Aldrei of illa farið með góðan dýrling ...

DýrlingurinnÉg hef alltaf verið svolítið veik fyrir sögum af dýrlingum. Einu sinni sendi Nanna vinkona mér hlekk á kaþólska vefsíðu þar sem mátti finna ALLT um dýrlinga. Á þessum tíma vann ég á Útvarpi Sögu, sem á þeim tíma var í eigu Fíns miðils og þar var bara leikin íslensk tónlist. Ég hóf hvern þátt á því að fjalla aðeins um verndardýrling dagsins. Allir eiga sér nefnilega verndardýrling, þjóðir, starfsstéttir og meira að segja piparsveinar sem eiga sér heila átján verndardýrlinga. Brúðir eiga fjórtán, slátrarar sjö, leigubílstjórar fjóra en strætóbílstjórar aðeins einn ... svo dæmi séu tekin.

Margir dýrlingar þurftu að ganga í gegnum hroðalegar pyntingar og voru líflátnir fyrir trú sína en aðrir komust í helgra manna tölu vegna mannkosta sinna, góðverka og trúrækni svo fátt eitt sé nefnt. Ýmis kraftaverk hafa átt sér stað á helgum stöðum, t.d. við grafir dýrlinganna og nokkur slík gerðust í Skálholtskirkju við gröf Þorláks helga, verndardýrlings Íslands. Veikt fólk fékk bót meina sinna þar sem það stóð við gröf hans en Þorlákur helgi lést þann 23. desember og hefur sá dagur verið kenndur við hann síðan á 12. öld og kallast Þorláksmessa.

Saint ColumbaDagur heilags Lawrence er 10. ágúst. Hann lét lífið vegna trúar sinnar eins og svo margir dýrlingar. Hann var bundinn við tein og steiktur yfir eldi en lét sem ekkert væri. Hann sagði við ofsækjendur sína: „Þið getið snúið mér við núna, ég er orðinn gegnsteiktur á annarri hliðinni.“

Þeir sem eru t.d. að drepast undan tannhvassri tengdamömmu eða tengdapabba geta heitið á eftirtalda dýrlinga til að ástandið batni: Adelaide, Elísabetu af Ungverjalandi, Elísabetu Ann Seton, Godelieve, Helenu af Skofde, Jeanne de Chantal, Jeanne Marie de Mille, Ludmilu, Marguerite d´Youville, Michelinu og Pulcheriu.

Hægt er að heita á sex verndardýrlinga ef maður týnir hlutum. Þeir eru: Anne, Antoníus af Padua, Antoníus af Pavoni, Arnold, Phanurius og Vincent de Paul. Kaþólsk vinkona mín segir að það bregðist sjaldan, hluturinn kemur fljótlega í leitirnar.

Þrír verndardýrlingar vernda fólk sem þjáist af gallsteinum: Benedict, Drogo og Florentius af Strassburg.

stvalentineicon333Valentínusardagurinn, dagur elskenda, er kenndur við heilagan Valentínus. Engum ætti því að koma á óvart að finna Valentínus á þessum lista. Færri vita kannski um Dwynwen og Rafael, erkiengilinn sjálfan, sem eru einnig verndardýrlingar elskenda og ástarinnar.

Verndardýrlingar sem hægt er að ákalla gegn jarðskjálftum eru fjórir; Agatha, Emidius, Francis Borgia og Gregory Thaumatugus.

Heilög Apollonía er verndardýrlingur tannlækna. Hún var pyntuð af hópi Egypta sem drógu úr henni allar tennurnar, eina af annarri, því hún neitaði að skipta um trú.

Marteinn frá Tours er verndardýrlingur Frakklands, bindindismanna, drykkjumanna, betlara, fanga, vefara, klæðskera, hanska- og hattagerðarmanna, smala, klæðskera, fátæklinga, betlara, holdsveikisjúklinga, þeirra sem fá útbrot á líkamann og höggormsbit, skeifnasmiða, ferðamanna, hestamanna og riddara, hermanna, vopnasmiða, húsdýra, hesta og gæsa.

Heilagur Kristófer í húðflúriEligius er verndardýrlingur járnsmiða, leigubílstjóra, klukkugerðarmanna, gullsmiða, hesta, bensínafgreiðslumanna, veikra hesta, dýralækna, handverksmanna, skeifnasmiða, landbúnaðarverkamanna, logsuðumanna, myntsláttumanna,  námuverkamanna, úrsmiða, söðlasmiða og myntsafnara.

Kristófer (einnig kallaður Kitts eða Offero) er verndardýrlingur bogaskyttna, bílstjóra, piparsveina, strætisvagnabílstjóra, leigubílstjóra og annarra sem vinna við að flytja fólk, ávaxtakaupmanna, vörubílstjóra, sjóliða, burðarkarla, tannpínusjúklinga, heilags dauða, skyndilegs dauða og þeirra sem vinna við að flytja fólk.

Zita er verndardýrlingur gegn því að týna lyklum, ráðsmanna, ráðskvenna, vinnuhjúa, þerna, fórnarlamba nauðgana, þjóna og þjónustustúlkna, týndra lykla og fólks sem er gert grín að vegna trúar sinnar. Gæti verið að sumir Moggabloggarar tauti nafnið Zita fyrir munni sér stundum.

Patrik er verndardýrlingur þeirra sem óttast snáka og Fiard passar okkur sem erum hrædd við geitunga.

Varð bara að deila þessu með ykkur þótt ég sé ekki kaþólsk.


« Síðasta færsla | Næsta færsla »

Athugasemdir

1 Smámynd: Ásdís Sigurðardóttir

Fín færsla mín kæra, en kallast þeir ekki dýrðlingar, er ekki viss spyr bara.

Ásdís Sigurðardóttir, 5.4.2008 kl. 01:02

2 Smámynd: Guðríður Haraldsdóttir

Held að hvort tveggja sé í lagi, sé reyndar sjaldan dýrðlingur með ð-i nú orðið!

Guðríður Haraldsdóttir, 5.4.2008 kl. 01:05

3 Smámynd: Lilja Guðrún Þorvaldsdóttir

Þarf maður ekki lengur að skrifa "dýrðlingur" þeim til "dýrðar" ?  Marteinn verndardýrlingur til verndar Marteini skógarmús í Dýrunum í Hálsaskógi. Er það þá dýrlingur þeim til dýra(verndunar)?

Lilja Guðrún Þorvaldsdóttir, 5.4.2008 kl. 01:14

4 Smámynd: Ragnheiður

 Þú hefðir nú mátt koma með þennan gallsteinadýrling fyrr. Ég löngu búin að leggjast undir hnífinn og er nú stórgölluð kona.

Flott samantekt.

Ragnheiður , 5.4.2008 kl. 01:27

5 Smámynd: Guðríður Haraldsdóttir

Greinilega ekki. Man eftir rifrildi í matsalnum í Sjúkrahúsi Akraness milli nokkurra sem vildu endilega hafa ð í dýrlegur. Þetta endaði með því að hringt var í íslenskufræðing sem sagði BÆÐI! Ég sagði mömmu að ég ætlaði sko alltaf (ég var 8 ára) að skrifa þetta með ð-i en sveik það. Ég prófaði að gúggla eftir komment Ásdísar, setti það inn sem DÝRLINGAR og fékk milljón útkomur eða svo ...

Guðríður Haraldsdóttir, 5.4.2008 kl. 01:27

6 Smámynd: Guðríður Haraldsdóttir

Sorrí Ragga ... en ef þú færð höfuðverk eða keyrir leigubíl þá er þarna hellingur sko ...

Guðríður Haraldsdóttir, 5.4.2008 kl. 01:28

7 Smámynd: Svanhildur Karlsdóttir

 Hér verður Zita ákallaður heitt, því stjúpdóttir mín  sem býr hjá okkur, týndi bíllyklunum sínum í gær hér innanhúss,búið að snúa öllu við án árangus

Svanhildur Karlsdóttir, 5.4.2008 kl. 10:36

8 Smámynd: Jenný Anna Baldursdóttir

Gæti ég fengið enn Martein og einn Eligius hjá þér.  Áttu einhvern við sykursýki?

Jenný Anna Baldursdóttir, 5.4.2008 kl. 10:50

9 Smámynd: Inga Dagný Eydal

Kíkti af forvitni í orðbók háskólans því að ég hef alltaf viljað skrifa að eitthvað sé "dýrðlegt" en verið gagnrýnd fyrir það. Hvort tveggja er rétt, eins með dýrðlinga og dýrlinga. Sniðug færsla annars. Svo er það dýrðlingur matreiðslumanna....man ekki nafnið en hann dó píslarvættisdauða....var grillaður lifandi. Hvursu írónískt er það??

Inga Dagný Eydal, 5.4.2008 kl. 11:22

10 Smámynd: Inga Dagný Eydal

Jú auðvitað var það Lawrence

Inga Dagný Eydal, 5.4.2008 kl. 11:24

11 Smámynd: Svanhildur Karlsdóttir

Bíllyklarnir fundust í buxnavasa, takk fyrir Zita......og Guðmundur takk fyrir ráðlegginguna

Svanhildur Karlsdóttir, 5.4.2008 kl. 12:39

Bæta við athugasemd

Ekki er lengur hægt að skrifa athugasemdir við færsluna, þar sem tímamörk á athugasemdir eru liðin.

Um bloggið

Sögur úr himnaríki

Höfundur

Guðríður Haraldsdóttir
Guðríður Haraldsdóttir

... ekki bara kattakerling

Heimsóknir

Flettingar

  • Í dag (28.3.): 13
  • Sl. sólarhring: 24
  • Sl. viku: 418
  • Frá upphafi: 1445645

Annað

  • Innlit í dag: 13
  • Innlit sl. viku: 365
  • Gestir í dag: 12
  • IP-tölur í dag: 12

Uppfært á 3 mín. fresti.
Skýringar

Bloggvinir

Mars 2024
S M Þ M F F L
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31            

Nýjustu myndir

  • Himnaríki 6. mars 2023
  • Himnaríki 21. mars 2024
  • Húsó

Innskráning

Ath. Vinsamlegast kveikið á Javascript til að hefja innskráningu.

Hafðu samband