Skólastrákurinn endurheimtur og pínku bold

Mikil gleðisjón blasti við mér í fjögurstrætó frá Mosó. Skólastrákurinn minn var mættur en ég hef ekkert séð hann í allan vetur. Hann hefur alltaf farið með fyrstu ferð og það með aukabílnum og sú aðskilnaðarstefna hefur alveg rústað hittingi. Ég kynntist honum þegar vinnan mín var í Höfðabakka 9 en þá fór ég úr strætó við Vesturlandsveginn nema ég gekk áfram nokkuð langa leið og síðan yfir ýmsar ófærur á leið í vinnuna. Einn morguninn varð ég vör við að ungur, hávaxinn maður kom í humáttina á eftir mér. Það er ekki auðvelt að skelfa mig, þótt ég sé tepra, og við tókum tal saman. Hann var þá og er enn í Tækniháskólanum í sama húsi og ég á þessum tíma. Það var notalegt að fá samferðamann því þarna þurfti að beita hugviti og greind, ásamt fádæma líkamsstyrk, til að komast heilu og höldnu í vinnu/skóla.

Eftir að skólastrákurinn kom til sögunnar varð leikur einn að stökkva yfir fúafenin, krókódíladíkin, sneiða hjá úlfagildrunum og sleppa við leðurblökurnar. Þegar ég datt á ógæfumölinni og var enn hölt dró hann mig upp úr dýpsta skurðinum sem var vitanlega fullur af rafgeymasýru. Ég bloggaði oft um skólastrákinn minn og komst svo að því einn daginn í spjalli okkar að þetta var ekki gæi á aldur við erfðaprinsinn, eins og ég hélt alltaf, heldur virðulegur karl, afi og allt og kvæntur henni Klöru, sem ég þekki síðan í gamla daga. Fljótlega dreif ég mig til augnlæknis sem harðneitaði að láta mig fá sterkari gleraugu, þá þyrfti ég önnur daufari til að vinna með, augun yrðu löt, bla bla. Skólastrákurinn er nú ekkert karlalegur ... og með skólatösku á bakinu, hver hefði ekki ruglast? Dóttir hans og Klöru er ein hjúkkan sem hjúkraði Davíð frænda á barnadeildinni í fyrra, algjört yndi. Hlini kóngssonur hertók hann svo í strætó svo við gátum ekkert spjallað. Gummi bílstjóri var þrælhress og talaði mikið um það hvað fallegt er í Þórsmörk. Sagðist vita um fólk sem hefði aldrei komið þangað og sjokkeraðist þegar ég sagðist vera ein af því!

Blessað boldið: Ridge reynir að tala Brooke til og segir henni að hún eigi ekki að láta Nick og Bobby í Dallas stjórna sér svona. Mikið er ég sammála honum. Hvað er Forrester-tískuhúsið án Forrester-fólksins? Stefanía fattar að Taylor vissi af þessu þegar hún seldi körlunum lævísu þessi 2 prósent sín og þær rífast. Hik er á Brooke að standa við brottreksturinn og rétt áður en tjaldið féll talaði hún um að tískuhúsið væri Forrester-fjölskyldan.

Athugasemdir

[Fjóla Æ., 10.3.2008 kl. 19:33]

Ég veit með vissu að dóttirin er með hjarta úr gulli. Veit reyndar ekki alveg hvað hún heitir en ég þekki allar þær sem voru að vinna þarna í fyrra og þar með að hjartað er úr gulli. Þú mátt kannski uppljóstra nafninu á hjúkkunni

[Birna Dis Vilbertsdóttir (IP-tala skráð) 10.3.2008 kl. 21:30]

Takk fyrir boldið.Er ekki með st 2 og "sárvantar"boldið til að koma mér í gang á morgnana hahahahaha

[www.zordis.com, 10.3.2008 kl. 21:35]

Gurrí ... drífa sig í Þórsmörk!

[Edda Agnarsdóttir, 10.3.2008 kl. 22:17]

Já, sagan af stráknum og sjóninni er nú eitt snillingslegasta sem ég hef séð á blogginu! Takk Gurrý mín, svona á þetta að vera draumkennt og skemmtilegt.

[Linda Linnet Hilmarsdóttir, 10.3.2008 kl. 22:17]

Takk takk fyrir mig og bestu kveðjur.

[Jenný Anna Baldursdóttir, 10.3.2008 kl. 23:16]

[Anna Ólafsdóttir Björnsson, 11.3.2008 kl. 00:28]

Skólastrákurinn já, kewl, eins og ónefndur vinur vor segir.

[Steingerður Steinarsdóttir, 11.3.2008 kl. 09:55]

[Helga Magnúsdóttir, 11.3.2008 kl. 11:05]

Boldið rúlar. Mikið er ég fegin að þú skulir aldrei hafa komið í Þórsmörk. Ég hélt að ég væri sú eina sem svo væri ástatt um. En ég hef aldrei komið til Akureyrar og það kveða alltaf við ramakvein þegar ég segi frá því.

[Hulda (IP-tala skráð) 12.3.2008 kl. 00:37]

alltaf sama hringavitleysan í boldinu, þú hefur greinilega ekki verið að horfa á nágranna

[Magga Hrönn (IP-tala skráð) 12.3.2008 kl. 00:40]

Góð skemmtun að lesa bloggið þitt og takk fyrir leikinn um daginn, ég laumast í hann svona annars slagið, kannski miklu oftar en ég held því ég er er orðin svo óskaplega flink sko 6.borð