Frábær Astrópía of fleira stöff ...

Astrópía var afar skemmtileg. Við erfðaprinsinn veltumst um af hlátri, held að þetta sé fyndnasta íslenska mynd síðan ... uuu .... Sódóma-Reykjavík. Lítið um allt of skýrmælta ofleikara, held ég bara enginn slíkur, og það gerir allt miklu eðlilegra.
Við horfðum líka heilluð á Kalda slóð í gærkvöldi, hún er alveg frábær, spennandi og vel leikin.

Einstök upplifun var að koma í Bíóhöllina í kvöld. Þar átti ég margar góðar stundir í æsku. Ný sæti, þunn og þægileg, áður voru þykk og þung leðursæti og sérstakt hljóð heyrðist þegar maður stóð upp og sætið skelltist á sinn stað. Þegar ég gekk inn í salinn hækkaði meðalaldurinn um svona 30 ár. Þrátt fyrir fjölda unglinga held ég að börn hafi verið í miklum meirihluta. Það var svo margt í kvöld að ein starfsstúlkan þurfti að hlaupa upp á svið og biðja fólk um að færa sig saman. Mikil stemmning í kvöld.
Sigþóra var í bíó og líka Harpa bloggvinkona (ekki á Moggabloggi). Gaman að hitta þær.  Ég var búin að eyða mörgum klukkutímum í að gera mig sætari (eins og það sé hægt) og svo voru eiginlega engir sætir karlar þarna.

Sjö ára bekkurinn minn flutti ljóð í Bíóhöllinni fyrir nokkrum árum. Sjá mynd. Ég er þessi gærulega í stysta kjólnum með svart belti um mig miðja. Man nöfn allra bekkjarsystkinanna og nokkra afmælisdaga að auki.

Nú er það bara rúmið, hitapoki, heitir múrsteinar, toddí, nátthúfa og Miss Marple . Svo í fyrramálið verður spennandi að vita hvort strætó fari í bæinn vegna óveðurs. Það er byrjað að hvessa og fiskibræðslufýlan sem við fundum í hléinu og fyrir myndina var fokin til Borgarness, held ég. Annars var meira rok við Bíóhöllina en himnaríki, svona ef ég má metast smá ...

Athugasemdir

[Hrönn Sigurðardóttir, 30.9.2007 kl. 23:44]

.....þvílíkir spóaleggir þarna á ferð...........

[Magnús Geir Guðmundsson, 1.10.2007 kl. 18:04]

Fari í öllum bænum á Veðramót líka við tækifæri, sjaldan heyrt eins mikið lof um íslenska mynd auk þess sem Guðný á það skilið að fólk flykkist á myndina!

[SigrúnSveitó, 1.10.2007 kl. 19:48]

dóttir mín var í bíó líka, þú hefur ekki séð hana?

[Örn (IP-tala skráð) 2.10.2007 kl. 00:39]

Reðramót er hörmung.

Díalógurinn er eins og hann var verstur í ofleiknum hjá útvarpsleikhúsinu um 1970