Af sápuóperum og spennubók

Í gær lullaði Stöð 2 á allan daginn og án þess að ég væri fyrir framan tækið tók ég eftir því að spænska var mjög áberandi fyrrihluta dags. Ákvað að kanna málið á Netinu og sá að komnar eru á dagskrá tvær sápuóperur í stað einnar þar sem töluð er spænska (eða portúgalska, þekki ekki muninn). Eftir boldið, sem er góðkunn ammrísk sápa, hófst þátturinn Ljóta Lety, fyrirmyndin að Ljótu Betty, eða La Fea Más Bella. Síðan eftir hádegisfréttir og áströlsku sápuna Nágranna tók við Forboðin fegurð, ný suðuramerísk smásápa í 114 þáttum og voru sýndir 3. og 4. þáttur í gær alveg til kl. 14.30. Þar er fjallað um þrjár hálfsystur sem alla tíð hafa liðið mjög fyrir fegurð sína ... Svo kom blessað boldið aftur í endursýningu og Nágrannar í kjölfarið. Segið svo að sápuóperur séu ekki vinsælar, bara í gær voru sex sýningar.

Mikið hlakka ég til að setjast í helgan stein ... sem verður pottþétt í leisígörl fyrir framan Stöð 2. Get fylgst með fallega fólkinu og lífi þess og lært framandi tungumál í leiðinni. Stundum horfi ég á Nágranna og skil áströlsku núorðið mjög vel.

Sjónvarpsdagskráin var síðan hundleiðinleg í gærkvöldi, skárst á RÚV, og ég byrjaði að lesa nýja bók eftir Lizu Marklund, Lífstíð. Annika Bengtzon blaðakona er aðalpersónan í henni og kannar morð á lögreglumanni. Þessi bók byrjar þar sem Arfur Nóbels endaði en þar slapp hún naumlega út úr brennandi húsi með börn sín tvö ... Bækur Lizu Marlund eru allar frábærar og þessi lofar mjög góðu. Ætla að klára hana á eftir og hlakka mikið til.

Í morgun hefur lífið við Langasandinn verið eins og í myndinni The Birds, mávager og önnur krútt sveima í stórum flokkum fyrir framan og hafa kettirnir verið á gluggaveiðum í allan morgun. Sitja ógurlega spenntir og stara. Erfðaprinsinn kom til mín áðan og sagði sannfærandi: „Það er allt annað að sjá þig!“ Ég leit í spegil og sá að andlitið var eldrautt og enn bólgið og ferkantað (hamstursfés). Ég kýs samt miklu frekar svona krúttlega lygi en ískaldan sannleikann.

Athugasemdir

[Guðrún Jóhannesdóttir, 12.7.2008 kl. 11:25]

var að ljúka við þessa bók, LÍFSTÍÐ og ég er viss um að  þú hefur ekki lagt hana frá þér ég hef reyndar ekki lesið neina aðra bók eftir þennan höfund, en ætla mér sannarlega að ná í fleiri en þessa einu.

Góðan bata stelpa og krúttleg lýgi en auðvitað það allra allra nauðsynlegasta stundum, þar er ég þér hjartanlega sammála.

[Guðríður Haraldsdóttir, 12.7.2008 kl. 11:47]

Endilega náðu þér í þessar bækur Lizu, þær eru allar frábærar!!! Uppheimar, útgáfufyrirtækið, er hérna á Skaganum og stutt að skokka út á Vesturgötu og ná þér í ... eða í bókasafnið.

[Ásdís Sigurðardóttir, 12.7.2008 kl. 13:48]

Liza er frábær höfundur, hef skemmt mér vel við lestur bóka hennar. Letikveðja á Skagann 

[Guðríður Haraldsdóttir, 12.7.2008 kl. 14:54]

Ohhhh, letikveðja á móti, elskan, sit í leisígörl og er rétt að ljúka við Lizu ...

[Ásta Kristín Norrman, 12.7.2008 kl. 16:49]

Þar sem þið eruð að lesa Lisu Marklund, verð ég að mæla með 2 alveg sérstaklega góðum, sem hún hefur skrifað í samráði við konuna sem bækurnar fjalla um, sem sagt sannsögulegar. þær heita á sænsku, Gömda og Asyl. Ekki hægt að leggja frá sér, en munið að byrgja ykkur upp af pappírsþurrkum. þær fjalla um konu sem þurfti að fara í felur útaf fyrrverandi manninum sínum.

[Guðríður Haraldsdóttir, 12.7.2008 kl. 16:58]

Ó, Ásta, ég hef sko lesið þær!!! Man að önnur, sú seinni, heitir Friðland í íslenskri þýðingu, hin fyrri líklega Hulduslóð. Þær eru frábærar!

[Lilja Guðrún Þorvaldsdóttir, 12.7.2008 kl. 20:51]

Vonandi ertu skárri af ofnæminu. - Hef ekki lesið þennan höfund ætla á morgunn að athuga hvort ég næ í bækur eftir hana. - Batakveðjur til þín á Skagann.

[Jenný Anna Baldursdóttir, 12.7.2008 kl. 20:52]

Ég var að lesa Lífstíð líka og er stórhrifin.  Tek fram að ég er svona almennt ekki hrifin af krimmum en þessi var frábær.

[Aprílrós, 12.7.2008 kl. 21:19]

Góðan bata ;)

Kveðja Guðrún Ing

[auður (IP-tala skráð) 12.7.2008 kl. 23:41]

hvenær ferðu í sumarbúðirnar? Að hitta ormana mína! Rosalega gaman að geta séð myndir á hverju kvöldi og lesa blogg dagsins. Þetta er bara frábært starf sem fram fer þarna, ég sé framá að fá heim 2 ansi sjálfsörugga krakka!;) knús auður

[Jóna Kolbrún Garðarsdóttir, 13.7.2008 kl. 02:43]

Forboðin fegurð kláraðist fyrir nokkrum mánuðum.  Þessi suður-Ameríska sápa sem var á dagskránni í gær heitir Á vængjum ástarinnar.  Og voru sýndir tveir síðustu þættirnir í þeirri sápu.  Í næstu viku á fimmtudaginn kemur verða sennilega fyrstu tveir þættirnir af Ljótu Letí sýndir, og næstu tveir á föstudaginn.    Ein sápuóð

[Guðríður Haraldsdóttir, 13.7.2008 kl. 11:40]

Takk fyrir þetta, Jóna Kolbrún. Þeir á Stöð 2 verða greinilega að fara að uppfæra dagskrársíðuna sína. Ég trúði öllu sem þar var að finna.

Auður, ég væri þar núna ef ég væri ekki lasin ... argggg! Og takk, Guðrún, Jenný og Lilja Guðrún (L.G. þetta er ekki ofnæmi, heldur 2 stigs bruni)