurvæl:

ÉG VIL BÍTA OG BERJA FAST

BRJÓTA ALLT OG MÖLVA

ÞETTA SKÍTA KULDAKAST 

KOM MÉR TIL AÐ BÖLVA.............hver orti fyrsti stafur byrjar á K, 

[Lesandi (IP-tala skráð) 22.10.2007 kl. 23:53]

Hver orti, tilraun til svars:

Senn mun lægja særok hér,
segir veðurspáin,
en vísan Jensen, virðist mér,
vera eftir Káinn.

[krossgata, 23.10.2007 kl. 10:32]

Það er mörg átspekin.  Mér skilst, samkvæmt þætti í sjónvarpinu í gær, að hrikaleg vatnsdrykkja sem átti að vera svo góð fyrir húðina sé goðsögn.

[Jensen (IP-tala skráð) 23.10.2007 kl. 14:08]

Rétt er það,vísan er eftir Káinn.Þessi vísa hjá þér er bara SNILLD,kveðja til þín Snillingur´(No,9.)