Með leigumorðingja á hælunum og dularfullt kattarhvarf

Nóttin var fáránlega annasöm. Gerður hafði verið út leigumorðingi til að drepa okkur erfðaprins og vorum við á flótta undan honum í alla nótt. Við þurftum á allri okkar kænsku og ráðsnilld að halda því þetta var ansi klár morðingi, asískur að uppruna. Við flúðum og földum okkur um allt Akranes og var t.d. María í Skrúðgarðinum okkur afar hjálpleg, líka Nína í samnefndri tískubúð (þar sem Dorrit kaupir stundum fatnað). Þetta er sko ekki í fyrsta sinn sem þessi leigumorðingi eltist við okkur en við höfðum alltaf haft betur. Ekki veit ég hver gerði hann út, kannski einhver bloggóvina minna ....

Vaknaði upp af martröðinni kl. 6 í morgun og þorði ekki að sofna aftur ... sem náttúrlega mistókst.

Þetta hlaut að vera fyrir einhverju ... og jú, þriðji ísbjörninn ... (hehhehe, djók), Bjartur var týndur!!! Gestakötturinn í himnaríki var horfinn sporlaust. Hann sem var að leika sér áhyggjulaus í nótt þegar ég las græðgislega Tré Janissaranna, æsispennandi bók sem gerist í Istanbúl árið 1836. Við erfðaprins leituðum um allt, kölluðum, mjálmuðum og hvaðeina, sérstaklega í þvottahúsinu þar sem Bjartur hefur helgað sér svæði (ekki þó með því að spræna þar). Þegar erfðaprinsinn var búinn að leita af sér allan grun umhverfis himnaríki og kominn alla leið í Hjarðarholtið þar sem heimili Bjarts er og kallaði þar fyrir utan datt mér í hug að leita bak við þurrkarann í himnaríki. Þar lá Bjartur í makindum og sagði bara mjá þegar hann sá mig. Þvílíkur léttir.

Erfðaprinsinn var búinn að gera leitaráætlun og átti að beita öllum tiltækum ráðum, það er jú þyrlupallur við hliðina á himnaríki. Ég sá mág minn fyrir mér með brostið hjarta og mitt var byrjað að bresta yfir öllum þessum hryllingi. Það er mikil ábyrgð að passa kött.

Svo tók skynsemin völdin. Bjartur hafði ekkert leitað upp í opna glugga, virtist frekar lofthræddur hérna uppi á 4. hæð og líka ólíklegt að hann hefði sloppið við beinbrot ef hann hefði hoppað út um glugga.

Þetta dýrlega dekurdýr hefur bara ekki nennt að svara „frænku“ þegar hún kallaði örvæntingarfullt á hann. Nú étur hann kattamat í gríð og erg og erfðaprinsinn er að klappa honum í ræmur. Hann var búinn að aflýsa Einarsbúðarferð því að Bjartur gekk fyrir öllu. Allt er gott sem endar vel, nema ég vaknaði áður en við erfðaprins réðum niðurlögum leigumorðingjans. Held ég þrái samt ekkert þennan draum einu sinni enn. Kannski ég lesi bara krúttlega kjéddlíngabók í kvöld.

Athugasemdir

[Jenný Anna Baldursdóttir, 23.6.2008 kl. 14:49]

Hahahaha, þið tvö.  OMG!

[Edda Agnarsdóttir, 23.6.2008 kl. 16:46]

Gurrý hvað finnst þér um fallandi gengi krónunnar?

[Guðríður Haraldsdóttir, 23.6.2008 kl. 16:49]

Ætli martröðin hafi ekki óbeint verið vegna þess ... Edda mín.

[Helga Magnúsdóttir, 23.6.2008 kl. 19:09]

Klappið þið svo bara kattarafmáninni og fóðrið hana eftir að hún lék svona á ykkur?

[Guðný Anna Arnþórsdóttir, 23.6.2008 kl. 21:03]

Því er ekki að neita, að lífið í Himnaríki gerist sífellt æsilegra .... ... tæpast er svona gaman í hinu Himnaríkinu, hvað heldur þú?

[Anna Ólafsdóttir Björnsson, 23.6.2008 kl. 22:25]

Haltu áfram að lesa glæpasögur en ekki láta þær svipta þig svefngleði.

[Guðríður Haraldsdóttir, 23.6.2008 kl. 23:51]

Held að himnaríkið mitt sé skemmtilegra, Guðný, hlýtur að vera. Heheheh

Já, við vorum svo þakklát fyrir að finna hann, Helga, ekki hægt annað! 

Jamm, ætla samt í eitthvað væmið fyrir svefninn núna, svona til öryggis!

[Númi (IP-tala skráð) 24.6.2008 kl. 00:05]

Martröðin sem þú fékkst hlýtur að koma frá Chuck Norris,,eee nei hann er ekki asískur,skrifa þetta bara á Chuck.

[Inga Lára (IP-tala skráð) 24.6.2008 kl. 12:32]

Elsku Gurrí mín.

Nafnspjald fyrir Gurrí með einföldu í-i bíður eftir þér á skrifstofunni. Á því ertu titluð sumarbúðafrænka. Ekki slæmt það.

Hlakka til að sjá þig eftir eina og hálfa viku :)

Kossar,
umsjónarmaðurinn Inga Lára

[Guðríður Haraldsdóttir, 24.6.2008 kl. 16:18]

Vá, hvað ég hlakka til að koma í sumarbúðirnar og fá svona alvörunafnspjald. Takk fyrir þetta, elsku Inga Lára.

Númi, ætli Chuck Norris beri ekki hreinlega alla ábyrgð á þessu. Hann er svo máttugur!

[Lilja Kjerúlf, 25.6.2008 kl. 10:22]

hahaha snilld

[Ásdís Sigurðardóttir, 25.6.2008 kl. 11:53]

Love U girl, kemur mér alltaf til að brosa. Ég á svona geðveikar nætur stundum, hef þá tækni að sofna aftur og klára góða drauma ef ég vakna á vitlausum stað.  Kveðja á ykkur öll tví og fer fætt.