Vér fórnarlömb samsæris ... og barnastrætó

Gærdagurinn var annasamur, það þurfti að fara í banka, einnig upp í Classic-, Bónus- og apótekshús í útjaðri bæjarins og þrátt fyrir strætóferð náði ég góðum árangri í skrefakeppninni við sjálfa mig. Náði yfir 2.500 skrefum sem þykir ansi gott í himnaríki með vinnustaðinn sinn þremur skrefum frá rúminu. Þrátt fyrir fótaferð fyrir tíu í morgun, eldaðan hádegismat (síminn reyndar kyrr á meðan, það vantar vasa á kvenföt) og annað rölt, er ég bara komin með 10 prósent af því núna. Það eru alveg takmörk á ferðum fram í eldhús til að ná sér í kaffi. Í mesta lagi þrjár á dag. Hæ, litla, ódýra, gagnlega göngubretti!

 

Mikið eru þau ljúf í Landsbankanum og gerðu allt fyrir mig og drengsa. Reyndar skal upplýst hér og nú að það breyttust forsendur varðandi þann ljúfa dreng og hann flytur frá mér í næstu viku, talsvert fyrr en ætlað var en svona getur þetta gengið fyrir sig. Ætli ég reyni ekki að vera einbúi á næstunni, þar til ég verð flutt í bæinn, til að einfalda lífið, vonandi næst það innan örfárra mánaða. Annars skildist mér á öðrum kaupmannssyninum í uppáhaldsbúðinni minni, þegar hann mætti í gær með vörur, að ég væri fórnarlamb samsæris ... um að fá ekki að flytja héðan, öllum víst bannað að kaupa himnaríki, svo hló hann en ég er ekki sannfærð um að hláturinn hafi verið ekta.

 

Það skyldi þó ekki vera eitthvað í gangi? Ég þakka mér þó ekki alfarið fyrir vöxt Akraness, eða allan strauminn af fólki sem hefur flust búferlum hingað frá 2006 en geri mér þó alveg grein fyrir því að mögnuð frammistaða mín í Útsvari þegar ég náði næstum fullu húsi í stóru spurningunni um Oliver Twist, ég sagði líkkistusmiður sem þótti ekki fullnægjandi, útfararstjóri var hið rétta svar um fyrsta vinnuveitanda Olivers. Útsvar var bara byrjunin, og eiginlega eins og við manninn mælt, fyrst urðum við 6.000 talsins og núna orðin rúmlega 8.000. Ég þakka mér og bloggskrifum mínum þó alfarið fyrir að það kemur æðislega flott hótel á Breiddina (þar sem vitarnir eru) sem Philippe Starck mun hanna. Útlendingar kunna mun betur en við að meta sjávarútsýni. 

 

Ef ég flyt í Kópavog, grunar mig að það sama gerist þar, fyllist allt af flottu fólki. Ég mun þó reyna að gista árlega einhvern hroðalegan óveðursdag í suðvestanátt á Starck-hótelinu á Breiddinni ... vá, hvað það yrði stórfenglegt!!!

 

Annars eru samsærin víða, eiginlega í flestu, miðað við það sem ég sé á samfélagsmiðlum: Til dæmis hafa margir forsetaframbjóðendur okkar einungis áhuga á embættinu til að aðstoða við Endurræsinguna miklu ... eða þegar alþjóðaefnahagsráðið tekur yfir heiminn. Þetta WEF-dæmi hefur víst sent þrjár flottar konur, Katrínu, Höllu T og Höllu Hrund, til að reyna að klófesta þetta valdamikla embætti sem forseti Íslands er. Fortíð þeirra allra hefur "miðað að veikingu landins", las ég líka. RÚV sniðgengur auðvitað þau sem vara við þessu. Svo sást meira að segja Halla T. í félagsskap Gretu Thunberg!!! sem merkir örugglega eitthvað. Já, og Helga Þórisdóttir fór víst í framboð AÐEINS VIKU eftir að Umboðsmaður Alþingis fór fram á við Persónuvernd að fá afhent gögn í viðkvæmu máli sem Hallur Hallsson hefur tekið upp á arma sína. Skil ekki alveg samhengið, en það MUN KOMA Í LJÓS.

(MYND: Ekki lesa neitt í það að einn sé auka þarna og vanti nokkra, fannst þetta bara svo glaðleg mynd)

 

Já, og Katrín vill að konur ráði yfir eigin líkama, SEM ÞÝÐIR AÐ HÚN HATI ÓFÆDD BÖRN ... hef ég séð. Ég bíð bara eftir því að einhver afhjúpi Ásdísi Rán, afmælissystur mína, en hún tengist engum alheimssamsærum, held ég. Það er samt grunsamlegt út af fyrir sig að ljóshærð kona hafi getað orðið þyrluflugmaður!

Það er líka eitthvað mjög gruggugt við að Jón Gnarr sjáist svona oft í sjónvarpinu, í endursýndum Fóstbræðraþáttum - og því er efni með honum ekki fjarlægt af YouTube? Hvar er samkeppniseftirlitið? Það er sem sagt hann sem Stöð 2 vill fá sem forseta til að hann geti styrkt stöðu Sýnar eftir að hann kemst á Bessastaði!!! Fann ekkert samsærislegt um Baldur í leit minni og heldur ekki Steinunni Ólínu. Og auðvitað ekkert slíkt um Arnar Þór.  

 

Ýmsir sem ég þekki hafa enn ekki gert upp hug sinn, jafnvel sveiflast á milli þeirra sem verst er talað um (þannig komst Trump víst til valda).

 

Það varð uppnám hjá hópi fólks þegar gerð var einn ein skoðanakönnun um fylgi forsetaframbjóðendanna, af því að Arnar Þór, sá fremsti í stafrófsröðinni, var settur neðstur. Samsæri, sögðu margir. Fólk sennilega búið að gleyma að það er alltaf dregið um hver er efstur á kjörseðlum, og síðan fylgja hinir á eftir í starwarsröð ... sjá mynd af gömlum kjörseðli sem ég fann með gúgli. Af ótta við svindl, mögulega, eru flestir kjörseðlarnir mjög, mjög óskýrir á gúglinu, sem er auðvitað samsæri til að gera mér erfitt um vik við að sanna mál mitt. Sjálf hefði ég sett þann neðsta hér á þessum kjörseðli í fyrsta sætið, hann Gunna sem var í mínum bekk á Akranesi til 13 ára aldurs. Röðin hefði engu skipt.

 

Í samsærisgúgli mínu, þótt ég reyndi að einbeita mér að Íslandi, komst ég líka að því að Michelle Obama var karlmaður á yngri árum og Obama foreti því hommi, eins og fylgdi sögunni, það reyndar Íslendingur sem sagði þetta í kommenti hjá konu á fb. Breska konungsfjölskyldan er, eins og hún leggur sig ... eðlufólk. Hlakka til að gúgla meira um eðlufólkið. 

 

STRÆTÓ fyrir stutta fætur

Þegar ég sat í strætó í gær, leið 1 innanbæjar, á leið minni í CL.BÓ.AP-húsið, lá við að ég fengi krampa í fæturna. Svo ofboðslega þröngt var og ekkert pláss fyrir löngu leggina. Ég er ekki nema 1,70 á hæð, svo ég er ekki að tala um alvörufyrirsætuleggi, en í hönnun vagnsins eru stærðarhlutföll eilítið skrítin. Ég stóð upp áður en ég gerði mig að fífli með öskrum, og kom mér fyrir í öftustu sætaröðinni - fyrir miðju og eins og sést á myndinni skagar fagurt hnéð á  mér ágætega fram fyrir það pláss sem fótum er ætlað í þessum vagni. Ég er með töskuna í kjöltunni og í svörtum buxum (sem ég keypti í Glasgow í fyrra).

 

ÞEGAR ég næ sæti þar sem öldruðum með staf er ætlað að vera (fjögur sæti) og gott fótapláss, en ætíð fullt af börnum þar, fer vel um mig, og ég stend að sjálfsögðu alltaf upp ef ég sé að gamalmenni með staf eða án, kemur inn í vagninn. Fínasti rafmagnsstrætó en skilningslitlu "JEPPAEIGENDURNIR" sem völdu þennan vagn voru einungis með skólabörnin í huga, til að minnka allt skutl foreldra - sem er alveg virkilega æðislegt, en það er samt samsæri gagnvart okkur bíllausu, fullorðnu sem viljum líka fá að taka strætó í mjög ört stækkandi Akranesborg.

 

Sama má segja um þau hjá Vegagerðinni sem pöntuðu vagnana sem ganga á milli AKR og RVK og víðar (nr. 57) og gleymdu að spyrja t.d. bílstjórana hvað væri gott að panta með vögnunum ... eins og að hægt væri að hlaða símann sinn í strætó, eins og var hægt í gömlu vögnunum, að bílbeltin væru vönduð og ekki hönnuð fyrir hávaxna karla þannig að hausinn á manni fyki ekki af ef bremsað væri harkalega ... það er mjög óþægilegt að sitja með bílbelti um hálsinn. Hægt er að lækka beltin í flestum bílum en ekki í strætó. Svo veit ég í gegnum suma bílstjórana að ekki voru valdir vagnar sem henta akstri í t.d. aðstæðum sem koma upp á Kjalarnesi í hviðum og slíkum leiðindum.

 

Facebook-fréttir

Ég fékk spennandi vinabeiðni í gær, frá konu sem vinnur sem prófarkalesari og blaðamaður (skemmtileg tilviljun), hún stundaði nám hjá Villiköttum á Höfuðborgarsvæðinu ...

Sjá mynd.

- - - - - - - - - - - - -

 

16.5.2011:

„Vitið þið klukkan hvað heimsendir verður á laugardaginn? Væri gott að vita það upp á innkaup og svona,“ spurði ég þreytulega á Facebook fyrir 13 árum, hafði séð sjónvarpsauglýsingu rétt fyrir fréttir á annarri sjónvarpsstöðinni um heimsendi - þar var bara dagsetningin 21. maí, nefnd, en ekki klukkan hvað við brynnum öll í vítiseldi. Það var líka truflandi að vita af öðrum heimsendi eftir ár, eða 21. des. 2012 og einnig þeim sem átti að koma 2020. Ég á bestu feisbúkkvinina: 

EA: Hvaða heimsendir?

HH: Skilst að hann verði rétt undir miðnætti.

NR: Ég er búin að kanna málið. (þurfti að vita hvort borgaði sig að kaupa áfyllingu á grillgaskútinn) og það verður ekkert heimsendir á laugardaginn. Þá hverfa bara allir þessir sannkristnu (eða sumir þeirra) upp til himna og við hin verðum eftir. Svo kemur Andkristur og stjórnar öllu í fimm mánuði og ÞÁ verður heimsendir. Í október alltsvo. Þannig að ég kaupi gasið, það hlýtur að vera hægt að grilla eitthvað í sumar þótt Andkristur sé að derra sig. 

 

Þessi svör róuðu mig en það var þó ekki fyrr en ég sá að Formúla 1 var auglýst á dagskrá á sunnudeginum (22. maí) að áhyggjur mínar af heimsendi hurfu.

 

Eru allir hættir að spá endalokum heimsins?

Svarið er nei, ég gúglaði.

 

Heinz von Foerster spáir heimsendi 13. nóvember 2026, vegna offjölgunar mannkyns, sá spádómur birtist í vísindatímariti árið 1960.

Messiah Foundation International spáir líka endalokum mannkyns eftir tvö ár (vonandi eftir sólmyrkvann 12. ágúst) þegar jörðin rekst á smástirni - kemur fram í bókinni The Religion of God. 

Kent Hovind, bókstafstrúarmaður og predikari, gefur okkur lengri tíma, eða til 2028, og segir að það ártal sé langlíklegast en hann sé þó alls ekki alveg viss.

 

Heimsendir næst:

31. desember 2129.

30. september 2239

Árið 2280, sorrí, vantaði mánaðardag. 

Fyrir neðan allar hillur ...

Ein af ótalmörgum frænkum mínum hringdi í mig í morgun og hnussaði fúl yfir hinu splunkunýja millinafni mínu, hún ávítaði mig líka fyrir að hafa ekki sagt henni, svo hún gæti varað mig við, frá þessu áður en ég birti þetta í málgagninu, eins og hún kallar mitt heilaga blogg. 

„Er ég eina manneskjan sem sé í gegnum þetta útspil þitt? sagði hún hæðnislega.

Hjartað herti á sér. „Hvað áttu við?“

„Það getur ekki verið tilviljun að dóttir fasteignasalans þíns heiti Hrefna, er það? Hvað heldurðu að þú fáir út úr þessu smjaðri? Nafnbreyting er nú, væna mín, eins og tattú sem þú losnar aldrei við? Hefurðu ekki kynnt þér grjótharðar reglur Þjóðskrár?“ 

„Þú ert viti þínu fjær,“ sagði ég.

„Spegill,“ sagði hún róandi og bætti við: „Heldurðu virkilega að hann hækki verðið á himnaríki fyrir þig? Eða láti breyta brunabótamatinu, það er reyndar of lágt miðað við endurbæturnar um árið? Að hann bjóði kannski sellebrittís á Opið hús hjá þér? Býr ekki Skálmöld á Skaganum? Uppáhaldsöskuraparnir þínir? Alla vega einn þeirra? Það væri árangursríkara að láta leka út að Jason Statham sé á leiðinni til landsins og renni hýru auga til himnaríkis, eitthvað slíkt,“ hélt Þrúða frænka áfram og áhugi minn kviknaði. Ég hef verið skotin í Jason í mörg ár. Hann er í ljónsmerkinu, eins og ég, og ekkert svo mörg ár á milli okkar. Við gætum fengið okkur hraðbát fyrir framan (ég myndi auðvitað ekki flytja út þegar hann flytti inn), ég keypti aukalega landhelgi með himnaríki þarna 2006, bygging bryggju og bátaskýlis leyfileg, en mögulega þyrftum við að flytja íþróttavöllinn. Og af því að við Jason yrðum svo umsetin gæti ég þurft að takmarka aðgang fólks að Langasandi, ja, eða kannski ekki. Jason virkar mjög alþýðlegur og hann myndi kolfalla fyrir Skagamönnum eins og svo margir. Honum fyndist örugglega áhugavert að Fast8 (Fast and the furious 8) hafi verið tekin upp hér á hlaðinu. Þetta getur bara ekki klikkað.

 

Fréttir af Facebook:

Einn fb-vinur heitir God og kemur oft með krefjandi spurningar til okkar aðdáendanna.

Ein nýleg er:

„Geimverur lenda á jörðinni. Hvaða persóna ætti, að þínu mati, að hitta þær fyrir hönd mannkyns?“

Svörin voru mörg og vinsælustu persónurnar voru þessar:

 

Jack Black

Dolly Parton, auðvitað

Keanu Reeves

Sir David Attenborought

Trump (myndu verja degi með honum og aldrei koma aftur)

Dalai Lama

Chuck Norris, til öryggis

Jimmy Carter og Willie Nelson.

- - - - - - - 

 

Svo var einhver að rifja upp fyndin og bjöguð orðatiltæki með aðstoð þeirra sem skrifuðu komment - og ég stal miskunnarlaust nokkrum góðum fyrir þau sem eru ekki á Facebook en búa yfir þeim þroska að lesa blogg:

 

- Mér er ekkert að landbúnaði.

- Mér rann kalt vatn milli þils og veggjar.

- Eins og skrattinn úr sauðalæknum. 

- Sjaldan launar kálfur ofbeldi.

- Það veit ég sem allt veit. 

- Að vera á undan sinni framtíð. 

- Margur er ríkari en hann er. 

- Ég biðst fyrirlitningar.

- Get bara ekki brotið odd af ofbeldi mínu. 

- Eins og naut á mannvirki. 

- Enginn veit hvað átt hefur fyrr en flutt hefur (svo rétttt).

- Fyrir neðan allar hillur.

- Eins og draugur úr heiðskíru lofti. 

Stórbreyting og uppselt afmæli ...

Afskaplega seinlegu verkefni lauk í fyrradag hér í tölvunni í himmaríki og mér finnst ég hafa lést heilan helling við það, það var ekkert leiðinlegt að vinna þetta samt - tók bara svo langan tíma. Næsta verkefni á eftir er svo ótrúlega fljótlegt (og líka skemmtilegt) að ég get skilað því af mér á morgun.

 

Röskleg ganga mín síðasta miðvikudag dró heldur betur dilk á eftir sér og fk. hásinin bólgnaði aftur. Fólk flissar þegar ég segi að gömul íþróttameiðsl hafi tekið sig upp - en það er dagsatt. Þegar ég skráði mig bjartsýn í skokkhóp við Langasand fyrir löngu reyndist ég vera langsamlega lélegust, við vorum vel yfir 20 talsins. Þrátt fyrir skvass-árin þar sem ég blés ekki úr nös í 45 mínútur ... grunar mig að einhver lungnabólga og þyngdaraukning eftir að hafa hætt að reykja um hríð, byrjað aftur án árangurs, sófakartöflulifnaður, langar setur í strætó Akranes-Reykjavík-Akranes, kannski aldurinn, ég veit það ekki. En ég var mjög móð og yfirkeyrð eftir hraða göngu í kringum íþróttahöllina stóru, með fram hluta Langasands, minnir mig, áreynsla getur valdið minnisleysi, og svo þegar átti að teygja gerði ég það svo rækilega að ég næstum sleit hásin, þá sömu og angrar mig núna, mörgum árum seinna. Var heillengi að jafna mig þá og líka núna. Furðulegt, mig langar aldrei út að ganga - en akkúrat þegar ég á erfitt með það langar mig.

 

Jæja, stórfréttir: 

Eftir að hafa látið lítið fara fyrir mér í fjölskyldunni í áratugi - með aðeins eitt nafn (og föðurnafn) ákvað ég að fara út á bjargbrúnina, eiginlega langt út fyrir þægindarammann, leyfa meðfæddu hugrekkinu að ráða loksins og í leiðinni gera mig enn meira gildandi. Ég fór inn á vef Þjóðskrár og var eiginlega einhvern veginn neydd út í þetta, svo auðvelt og hvetjandi var viðmótið og mikið uppáhaldsnafn í gegnum tíðina er nú orðið að millinafni mínu. Ekki samt Elísa, en það var uppáhaldsnafnið mitt á árunum þegar ég þráði heitast að vera prinsessa af Danmörku - sviksemin við Ísland vegna matarómenningarinnar sem hér ríkti.

 

Undanfarin ár hef ég sem sagt hugsað um að bæta við vissu millinafni. Gamall kunningi með vit á talnaspeki, varð voða hrifinn þegar hann heyrði nafnið og sagði að ekki veitti af að fá inn fimmuna (afsakið kínverskuna) sem skorti svo tilfinnanlega, það vantaði algjörlega ferðagleði og glaum í nafnið mitt en fimman væri í stöfunum e og n, minnir mig. ÞRÁTT FYRIR ÞAÐ og ég hefði ekkert á móti því að halda áfram að vera heimakær sófakartafla, varð þetta nafn nú fyrir valinu, ekki síst vegna hrifningar minnar á krumma ... svo nú heiti ég löglega: Guðríður Hrefna Haraldsdóttir ... Endilega kallið mig Hurrí.

Er reyndar líka hrifin af mávum en ...  Jónatana* sem millinafn er ekki jafnflott. (*Man kannski enginn eftir bókinni Jónatan Livingstone mávur? Kom út 1973) Þegar ég gúglaði árið sem bókin kom út, sá ég líka minnst á veitingastað með þessu nafni, Guffi og allt, og minningarnar reyndu að troða sér upp á yfirborðið. Við Tryggvagötu ... fór maður ekki stundum þangað frá 1988 (stofnað skv. gúgli) og kannski til aldamóta?

 

Og annað, ég hefði aldrei farið út í þetta nafnadæmi nema bara af því að vegabréfið mitt er hvort eð er að renna út. Og jú, ég þarf víst að endurnýja rafrænu skilríkin líka en það er ekkert mál. Mikið sem þetta gekk hratt fyrir sig. Ég sótti um í gær og vandaði mig mikið við að búa til sennilega skýringu á beiðni minni, t.d. að hrafn væri í skjaldarmerki ættarinnar - sem virkaði svona líka fínt! Frábær þjónusta hjá Þjóðskrá, rafrænt og alveg ókeypis. Takk, elskurnar.

 

Ein sem ég sagði frá þessu fyrr í dag spurði mig hvort þetta hefði breytt lífstölunni minni. Ég varð að játa að ég hefði ekki hugmynd um það, datt ekki einu sinni í hug að kíkja í mína eigin bók (Galdraskjóðuna, samansafn af alls konar samkvæmisleikjum, hvar ætli hún sé?) og reikna. Hefði þá  mögulega geta endað með nafnið Jónatönu eða jafnvel Mildríði - til að blíðka talnapúkana. Hver veit.

 

Fréttir af Facebook

Ég er hætt að öskra yfir alþjóð réttan aldur minn, nema á afmælistertunni ár hvert og fæðingarár mitt er á Facebook en það kann enginn að reikna lengur ... já, bókaormurinn ég hef aldrei vitað nafnið á tánum á okkur! Bara stórutá og litlutá.

 

 

Elskan hann Sigurður Hreiðar, fyrrum ritstjóri Úrvals og Vikunnar, vissi allt um tærnar og setti nöfnin í athugasemd: Stóratá, háatá, miðtá, lágatá og litlatá. Svona er Facebook nú fræðandi þegar hún tekur sig til.

 

Á þræði tengdum forsetakosningunum: Athugasemd: „Fáir vita það en Covid-19 var sett af stað til að búa til dýrustu raunveruleikaþætti sögunnar. Sama var upp á teningnum með WW2. Þá erum við raunar að tala um útvarp.“ (BJ)

 

Minning af mínum eigin vegg frá 11. maí 2016. Fyrirspurn frá myndarmanni sem var annaðhvort að reyna við mig á frumlegan hátt eða vildi eyðileggja mannorð mitt: 

„Fyrirgefðu eða ert þú konan sem fórst einu sinni með mér til U.S.A man það ekki alveg en held það.“

 

„Útlendingur getur ekki einu sinni keypt sumarhús í Danmörku nema til eigin nota. Á Íslandi hefur Breti keypt rúmlega 80 jarðir og enginn segir neitt.“ (BBB)

 

MYNDIN: Er ferðaþjónustan farin að gera út á afmælið mitt eftir tvö ár? Þetta er ekki einu sinni stórafmæli! Ég hef aldrei selt inn.   

Skyndihugdetta á gönguför ...

Skrefafjöldinn jókst um 200% miðað við gærdaginn, bara við að skreppa í smávegis gönguferð með drengsa sem mætti á svæðið í dag. Sólin var svo sæt að láta sjá sig eftir endalausar rigningar undanfarið, svo nú veit hann að það er alltaf gott veður á Akranesi. Takk, veðurfræðingar.

 

Í staðinn fyrir að njóta gleðinnar af Eldum rétt-snilldareldamennsku minni, fékk ég skyndihugdettu í gönguferðinni sem var farin undir kl. 18. Að bjóða upp á gómsætan skyndibita. Flamingo varð fyrir valinu. Annað okkar fékk sér kjúklingarétt með sætkartöflu og salati, hitt fékk sér hamborgara og franskar sem er til þarna þótt þetta sé sýrlenskur staður. Það var brjálað að gera, svona um miðvikudagskvöldmatarleytið. Skagamenn greinilega vitlausir í góðan mat.

 

Ég gekk aðeins of hratt því fóturinn var orðinn góður ... eða var hann það? Hásinarskrambinn ... Hefði sennilega þurft ögn lengri hvíld en þetta er samt allt að koma. Gömlukonugöngulagið er á hraðri útleið, held ég.  

 

Lauk við Týndu systurina rétt eftir hádegi í dag á meðan ég þvoði, braut saman og snurfusaði himnaríki. Hún var engir 25 tímar þar sem ég stillti á meiri hraða, sem getur sparað manni nokkra klukkutíma, en ég var samt þrjá og hálfan dag með hana, enda þarf fleira að gera í lífinu en hlusta á sögur. Lífið er enginn dans á rósum. Engar rósir án þyrna. Í þessum sögum er framvindan ekki endilega hröð - og fleiri en ein saga sögð (sem allar tengjast auðvitað) sem hentar mér prýðilega, fínt að geta látið dáleiðast og brotið saman þvott sem er mjög leiðinlegt án sögu í eyrum en fljótlegt og algjörlega gleymanlegt með bók. Svo þegar ég vinn í tölvunni við yfirlestur, hlusta ég á músík, eða öldunið frá Langasandi sem er ægilega notalegt.

 

Hvað er að gerast á Facebook?

Á Fb ríkja frekar mikil leiðindi, ég sá auðvitað ekki nema útvaldar síður (Takk, Meta) en það var vakin athygli á þessu:

Kona hljóp í 57 klukkutíma, 382 kílómetra. Sló met. Karl skrifar frétt um málið:

 

Stuðningurinn ómetanlegur (Myndband)

„Hann verður að bíða með þessi börn, elsku maðurinn.“

En kannski var þetta það eina merkilega sem hún sagði ... ;)

Nýir heimilisvinir, óð dyrabjalla og kraftaverkakvittun

Dyrabjallan stoppaði ekki í dag sem er mjög óvenjulegt heima hjá manneskju sem fann engan mun á lífi sínu í covid-samkomubanni en ég náði fleiri skrefum fyrir vikið. Stráksi kom og fór út með ruslið, klappaði kisunum, sótti þrjú ónýt úr og risastóran jólaálf ... nú er sennilega allt komið. Ég spurði hann hvort hann kynni að tengja Playstation 4 en hann hristi hausinn svo vonandi kann drengsi það sjálfur. Eða við í sameiningu með aðstoð YouTube, taka bara Hildi (fv. granna) á þetta.

 

Eldgömul vinkona kíkti líka, alveg óvænt og í fyrsta sinn, stráksi þá nýkominn til að þræla (hann bauðst til þess, þessi elska), ég í tölvunni að vinna á trilljón, svo illa stóð á. Eins og það er gaman að fá gesti er ég orðin háð því að fá fyrirvara, sem var nú alls ekki svo fyrir bara örfáum áratugum, tveimur, þremur, en ég var sem betur fer sómasamlega klædd og fínt í himnaríki, en tveir ruslapokar stóðu samt við dyrnar, og pappi/plast-poki sem stráksi ætlaði að fara út með. Svo kom elsku sýrlenska vinkona mín akkúrat þá, með disk af sérlega góðum mat og rauk svo strax heim. Jamm, Eldumrétt-fiskurinn sem átti að vera í kvöld fór í frysti. Tvisvar í dag hringdi svo sérstakur vinur minn og nágranni, níu ára, dyrabjöllunni en hann gleymir stundum lyklunum heima.

 

Stráksi var enn hjá mér þegar bjallan hringdi enn og aftur, nú Einarsbúð. Sending. Í fyrsta skipti á ævinni þurfti ég að skoða reikninginn fimm sinnum, því ég trúði ekki upphæðinni. Er Einarsbúð farin að námunda? hugsaði ég greindarlega en sá ýmsar upphæðir sem enduðu á 8, 9, 5 ... en samtals hljóðaði reikningurinn upp á 20.000 nákvæmlega! Ef þetta veit ekki á eldgos ... Vona bara að Arion banki stoppi ekki millifærsluna af ótta við peningaþvætti!

 

Þetta var nú bara kornflex, ostur, brauð, rjómi, kaffirjómi, bananar, mjólk og súrmjólk og eitthvað með kaffinu á morgun þegar drengsi kemur. Ég er vissulega manneskjan sem breytti Messenger milli mín og einnar systur minnar með kinninni, var að hlusta á sögu í strætó, gleymdi að slökkva á skjánum, og tókst að breyta litasamsetningunni á samskiptunum og þegar ég ýti á þumal upp-merkið, kemur pylsa með öllu. Inga vinkona er álíka sniðug, breytti samskiptum milli okkar tveggja á svipaðan hátt, nema þumallinn er körfubolti. Allt með kinninni. Og nú þetta! Ég óttaðist að mér yrði ekki trúað svo ég tók mynd af kvittuninni (sjá myndina). Þetta er eitt það æsilegasta sem ég hef lent í lengi ... algjör kraftaverkakvittun.

Veit einhver hvernig maður breytir til baka Messenger hjá sér?

 

Fréttir og slúður af Facebook - samfélagsmiðlar 

Á Facebook er eiginlega bara talað um Júróvísjón í kvöld. Þau sem horfðu voru flest hrifin af frammistöðu Heru, enda dúndursöngkona ... sem er svo sem ekki málið.

Guðni forseti sat á fremsta bekk á samstöðutónleikunum í kvöld (fyrir Palestínu) - einhver spurði:

„Mættu einhverjir forsetaframbjóðendur?“ Já, viðkomandi sá Ástþór og Steinunni Ólínu.

Alltaf af og til brjálast einhver yfir tungumálinu, að við skulum reyna að hafa það minna karllægt en það hefur verið. Sko, ef ég leita að orði í netorðabók verð ég að hafa það í karlkyni til að það finnist. Leikurinn Orðasnakk í símanum býður bara upp á orð í karlkyni. Í spennubók sem ég las yfir kom nokkrum sinnum fyrir að talað var um lögguna svona: „Kannski vita þeir í löggunni eitthvað um málið?“ Lögreglustjórinn í umdæminu þar sem glæpurinn gerðist var kona - og líka önnur aðalsöguhetjan.

Breytingar eru oft ljótar - ég gleymi ekki feginleikanum þegar prófarkalesararnir hjá Birtíngi leyfðu okkur að skrifa sprey í staðinn fyrir sprei sem var lengi vel talið hið eina rétta. Ég gat ekki vanist því, ég er samt manneskjan sem vill hafa partí (ekki ý), kósí (ekki ý), Gurrí ekki ý ... en við fengum svo oft skammir fyrir sprei, svo ljót villa, sagði fólk.

 

Ég ver talsverðum tíma á samfélagsmiðlum, svona símahangs ... þá tel ég líka með þegar ég hlusta á sögur með símann í vasanum að gera húsverk. Instagram fer með mér í bólið, það tekur mig um klukkutíma að fara yfir allt, þá fyndnu helgi.and.erlend (norskir en samt skemmtilegir, gera oft grín að Íslendingum (urrr) en aðallega Svíum samt), siegfriedundjoy (eru hrikalega fyndnir, sjá mynd) og greipjokes (íslenskur, frábær) en svo er venjulegt fólk, líf og ástir og örlög, og ég hef mjög gaman af því að fylgjast með: katrinedda, gudnymatt, kristaketo, thelmahilmars og helling í viðbót. Katrín Edda er vélaverkfræðingur hjá Bosch í Þýskalandi, vinnur við að þróa sjálfkeyrandi bíla, töff, falleg ljóska sem lætur útlitið ekki skemma fyrir sér, með bein í nefinu, flott fyrirmynd ... Guðný Matt og fjölskylda ferðast um heiminn á húsbíl, aðallega Evrópu, og þau eru voða viðkunnanleg og skemmtileg, Krista gerði upp hús í sveitinni í Hafnarfirði, við sjóinn, þau eru ótrúleg hjónin þegar kemur að endurbótum, Thelma er einfaldlega ofboðslega fyndin ... svo er Þórdís Gísladóttir, uppáhaldsljóðskáldið mitt, líka á Instagram og mjög gaman að fylgjast með henni. Þetta er bara örlítið brot sko!

 

Fólkið sem maður fylgist með verður ... eins og sagt var um fréttaþulina í gamla daga, hálfgerðir heimilisvinir! og mér er alveg sama þótt síminn minn skammi mig fyrir að hanga svona í símanum ... Nokkrir (tveir) áhrifavaldar eru vissulega með og þegar þeir byrja að sýna kannski snyrtivörur eða blóta köttum, skippa ég hratt. Hef meiri áhuga á hvernig til dæmis littlevikingstravel gengur að fá nýja vél í húsbílinn og hvernig óvæntu hvolpunum vegni.

Mest pirrandi, kurteisi eða pappírsflóð

Ótrúlegt en satt, ég er búin með átta og hálfan tíma af Týndu systurinni síðan rétt eftir miðnætti 5. maí ... (hraði: 1,2) en á samt 12 klst. og 11 mín. eftir. Hversu dýrlegt er það. Ég á vinkonu sem er hreinlega ekkert spennt fyrir bókunum um systurnar sjö ... sem mér finnst ótrúlegt. Ég þekki svo sem fólk sem er afar hrifið af sannsögulegum myndum en mér finnst þær yfirleitt hörmulegar, þær enda iðulega illa, einhver deyr (Titanic) svo ég vil ekki verja frítíma mínum í slíka ekki-gleði. Ég veit alveg hvað heimurinn getur verið vondur en nenni ekki að velta mér upp úr því. Af sömu ástæðu get ég ekki horft á náttúrulífsmyndir (enda sannsögulegar), nema ég viti fyrir fram að ljón drepi ekki fallegu góðu mörgæsina (grín en ekki grín) þegar á að sýna okkur hversu náttúran geti verið grimm og eiri engu. Ég veit að þeir eru flottir en má ég frekar biðja um hunda- eða kattavídjó með góðum endi? Ekki endilega þegar gott fólk bjargar dýrum í neyð, slík myndbönd eru stundum sett á svið, til að fólkið geti baðað sig upp úr hrósi, hjörtum og lækum. En auðvitað alls ekki alltaf. 

 

Facebook í stuði:

Virkilega gaman stundum að lesa suma þræði - eins og nýlega af síðu vorra landsmanna sem búa í útlöndum. Ég á eftir að lesa þráðinn þar sem fólk segir frá kostum landanna sem það býr í, sá var neðar, því festist í þræðinum: Hvað fer mest í taugarnar á ykkur í núverandi búsetulandi? Hann var svo sem ekki langur og það sem fer í taugarnar á einum þarf ekki endilega að pirra annan. Mér fannst þetta mjög áhugavert og skemmtilegt. Er mjög hrifin af kurteisi Breta sem fer nú samt í taugarnar á sumum ... Munið bara að sumar þjóðir halda að við Íslendingar séum alltaf á fylliríi og kunnum ekkert með peninga að fara. Svo innilega fjarri sanni! Hérna kemur þetta: 

 

Svíþjóð: Svíar alltaf þreyttir, líka nývaknaðir. 

Belgía: Ekkert rafrænt, allt á pappír, háir skattar.

Holland: Allir svo hávaxnir.

Þýskaland: Bannað að þvo bílinn á sunnudögum. Nenna ekki að vinna en skrifa samt háa reikninga. 

Noregur: Vantar góðan ís í vél, góðar sundlaugar og almennilegt brauð.

Bretland: Bretar ekki nógu lausnamiðaðir, of kurteisir.

Skotland: Bretar svo móðgunargjarnir, koma engu í verk.

Austurríki: Íbúar skilja ekki kaldhæðni.

Kanada: Tveir veikindadagar á ári, allt svo dýrt, engin stéttarfélög.

Austur-Afríka: Helgin hefst á fimmtudegi, vinnuvikan á sunnudegi, eins og maður tapi degi ... Skilja ekki kaldhæðni, skortir allt tímaskyn.

Danmörk: Allt svo skipulagt fram í tímann, talað í vikum (Hentar þér að koma í heimsókn í viku 35?), mikil reglufesta.

Ástralía: Silagangur í öllu, ógeðslegar flugur.

USA, New York: Sorpmálin.

Spánn: Bankakerfið, pappírsflóð í stað tölvupósta.

- - - - - - - - - - - - - - -

Svo fann ég annan þráð, ekki íslenskan þó: 

Sleppið einu orði í lagi og setjið Jesús í staðinn. Það vantaði ekki hugmyndirnar:  

 

- Hit me Jesus one more time

- The real slim Jesus

- Smells like Teen Jesus

- Jesus just wants to have fun

- All you need is Jesus

- The Piano Jesus

- Me and Jesus McGee

 

Þetta fann ég líka: 

„Ég notaði Red Bull í staðinn fyrir vatn þegar ég hellti upp á í morgun. Ég var síðan á mótum Miklubrautar og Grensásvegar þegar ég uppgötvaði að ég hafði gleymt bílnum heima!“ 

Afmælisbörn, risalampinn og óviðeigandi tónlist

Afmælisdagurinn hennar mömmu er í dag, hún hefði orðið níræð. Vantaði bara tæp tvö ár upp á. Það er langlífi í ættinni okkar en mér virtist mamma ekkert mjög spennt fyrir því að verða mikið eldri. Henni fannst ekki taka því að fara til augnlæknis þótt slæm sjónin hamlaði henni frá því að ráða krossgátur og svo var hún löngu hætt að nenna að lesa blóðugu krimmana sem hún hafði svo gaman af. Hún þoldi vel blóð, enda hjúkrunarfræðingur ... Hadda tvíburasystir mömmu dó nokkrum árum á undan henni, fæddist líka ögn á undan, þær voru gjörólíkar í útliti, enda tvíeggja. Hjördís og Bryndís, og þegar Sissa vinkona þeirra slóst í hópinn voru þær alltaf kallaðar þríburarnir. Mammma ólst upp í miðborginni, á Laugaveginum, beint á móti Stjörnubíói, og þegar komu nýjar myndir í bíó, fóru þríburarnir stundum í bíó kl. 3, 5, 7 og 9, segir sagan. Eitthvað sem mamma var ófús að viðurkenna þegar við systkinin vildum fá að fara í bíó mörgum árum síðar. Ég man að hún fékk reiðhjól í fermingargjöf og amma fór upp í sveit til að redda rjóma til að hægt væri að bjóða upp á almennilegt bakkelsi í veislunni. Þetta var í kreppunni eftir seinni heimstyrjöldina.

  

Annað afmælisbarn dagsins hefði orðið 65 ára í dag, elskan hann Tommi bílstjóri sem dó langt fyrir aldur fram. Hann var afskaplega fyndinn og skemmtilegur, með sérlega góðan tónlistarsmekk og mikill sögumaður sem kunni að að ýkja til að gera sögurnar enn meira krassandi. Ég þurfti stundum að taka fyrir eyrun ...

 

Lampinn sem ég keypti í IKEA er svo voldugur og svakalegur (keypti hann vegna litarins) að hann myndi henta í einhverja risaskrifstofu með mjög hátt til lofts og vítt til veggja, á skrifborði sem hentar fimm manns eða einum forstjóra. Okkur skildist að það fylgdi eilífðarpera en svo var alls ekki, það er perustæði og þar segir Max 13W sem er nú bara kínverska í mínum eyrum. Ég missti tvisvar skrúfu þegar ég var að setja hann saman (ég hata ósamsetta hluti, hvernig átti mig að gruna?) en þrátt fyrir að hafa ekki arnarsjón fann ég þær báðar, sjúkk. Ég gat ekki sett skrímslið í minnsta herbergi himnaríkis, heldur færði til fallegan lampa sem þarf bara að snerta til að kvikni eða slökkni á honum, fellur án efa vel í kramið þótt hann sé bara silfurlitaður.

Svona er nú vont stundum að vera hætt að reykja, og hafa ekki kveikjara í vasanum til viðmiðunar - allt svo stórt í IKEA svo lampinn virtist alveg mátulegur. Rautt hættuljós kviknaði ekki þótt hann væri svakalega þungur. Einu sinni keypti ég tungusófa í Jysk, lítinn og sætan en svo varð hann næstum því skrímsli í stofunni heima hjá mér, eða þar til eftir breytingar þar sem hann passar bara ágætlega núna, en mætti ekki vera mikið stærri samt. Svo villandi og ég dett oft í pyttinn og kaupi of stórt.

 

Nú stendur yfir fótboltaleikurinn LIV - TOT, en flest í fjölskyldu minni halda með Liverpool. Sonur minn hélt með Tottenham. Aðallega út af Harry Kane en nú er Kane horfinn á braut svo ég er hætt að halda með bæði LIV og TOT. Áfram Liverpool, segi ég núna. Svo held ég líka með West Ham og ekki síst eftir að Dagný frænka, barnabarn Höddu, tvíburasystur mömmu, fór að spila með þeim.

 

Fréttir af Facebook

Á einhverri erlendu síðunni kom spurningin: Hvaða tónlist er mest óviðeigandi að spila við útfarir?

Ekki stóð á svörunum:

Hit me baby one more time 

It´s my life

Return to sender

Another one bites the dust

The witch is dead

I will survive

Congratulations

Going Underground

Highway to Hell

They are coming to take me away, aha

Staying Alive

og

Heat of the moment 

Light my fire 

 

Hérlendis myndum við byrja á: Komdu og skoðaðu í kistuna mína, og það eru án efa fleiri íslensk lög sem kæmust í þennan hóp þótt ég muni ekki eftir neinum akkúrat núna.

 

Í hópi ættingja sagði ég eitt sinn að ég myndi helst vilja lagið Hel með Skálmöld og Sinfó sem útgöngusálm í minni útför, svo fólk gæti dillað sér á leiðinni í brauðterturnar í erfidrykkjunni. Megrandi, hollt og gott. Þau tóku reyndar ansi vel í þetta, alls ekki viðeigandi en samt svo ótrúlega flott lag. Nú er það alla vega opinberað.  

Croissant-sjokk, pítsugleði og stór misskilningur

Bæjarferð með gistingu var farin í gær með stráksa og alveg ótrúlega gaman hjá okkur. Við vorum sótt af vinkonu upp úr kl. 14 og byrjuðum reisu Guðríðar á kaffihúsi. Þekkjandi minn strák sagði ég: „Viltu ekki örugglega krossant (croissant) með súkkulaði - og kakó með eða ertu farinn að drekka kaffi? Djók!“ Hann samþykkti uppástungu mína. Vinkonan fékk sér voða fína samloku með bræddum osti utan á, heitir einhverju frönsku fínu nafni, og þegar stráksi pantaði sér krossant, heyrði hún bara fína franska heitið og útbjó því tvær þannig ostasamlokur. Meðvirka ég vorkenndi afgreiðslukonunni sem ruglaði svona í pöntuninni, sagði henni að það væri allt í lagi og borðaði aukalega ostabrauðið sem ég var hvort eð er búin að borga fyrir, ásamt einhverri hálfri samloku sem ég hafði pantað fyrir mig. Hafði hvorki borðað morgunmat né hádegisverð, bara einn kaffibolla, svo þetta slapp. Allt of lítill mjúkur kanilsnúður með kremi hafði líka verið pantaður og eina sérbeiðnin var að hita hann ekki. Honum ætluðum við vinkonur að skipta á milli okkar ... jú, jú, en hann kom en ekki með kremi. Pöntunin var: Tveir latte, einn kakó, mjúkur kanilsnúður með kremi, hálf samloka, krossant og ostasamloka á rúmlega 8 þúsund krónur. Vá, hvað er orðið dýrt að fara á kaffihús! hugsaði ég.

Stráksi fékk sjokk þegar ekkert krossant kom, þrátt fyrir að ég hafi leiðrétt ruglið. „En þú sagðir Cro-blablabla,“ sagði afgreiðslukonan. „Nei, við pöntuðum krossant með súkkulaði,“ sagði ég vingjarnlega og var almennileg (meðvirk), sagði þetta væri allt í lagi, og líka þegar kremið vantaði á kanilsnúðinn en því var svo úðað yfir þá og það lak um allt ...  

Með krossantinu sem ég þurfti að borga fyrir sér, fór þetta upp í rúmlega 9.000 kr. sem er of mikið þótt við höfum verið þrjú. Hefði ég ráðið einhverju þarna, hefði ég beðist afsökunar og ekki rukkað fyrir krossantið.

 

Ögn seinna, á leið í heimsókn til einnar af ótalmörgum systrum mínum (sem er nýflutt á milli póstnúmera í bænum) stoppuðum við í Góða hirðinum til að kaupa náttborð fyrir drengsann minn. Eitt alveg ágætt fannst á 2.500 kall - ég forðast allt sem þarf að setja saman svo þetta var bara sjálfsbjargarviðleitni. Svo heppin að fá far heim daginn eftir, og þurfti ekki að taka það með í strætó, veit að stráksi hefði aðstoðað mig við að halda á því upp í himnaríki. Vinkonan fríkaði svo algjörlega út í Góða, keypti allt jólaskraut sem hún fann (það flottasta) og fékk það ráð frá indælli afgreiðslukonu að koma næst skömmu eftir jólin, því þá væri allt troðfullt af jólaskrauti. Sumt fólk gleymir því kannski að það koma jól á hverju ári?

Nýja íbúð systurinnar er svakalega flott, hún flutti í 108 sama dag og stráksi flutti frá mér, og hún er búin að koma sér ótrúlega vel fyrir með heimilisvarðkettinum fagra. Útsýni hennar, sem er yfir eitthvað grænt (tré, gróður), gleður hana mjög og það ríkir mikil sæla með fallegu íbúðina. Kisa hefur nánast malað stöðugt síðan þær fluttu svo það er greinilega góður andi þarna. Kannski búálfur í forstofuskápnum, stakk stráksi upp á. Við erum hrifin af álfum.

 

Vinkonan nennti alls ekki heim eftir heimsóknina, enda með svona dásamlega farþega í bílnum, og stakk upp á því að við fengjum okkur pítsu, sagðist hafa heyrt góða hluti um Pizza 107 við Hagamel. Ég er komin svo út úr öllu (veitingastöðum, börum) eftir næstum tveggja áratuga búsetu á Skaganum mínum, að ég bara hlýddi. Það var aldeilis góð ákvörðun því þarna fengust ótrúlega góðar pítsur. Ostapítsan mín var með þremur tegundum af osti, svo sultu yfir, óhemjugóð, stráksi fékk sér með ýmsu NEMA jalapeno og vinkonan setti stúlknamet í hryllingi ... piparostur (namm) og DÖÐLUR! Jæks.

 

Hjón með barn á unglingsaldri, utanbæjarfólk, kom í ljós ögn síðar, sat á borði við hliðina á okkur. Þau spurðu okkur, eða konan, hvort við vissum hvar í Vesturbænum braggarnir hefði verið. Ég ákvað að móðgast hrottalega: „Fyrirgefið, en hvað haldið þér eiginlega að ég sé gömul?“ Svo áttaði hún sig á því að þetta var bara lélegur húmor. Ég játaði fyrir henni að ég væri vissulega eldgömul miðað við margt yngra fólk, en því miður vissi ég (myndi ég) skammarlega lítið um bragga. Reyndar man ég eftir bröggunum í Hvalfirði (alin upp á Skaganum) og fékk að gista í einum slíkum þar sem vinafólk mömmu bjó (alla vega á sumrin) og fannst það mjög spennandi. En veit allt of lítið um þá í Reykjavík, það héngu nefnilega gamlar myndir uppi á vegg þarna á pítsustaðnum sem orsakaði forvitni fólksins.

 

Misskilingur kattanna

Við gistum hjá Hildu sem fór síðan með mig í Ikea í dag til að kaupa lampa í herbergið sem er óðum að taka á sig mynd. Já, og skutlaði mér heim! Rúmið er lítið þótt það sé nú alveg 90-200 cm og náttborðið gerir heilmikið fyrir herbergið og líka lampinn nýi sem ég keypti. Ég þvoði auðvitað gardínurnar og lagði þær svo á rúm drengsa til að þær héldust sléttar áður en ég setti þær upp, fyrst þurfti ég að fara í bæinn ... ég lokaði dyrunum þegar ég fór í gær ... og eftir að ég kom heim í dag hefur verið opið. Mögulega halda kettirnir að þetta sé nýja bælið þeirra því þeir lágu þar (ofan á gardínunum) einstaklega makindalegir, allir saman þegar ég ætlaði að fara að setja upp gardínurnar. Maður truflar ekki ketti í slökun. Mögulega þarf ég að þvo annan vænginn aftur en sjáum til. Verst er samt að himnaríki er á hvolfi. Gjörsamlega í rúst. Eins gott að enginn komi að skoða fyrr en ég er búin að taka til. Hvernig er hægt að rústa heilli íbúð með því að gera eitt lítið herbergi fínt? Látið mig vita ef þið viljið uppskriftina ...

 

Á morgun kemur Týnda systirin út á Storytel. Sjöunda bókin um systurnar sjö eftir Lucindu Riley. Álfrún Örnólfsdóttir les þessar bækur afskaplega vel - og sennilega verður himnaríki orðið virkilega flott og fínt ef ég gæti þess að hlusta á meðan ég reyni að fínisera og "flottheita" öll herbergin. Ég er mjög hrifin af þessum bókum, sú síðasta var kannski síst, slæmt val í ástum aðalpersónunnar hafði áhrifa á þá skoðun mína. Þoli ekki þegar konur og karlar halda að þau þurfi að breyta sér og persónuleika sínum til að falla öðrum í geð. Ég man eftir mjög flottri konu sem fór á námskeið hjá einhverjum erlendum gúrú. Hann skipaði henni að þegja í viku, hún talaði allt of mikið. Ég sá rautt ... þekki viðkomandi ekki en veit hver hún er og hún talaði ekki of mikið, hún var bara hún sjálf, mjög skemmtilegur karakter - en hélt eflaust að gúrú-fíflið væri að ráða henni heilt. Það eru mörg ár síðan, vonandi náði konan að verða hún sjálf aftur. 

 

Við Hilda erum vanar að skreppa í nokkurra daga ferðalag út á land á sumrin. Þegar allt var í volli vegna skorts á erlendum ferðamönnum í covid-ástandinu, gistum við á Hótel KEA (ágætt verð), en splæstum þó bara tveimur nóttum á okkur. Nýlega fór Hilda að tékka á nýjum landsfjórðungi og á gistiheimilum en það var allt svo hrikalega dýrt að við hættum við. Held að tvö herbergi í fjórar nætur hafi á einum stað kostað 800 þúsund. Annað sem hún fann var að vísu töluvert ódýrara en samt nógu dýrt. Áður en hún fór að kíkja mundi ég eftir að gúgla aðalatriðið annað hvert ár ... eða EM/HM Í FÓTBOLTA! 

EM stendur yfir 14. júní-14. júlí nú í sumar og ég ætla ekki (enn einu sinni) að uppgötva á leiðinni í ferðalag, eins og t.d. til Stykkishólms 2018, að HM væri að hefjast akkúrat kl. 16 eða 17 þann dag og við höfðum ekki hugmynd um hvort væri sjónvarp á staðnum! Það reyndist vera sæmilegt sjónvarp þarna en útigrillið var ónýtt ... þannig að þegar "stórasta" systirin mætti í heimsókn með grillkjöt varð að steikja það á pönnu ... sem var nú samt allt í lagi. Neðri kojan sem ég svaf í var svo hræðileg að það brakaði í henni við hvern andardrátt minn og stráksi í efri kojunni svaf mjög létt ... En hva, kannski skreppum við í dagsferðir, t.d. til Grundarfjarðar og smökkum góða kólumbíukaffið þar.         

Hefnd litlu systur og stórhættuleg Meta-gervigreindin

Seinni pakkinn frá Eldum rétt var eldaður áðan og elskan hún Inga neydd til að koma í mat, enda pakkarnir ætlaðir tveimur. Hún kom reyndar alveg sjálfviljug, borðaði nokkuð sterkan tagliatelle-rétt og sagði mér hryllingssögur úr Mall of America, þeim sataníska stað, sem hún neyddist til að fara á fyrir mörgum árum til að kaupa eitthvað sem einn afkomandann vantaði sárlega. Hún var þeirri stund fegnust þegar hún slapp út með eitthvað í poka. Þegar við Hilda skruppum ásamt nokkrum viðhengjum okkar til Orlando (Sjá allt um ævintýri Sjömenninganna í Karíbahafi (sjá mynd af vettvangi, Cozumel í Mexíkó, á leið í dolluna) í virtum fjölmiðlum í desember 2018), gistum við á hóteli með Florida Mall á neðri hæðinni. Svo vel vildi til að yfirleitt var ekki þörf á því að fara nema rétt fram hjá lobbíinu og fara ganginn að mollinu því þar er kaffihús, jólabúð (jólakúlan með mynd af Trump fékkst þar), veitingastaðurinn þar sem Junior, vinur okkar, var að vinna ... og pínkulítil sjoppa sem selur vatn, gos, bjór, tóbak, flensupillur og ávexti, svo fátt sé nefnt.

Vissulega hittum við þarna ýmsar dásemdir alveg óvænt, í mollinu sko, eins og mann sem vann með mér í Ísfélaginu í Eyjum fyrir löngu, annan sem er elsti sonur tvíburasystur mömmu og við sjáum hann allt of sjaldan, eins og aðra ættingja, en það eru alltaf fagnaðarfundir samt.

 

Frábæru karlarnir komu með rúmið upp úr kl. 18, skrúfuðu fyrst festingu undir (sem var óvænt) og svo rúmlappirnar. Afar kvenlegur hamar sem ég fékk í jólagjöf eitt árið fyrir löngu, með tvenns konar innbyggðum skrúfjárnum í skaftinu virkaði ansi hreint vel, alla vega hamarinn, en ég þurfti að heimsækja einn nágrannann og sníkja stjörnuskrúfjárn. Það var minnsta mál, hann rétti mér veglegt skrúfjárnasafn heimilisins og rúmkarlarnir urðu afskaplega glaðir og verkið gekk miklu hraðar eftir þetta. Rúmið er ansi hreint létt en samt ekkert drasl, fínt fyrir unglingsstrák og suddalega æðislega gott að hafa það létt þegar þarf að flytja það milli sveitarfélaga. Herbergið er orðið súperfínt ... sjá mynd.

Mynd: Rúmið frá Jysk var kannski ódýrt og létt en rúmfötin breyta því í konunglegan bedda, glæsileg sængurfötin njóta sín vel og einnig skiptir lýsingin talsvert miklu máli. Mottuna á gólfinu heklaði ég á mettíma, átta tímum, ljósakrónan fékkst í antíkskúrnum við Heiðarbraut, stóllinn í Húsgagnahöllinni. Ég vona innilega að drengurinn kunni að meta litina í teppinu og herbergið almennt. Ég gerði mitt besta, ekki hægt að krefjast meira af mér.

 

Þegar ég skrapp í bæinn á þriðjudaginn sótti Hilda systir mig. Ég hef oftar en einu sinni vælt og skælt yfir skorti hennar á rokkhjarta og spilun hennar á vissum geisladiski (Vinsælustu lög Íslandssögunnar-eitthvað) og ég hafi heyrt Heyr mína bæn svona 300 sinnum á ferðalagi okkar austur að Höfn og til baka. Var það ekki fyrra? „Blessuð og sæl,“ sagði hún ansi hreint vingjarnlega miðað við illskuna sem hún var í þann veginn að beita mig, skömmu eftir að ég inn í bílinn. Þegar ég var að spenna á mig beltin, sem betur fer búin, ýtti hún á takka í mælaborðinu og hækkaði í botn ... Heyr mína bæn drundi í eyrum mínum svo hljóðhimnurnar engdust, tónlistin heyrðist yfir allt bílastæðið Breiðholtsmegin í Mjóddinni og fólk kom hlaupandi frá stæðunum Kópavogsmegin líka, gjörsamlega í losti. Þetta heitir að kunna að hefna sín. Veit samt ekki hvað vesalings fólkið í Mjódd hafði gert henni ...  

 

Fréttir af Facebook

2. maí 2009:

„Sá í fréttum Stöðvar 2 að David Lynch leikstjóri drakk latte frá kaffitári, eins og ég geri annað slagið.“ Ykkar einlæg.

 

Mér finnst ég stundum svo alþjóðleg, veraldarvön, veit ekki hvaða orð lýstir þessu best. Drekk víst stundum sama kaffi og heimsfrægur leikstjóri, eins og kemur fram hér ofar. Fékk ókunnan mann á rúmstokkinn sama ár og Elísabet heitin Englandsdrottning lenti í því sama. Ég elska Skálmöld - alveg eins og Guðni forseti. Finn fyrir miklum andlegum skyldleika við þau, og fleiri sem ég man ekki eftir í augnablikinu að ég eigi eitthvað sameiginlegt með.

 

Ég þori reyndar ekki að hafa mig mikið í frammi á fb þessa dagana - bara í þessari viku hafa tveir eða þrír fb-vinir verið sviptir síðum sínum fyrir engar sakir. Gervigreind sér um þetta og hún er ekki sveigjanleg, eins og þegar frændi nokkur fékk aðvörun þegar hann gerði grín að nýnasi..um og var svo látinn fjúka endanlega þegar hann sagði við eitt afmælisbarn dagsins orðið heillin. Fyrstu fjórir stafirnir í því orði sýndu einfaldlega að frændi væri óforbetranlegur.

Til að milda gervigreindina set ég reglulega inn krúttlegar myndir af kisunum mínum. Það virðist virka. Ég passa mig að læka ekki of mikið hjá fólki, ég set vissulega alltaf hlekk á blogg dagsins inn á fb en kannski þóknast Metu það ekki til lengdar. Fólk missir þarna minningar, mögulega myndir en mér skilst að hægt sé að endurheimta þær í einhverjum tilfellum. Svo missa sumir síður sínar í klær svindlara ... fékk kveðju frá gamalli vinkonu nýlega og svaraði strax með spurningu um hvernig henni liði í nýja landinu. Fékk ekkert svar, heldur hvarf síðan hennar. Nema þetta sé nýjasta nýtt til að slíta fb-vináttu á dramatískan hátt. Hvet fólk sem lendir í þessu að gúgla hvernig eigi að endurheimta síðu sína, sumir ná að gera það, aðrir ekki.  

Hættuleg áróðurssíða, fríkað út og ástarsögumeiningar

Mótmælaganga var ekki gengin í dag, enda vinn ég hjá sjálfri mér og fékk ekki frí. Var mun duglegri við að mæta í slíkar göngur í gamla daga. Nú virðist úr mér allt bit. Áður fyrr, þegar aðalsamkomustaðurinn var bókasafnið eða stúkuhúsið, voru svona göngur hin besta skemmtun. Hreyfing, lúðrablástur og fjör. Sumardagurinn fyrsti var mun kaldari í minningunni en 17. júní bestur. Þetta dekkaði apríl, maí og júní. Ef ekki hefði verið fyrir jól, páska og bolludaginn ...

 

Mynd: 

Við Bogga vinkona göngum þarna hlið við hlið, beint fyrir aftan Gunnhildi (sem er fremst með með loðkragann). Létum svona skemmtun ekki fram hjá okkur fara. Við kynntumst í kringum fimm ára aldurinn í Nýju blokkinni þar sem við bjuggum báðar, og vinátta okkar hefur staðið óslitið í minnst fjörutíu ár plús ... Man eftir okkur dansa við Led Zeppelin III sem Siggi stóri bróðir hennar átti en þá gæti ég svo sem hafa verið flutt í Arnarholtið (bak við Einarsbúð) og verið í heimsókn, þá hef ég mögulega verið í kringum 11 ára og farin að meta þungarokk. 

 

Keypti tvo pakka af Eldum rétt-mat fyrir tvo sem komu stundvíslega eftir hádegi á mánudaginn. Veit ekki hvaða lufsugangur þetta er, en ég eldaði fyrri réttinn núna fyrst í kvöld, voða fínar kjúklingabringur sem klárast svo í hádeginu á morgun. Hinn rétturinn þarf að eldast á morgun því það er Rvíkurferð í kortunum um helgina, með sjálfum stráksa sem fær svo sannarlega ekki að segja sig úr fjölskyldunni þótt  hann hafi flutt. Ætli verði ekki pantað að kaupa KFC og aka Álfhólsveginn sem er uppáhaldsgatan hans í öllum heiminum, enda segir heitið allt um aðaláhugamálið, stráksi er þjóðlegur mjög, nema þegar kemur að sviðum, sem eru ekki uppáhaldsmaturinn okkar.

Yfirleitt eru karlar vitlausir í mig en andstyggð mín á sviðum hefur haft mikinn fælingarmátt. Úff, þessi hættulega áróðurssíða þarna á Facebook, Gamaldags íslenskur matur, hefur án efa eyðilagt allan séns fyrir mér. Réttast væri að tilkynna þennan boðskap um siginn fisk, gellur, skötu og slíkt, því eigendur Meta myndu án efa líta á þetta flest sem efnavopn. Ég var svo heppin að vera alltaf með svona hrylling vakúmpakkaðan þegar Elfa vinkona skældi út úr mér að koma með hákarl og hval til hennar í Ammríkunni. Hangikjötið var fínt og ég mátti alltaf koma með það til landsins, sagði bara LAMB ... en þau sem reyndu að taka hamborgarhrygg með sér westur voru iðulega stoppuð í því. Nú held ég að ekkert kjöt sé leyfilegt þangað.

 

„Á ekkert að fara að mála húsið þitt?“ spurði góð kona sem skutlaði mér heim úr stuttri heimsókn í dag.

„Jú, en fyrst ætlum við að klára eitthvað pípara-dæmi, einhver rör sem er verið að mynda, og ef þarf að gera við, verður það gert. Svo verður ábyggilega farið í utanhússfegrunaraðgerð.“

„Það gæti haft áhrif á söluna á himnaríki að húsið þarfnist málningar,“ sagði hún. Meinti eflaust að fólk héldi að ef það keypti himnaríki, biði þess einhver meiriháttar fjárútlát, en svo er auðvitað ekki. Járnið er meira og minna heilt en ljótt, þess vegna höfum við látið annað ganga fyrir. 

„Við eigum sko margar, margar milljónir í sjóðum,“ montaði ég mig, „það vildu allir klára gluggana fyrst sem nú er nánast búið, svo er verið að kíkja á rörin og þar á eftir, nú í sumar, verður eflaust málað,“ sagði ég.

 

Rúmið sem ég keypti í Jysk kemur á morgun, einnig fæ ég aðstoð á morgun við að gera herbergi drengsa suddalega flott. Vona bara að hann verði ánægður. Líklega kemur hann strax eftir helgi.

Ég hef sem sagt bara laugardagskvöldið til að fríka ærlega út. Hvernig fríkar maður út? Tillögur óskast. Góður kaffibolli og spennandi hljóðbók hljómar ekkert illa en bókin sem ég er að hlusta á núna ætti að vera algjör hvalreki fyrir þau sem lesa hjá Storytel - eða um ástir og örlög tveggja lesara hljóðbóka. Hún heitir Takk fyrir að hlusta og er só far alltílæ ... nema þar er talað um erótískar bækur (50 gráir skuggar-bækur) sem ástarsögur sem er algjör misskilningur. Í flestum ástarsögum er ekki farið svo mörgum orðum um ... þið vitið. Þær bækur gerast til dæmis í bakaríum við ströndina í hálöndunum þar sem rúntar er um í bókabílum. Siðprúðar ástarsögur. Hinar heita einfaldlega erótískar bækur, held ég. 

 

Í þessari sem ég er að hlusta á er afskaplega mikið talað um hreim hjá sögupersónum, persónueinkenni og slíkt sem hræðir mig mjög frá því að hlusta á amrískar hljóðbækur, nema Takk fyrir að hlusta sé skáldskapur (djók). Hún er bjálæðislega vel lesin og lesari súpergóð leikkona sem getur sennilega ekki annað en leiklesið ... sem er algjörlega óþolandi til dæmis þegar eldgömlu konurnar eru að tala (gagga). En sú sem les getur samt varla annað en leiklesið bók sem fjallar um mikilvægi þess að leiklesa bækur, eiginlega ... ég ætla að reyna að gefast ekki upp ... Hef hlustað á bækur með þessari leikkonu og hún kann að lesa fyrir fólk, án þess að fara út í leikræna þjáningu. Eitt er að hlusta á hljóðbók og geta jafnvel sofnað út frá henni, annað er útvarpsleikrit sem krefst þess að maður haldi einbeitingu allan tímann. Ég ætlaði eitt sinn að prófa að hlusta á bók um Jack Reacher (eftir Lee Child) á ensku en gafst upp eftirörfáar setningar. Það var greinilega Marlboro-maðurinn sem las með murrandi, rifnum hljóðum sem áttu að vera svoooo karlmannleg í takt við Jack Reacher sem er auðvitað óbærilega flottur (í þáttunum á Amazon Prime). En hann talar ekki með svona röddu, hann er bara venjulegur.

Mynd af alvöruástarsögu, í þeirri merkingu sem flestir leggja í ástarsögur. Barbra Cartland var sannarlega siðprúður rithöfundur, og fólk hoppaði ekki saman í rúmið nema vera harðgift hvort öðru. Í eina skiptið sem hún hliðraði aðeins til með það, vissi konan að hann væri maðurinn hennar, en maðurinn þekkti ekki hlassið sem hann hafði gifst, enda hafði hún fallið í ómegin strax eftir brúðkaupið og legið í kóma í marga mánuði, eða þar til hún hafði náð kjörþyngd. Hún einsetti sér að ná ástum hans sem tókst, henni tókst meira að segja að vera á undan honum til herragarðsins þar sem hún bjó, en hann var svo mikill heiðursmaður að hann fór þangað til að biðja eiginkonuna um skilnað, sem var fáheyrt á þessum tímum, til að kvænast þessari fögru dásemd sem hann hafði sofið hjá ... þið skiljið, ég hef pottþétt skrifað um þessa bók ... man samt ekki hvað hún heitir.