Löng bið og svo kom rútan ... (pínkuponsu bold líka)

Við Inga vorum orðnar ansi framlágar í nótt að ganga þrjú þegar rútan ók loksins upp að húsinu. Afar þreytt fjölskylda kom út úr rútunni og gekk í fylgd okkar inn á nýja heimilið. Þreytan var svo mikil að ég laumaði bara niðurskorna álegginu inn í ísskáp aftur, engin hafði lyst á neinu. Vona að heita súkkulaðið hafi enn verið volgt í brúsanum í morgun fyrir börnin. Við sýndum okkar konu það helsta og buðum svo góða nótt. Sem betur fer talar hún einhverja ensku. Hún er virkilega geðþekk og minnir mig bara á dugnaðarlega, íslenska móður sem hefur góða stjórn á börnum sínum sem voru svo þæg ... og sæt! Strákarnir eru 11 og 9 ára og mjög líkir í útliti, við héldum lengst af í aðdragandanum að sá yngri væri 5 ára og ætti 6 ára afmæli í dag en hann á 9 ára afmæli í dag.

 

Mikið vona ég að þau öll fái góðar móttökur á Íslandi, þau hafa nógu lengi verið óæskilegar persónur í Írak og eru ekki velkomin til yfirfullra nágrannalandanna, hvað þá heim til Palestínu. Við munum hitta flóttakonurnar okkar í dag og þar verða líka staddir túlkar. Þótt við höfum getað átt tjáskipti í nótt þá er frábært að geta komið ýmsum hlutum á hreint. Í dag verður t.d. lokið við að tengja gamla sjónvarpið, sem kom um 11 leytið í gærkvöldi og þvottavélina. Það vantar vissulega milljón hluti, eins og t.d. körfu undir óhreina þvottinn, en þetta verður bara svona og ég átti t.d. ekki slíka körfu þegar ég fór að búa. Af augnaráði „okkar konu“ í nótt sýndist mér að henni fyndist allt gjörsamlega fullkomið og meira en það.

Kristinn, sem er að gera heimildamynd um komu flóttakvennanna, hjálpaði okkur Ingu við að loka gatinu á eldhúsinréttingunni þar sem uppþvottavélin var hjá fyrri íbúa, við negldum hreinlega efnisstranga fyrir og eldhúsið gjörbreyttist.

Ásta fór á fundinn vegna Sementsverksmiðjunnar í gær og var mjög ánægð með hann. Get spurt hana betur út úr næsta mánudagsmorgunn þegar sumarfríinu lýkur.

Margt dramatískt hefur gengið á í boldinu undanfarið. Stefanía er í vondum málum þótt hún hafi ekki hrint Jackie, mömmu Nicks, niður stigann en systir Brooke sýndist hún hafa séð hana gera það. Jackie og Steffí hatast og þetta var glæsilegt tækifæri fyrir Jackie að hefna sín. Með hjálp Nicks, sem syrgir brottför Brooke úr hjónabandinu í fangið á Ridge (enn einu sinni), kúgar hún Forrester-tískufyrirtækið út úr fjölskyldunni. Stefanía tryllist þegar hún kemst að því og gleymir að vera þakklát fyrir að fjölskyldan vildi bjarga henni úr fangelsi með þessu. Brooke sefur loks hjá Ridge og þakkar honum fyrir að hafa stöðugt reynt við hana á meðan hún var gift Nick, fyrrum tengdasyni sínum. Dóttir Brooke, hún Bridget, viðurkennir í hjarta sínu að hún elski enn Nick, fyrrum mann sinn og núna síðast stjúpföður. Þau eiga örugglega eftir að ná saman ... en líklega ekki fyrr en hann er búinn að vera með Taylor, fyrri konu Ridge og mömmu tvíburanna og Tómasar, og eignast með henni barn sem reynist fyrir mistök dr. Bridgetar vera úr eggi Brooke ... ef kristalskúlan (Netið) mín lýgur ekki.

Sigur Nicks, eða að ná Forrester-fyrirtækinu, er ekki jafnsætur og hann vonaði því að Brooke, sem var að yfirgefa hann, vill ekki taka þátt í svona hefnd og selur honum eigin hlutabréf í fyrirtækinu. Bara sjokk.

Flóttafólkið brosti við heimkomuna

Athugasemdir

[Hólmdís Hjartardóttir, 9.9.2008 kl. 10:45]

vonandi gengur allt vel hjá þessu blessaða fólki

[Sigrún Jónsdóttir, 9.9.2008 kl. 10:45]

Takk fyrir bloggvináttu.  Það verður gaman að fylgjast með þessu góða verkefni á síðunni hjá þér.

[Ía Jóhannsdóttir, 9.9.2008 kl. 10:57]

Langaði til að senda ykkur öllum kveðju sem standið að þessu góðverki á Skaganum.  Þarft og gott starf sem þarna er unnið og gangi ykkur vel með framhaldið.  Takk fyrir mig og bestu kveðjur héðan frá Tékklandi.

[Guðríður Haraldsdóttir, 9.9.2008 kl. 11:06]

[Ágúst H Bjarnason, 9.9.2008 kl. 11:25]

Þið megið svo sannarlega vera stolt á Akranesi.  Það er ánægjulegt að fylgjast með þessu góða verkefni. Ég þykist vita að framtíð þessa fólks verður björt og að þau muni una sér vel hér á landi. 

Gangi ykkur öllum vel!

[Helga Magnúsdóttir, 9.9.2008 kl. 11:36]

Rosalega varstu krúttleg í sjónvarpinu í gær. Það skein svoleiðis af þér góðmennskan, greiðviknin og gjafmildin að það varð bara bjart í stofunni á meðan þú varst á skjánum. Það er sko óþarfi að hafa áhyggjur af þessu fólki á meðan það er með engla eins og þig á bak við sig.

[Haraldur Bjarnason, 9.9.2008 kl. 11:54]

Þetta er frábært hjá ykkur Gurrí eins og Skagamanna er von og vísa.

[Guðríður Haraldsdóttir, 9.9.2008 kl. 11:55]

Kræst, Helga ... ... af hverju sagðir þú ekki falleg ... grönn ....???

Ágúst, ég er rosalega ánægð með Skagamenn. Sá sem keyrir innanbæjarstrætó er t.d. búinn að flagga á strætó og ekur um allt eins og það væri 17. júní, þessi elska.

[Markús frá Djúpalæk, 9.9.2008 kl. 12:23]

Þú varst mjög falleg og grönn í símaviðtalinu á Útvarpi Sögu í morgun

[Þröstur Unnar, 9.9.2008 kl. 12:33]

Þið eruð snillar.

Þú bjallar bara ef það er eitthvað sem ég get gert.

[Lalli Kalli (IP-tala skráð) 9.9.2008 kl. 12:33]

Þú átt hrós skilið!

Greinilega góð kona hér á ferð!

[Helga Magnúsdóttir, 9.9.2008 kl. 13:24]

Mér finnst algjör óþarfi að taka fram sérstaklega það sem alþjóð veit og er öllum augljóst. Ekki það að gjafmildin og allt það sé ekki öllum augljóst það var bara svo extra augljóst í sjónvarpinu.  Er þetta þá ekki augljóst?

Ég klukkaði þig. Ekki berja mig, mundu að þú ert minni en ég.

[Hrafnhildur Ýr Vilbertsdóttir, 9.9.2008 kl. 14:20]

Ég bíð spennt eftir nánari fréttum af flóttafólkinu...þetta er svo frábært..

[Katrín Snæhólm Baldursdóttir, 9.9.2008 kl. 15:36]

Gurrí mín svona grannt fólk eins og þú ert sýnist bara svolítið búttað þegar það er úttroðið af gleði og góðmennsku...ekki einu sinni besta fótósjopp getur lagað slíkt....sorry!! Og sem betur fer segi ég nú bara.

Er það rétt eða vitlaust munað hjá mér að þú borðir eða borðir ekki ostaköku?

[Linda Linnet Hilmarsdóttir, 9.9.2008 kl. 16:16]

knús kveðjur

[Hildur Helga Sigurðardóttir, 9.9.2008 kl. 16:19]

Alls ekki afþakka ostakökuna, Gurrí mín !  Annars verður þú bara eins mjó og moi, Angelina og Amy W.

Er annars alveg handviss um að það hefur verið notalegt fyrir þessar stríðshrjáðu mæður og börn að láta jafn sæta og glaðlega konu og þig taka á móti sér.

Bestu kveðjur á Skagann af þessu tilefni.

Þín, HHS

p.s. Ætti "Boldið" ekki að heita "Botoxið" ?  Þetta fólk er allt löngu orðið eins og froskar í framan.  Hefur einhver brosað í þessum þætti sl. þrettán ár ?   (Smá útlitsfasismi.   Sorrý...)

[Anna Ólafsdóttir Björnsson, 9.9.2008 kl. 17:48]

Gaman að fá að fylgjast með þessu ævintýri á blogginu þínu (og þá er ég ekki að tala um boldið í þetta sinn) - vona að þau nái öll að skjóta góðum rótum hér í nýju heimkynnunum sínum.

[Ásthildur Cesil Þórðardóttir, 9.9.2008 kl. 18:54]

Amma bloggvinkona þín er í sjónvarpinu, sagði stubburinn í gær.  Ó þú misstir af henni, sagði hann svo, hún sagði mér að hún væri vinkona þín.  Þú ert örugglega að tala um Guðríði, sagði ég og vissi strax hvað var uppi á teningnum, heyrði nefnilega umræðuefnið, komu palestínukvennanna hingað heim. 

Ég segi bara ég vona innilega að þetta fólk finni heimili hér og komi til með að líða vel hér.  Og gangi þér og ykkur öllu vel Guðríður mín. 

[Lára Hanna Einarsdóttir, 9.9.2008 kl. 19:21]

Þú verður að setja fréttina á bloggið þitt, Gurrí. Það gengur náttúrulega ekki að bloggvinkonur eins og Ásthildur hafi misst af henni! 

[Hafdís Garðars (IP-tala skráð) 9.9.2008 kl. 21:02]

Gurrí, þið á Skaga eigið heiður skilið, mér hlýnar um hjartarætur að lesa um hvað þið eruð indisleg við þetta fólk. Mikið er þetta fólk heppið að flytja á Akranes, vonandi verður skólaveran hjá krökkunum góð. Hugsa til ykkar og les línurnar þínar á hverjum degi. Alltaf verið stolt af því að vera Skagamaður, en nú ennþá meira!  

Kveðja frá Flórída

 Hafdís Garðars.

[Guðný Anna Arnþórsdóttir, 9.9.2008 kl. 21:07]

Þú varst auðvitað ekkert annað en afbragð í sjónvarpinu, kona góð. Mikið er fólkið heppið að hafa þig innan seilingar. Það er eitthvað svo fallegt við það þegar sagt er "flóttafólkið komið heim...."

[Magnús Geir Guðmundsson, 9.9.2008 kl. 22:10]

Jamm, tek undir með -The Lady Of Westernroad-, Láru Hönnu, skutlaðu þessu inn fyrir þá sem ekki sáu. Enenen, það hlýtur nú samt að hafa verið að minnsta kosti rökkvað í stofunni há RISASTÓRU fv. lögreglukonunni Helgu M., því Gurrí er jú BRÚNN engill með grænu augliti!

En þetta er bæði skemmtilegt og merkilegt með unga afmælisdrengin, fæddur 09.09.99, níu ára!

Til lukku með þetta allt saman Guðríður, fyrir hönd jú allra hinna sem lagt hafa líka hönd á plóg!

[Þröstur Unnar, 9.9.2008 kl. 22:15]

Meistari góður, kíktu bara í heimsókn til mín og þá sérðu sólina brúnu. Urlið er motta - eitthvað.

[www.zordis.com, 10.9.2008 kl. 00:13]

Það starf sem þið kæra skagafólk eruð búin að gera er sérdeilis frábært.  Þið upphefjið nýtt líf, nýja framtíð fyrir allt þetta ágæta fólk.  Megi almættið með ykkar dyggu hjálp gefa fólkinu tækifærin og frelsið!