Innrás meinatæknanna og olíubornir dillibossar ...

Það reyndist aldeilis engin pynting að fara í blóðprufuna í morgun. Sat á biðstofunni og reyndi að hughreysta kvíðna móður, afar sprautuhrædda, en litla dóttir hennar var að fara í prufu. Pabbinn kom líka með, sjúkkitt. Ég sagði henni eins og var, að þar til ég var rúmlega tvítug hljóp ég öskrandi á brott frá öllum sprautum í sjónmáli. Hugsaði skömmustuleg um það þegar elskan hann Ingjaldur tannlæknir ætlaði að deyfa mig, kannski var ég níu ára, þá stóð ég upp úr tannlæknastólnum, flýtti mér í stígvélin og út! Jamm, "falskar um fermingu" virkaði ekkert á mig, þær eru ekki komnar enn, áratugum síðar. Elskan hún Kristín sjúkraliði, gamla bekkjarsystir mín úr barnaskóla, þaut þarna um í hvítum slopp og heilsaði glaðlega. Ég sendi henni boðskort í afmælið mitt en hún hélt að það væri djók þar sem hún vissi ekki að ég væri flutt á Skagann. Vonandi kemur hún næst ... daginn sem ég hætti að vera rúmlega fertug.
Glaðlegt fólk var á rannsóknarstofunni. Rannsóknarmaðurinn argaði hátt og snjallt fæðingardag minn og ár, eins og væri eitthvað merkilegt að ég væri rúmlega fertug, og ég sagði kuldalega (besta vörnin er sókn): „Já, þú hefur greinilega áttað þig á því að við Madonna erum jafnaldrar!“ Hann glotti og sagðist sjálfur eiga sama afmælisdag og Elvis, það munaði reyndar einhverjum árum á þeim. Konan sem tók úr mér blóðið var fáránlega mjúkhent og ég fór ekkert að gráta. Svo bara hviss, bang, allt búið! Ekki leist þeim vel á líkingu mína við leikritið góða Sláturhúsið hraðar hendur, þrátt fyrir blóð og snögga afgreiðslu ... vissulega er engum slátrað þarna, held ég. Í skaðabætur fyrir innrásina í virðulegt blóðkerfið tók ég bómullarhnoðra og límbandsrönd með mér heim. Kíkti undir bómullarhnoðrann áðan og það er ekki einu sinni að sjá nálarstungu. Mikið er annars allt notalegt hérna á Skaganum, persónuleg þjónusta og elskulegheit hvar sem maður kemur.

Í bíl erfðaprinsins í fyrradag heyrði ég útvarpsauglýsingu um kvennakvöld í Reykjavík! Lofað var olíubornum, karlkyns dillibossum, tískusýningu og svona. Frekar hallærislegt, finnst mér. Það þykir ömurlegt að olíubornar konur séu til sýnis á karlakvöldum, þetta er sko ekkert skárra. Kannski tala ég bara út frá sjálfri mér. Villt ímyndunaraflið fær bara notið sín nálægt kappklæddum körlum í vetrargöllum með lambhúshettur og vettlinga. Ekki nálægt hálfnöktum, olíubornum dillibossum, sorrí. Tala nefnilega af mikilli reynslu ... en þegar ég var rúmlega tvítug fengum við nokkrar gellur á skrifstofunni á DV boðskort á sýningu Pan-hópsins í húsnæði við Hlemm (sem síðar breyttist í Keisarann, held ég). Þarna labbaði um ungt, hálfnakið fólk í ögrandi, klámfengnum (út í sadó/masó) klæðnaði, undanrennuhvítt á litinn og ótrúlega vandræðalegt á svipinn. Svona ungt og ólgandi kvendi, eins og ég var (nú er ég bara ólgandi) fannst mér þetta hrikalega hallærislegt. Eftir þessa reynslu, sem eyðilagði bæði æsku mína og sakleysi, hef ég forðast eins og heitan eldinn að koma nálægt öllum svona uppákomum.

Ný morgunsápuópera er byrjuð á Stöð 2, spænsk og heitir Ljóta Lety. Þetta er víst fyrirmyndin að Ljótu Betty sem er sýnd á RÚV við miklar vinsældir. Ætla samt að láta boldið nægja, vildi bara segja frá þessu. Held að sumir karlkynsbloggvinir myndu hreinlega fara að skæla ef hér yrði bloggað um aðrar sápuóperur. Dettur helst í hug Kjartan og Þröstur ...

Athugasemdir

[Heimir Lárusson Fjeldsted, 13.2.2008 kl. 10:46]

Berum bossa

ber að hossa.

Fyrir fram þig.

Látum tossa

safann gossa.

Eitthvað fyrir mig.

HLF.

[Kjartan Pálmarsson, 13.2.2008 kl. 11:04]

Alveg er það merkilegt hvernig þér tekst alltaf að komast yfir myndir af mér ! Það er nú kannski sök sér, enn! Að birta þær líka finnst mér.... ekki gott. Hættu þessu stelpa!

[Helga Magnúsdóttir (IP-tala skráð) 13.2.2008 kl. 11:08]

Þegar ég var heima með strákinn minn í 20 mánuði eftir að hann fæddist horfði ég á Nágranna á hverjum degi. Nú sé ég brot og brot af þessum þáttum og það eru enn sömu leikararnir í sumum hlutverkum, eftir 14 ár!!

[Kjartan Pálmarsson, 13.2.2008 kl. 11:25]

Það er nú gott að vita að um þig var farið mjúkum höndum hjá læknaranum. Gangi þér allt í haginn á skaganum.

Núna er að koma á markað 2009 árgerðin af TV, þ.e þeir eru að hætta framleiðslu á þessum þunnu tækjum, þú veist! flatsjónvarps-draslið? Nýju tækin heita Philips bold-tv.

[Brynja Hjaltadóttir, 13.2.2008 kl. 23:16]

Ég elska nágranna. Sé þættina innan við viku gamla sjóðheita frá Ástralíu og verð aldrei leið á þeim  Það eru samt bara þrír leikarar eftir af þeim gömlu. Lou, Harold og svo kom Paul aftur.