Prófæler morðingjans og mögulegt einelti vegna ættarnafns...

Hrafn Jökulsson skrifaði athyglisverða færslu á bloggsíðu sinni um „konurnar sem máttu hverfa“, eða fórnarlömb Green River Killer. Ég tengist þessu máli vitanlega ekki á nokkurn hátt en ég kynntist aðeins manni sem gerði það óbeint og fannst svolítið eins og ég væri komin í þáttinn Illt blóð. Ja, eða þannig.

Snemma árs 2002, var ég í heimsókn hjá íslenskri vinkonu sem bjó í litlum, sætum bæ nálægt Seattle. Hún og maður hennar fóru einu sinni í viku á hverfispöbbinn sinn og ég náði að fara tvisvar með þeim. Þarna hittu þau góða vini sem ég var að kynnt fyrir. Einn pöbbvinanna er sálfræðingur sem kom vikulega frá Seattle til að sálfræðingast í litla bænum. Hann vann með lögreglunni í Seattle og hafði verið fenginn til að gera sálfræðimat á fjöldamorðingjanum sem leitað var svo ákaft að. Mig minnir að hann hafi lýst manninum m.a. sem kirkjuræknum fjölskylduföður sem reyndist smellpassa við svínabóndann. 

Vinkona mín gaf mér pappíra um þetta mál en ég var að hugsa um að skrifa grein um það sem ekki reyndist síðan áhugi fyrir þegar ég kom heim. Enda hvaða almennilega kona vill lesa blóði drifna sögu fjöldamorðingja? Well, ég! Nú langar mig að finna þessi skjöl og myndirnar frá pöbbnum.

Þarna á pöbbnum var annar maður sem vinkona mín vildi „sérstaklega“ kynna mig fyrir, enda á lausu eins og ég. Ég er bara svo svakalega skynsöm, hunsaði þetta og vildi ekkert af því vita. Ég vissi sem var að vinir og vandamenn myndu deyja úr hláti ef ég giftist honum og nafn mitt breyttist í Guðríður Mattrass! Anna heitin frænka mín sá kílómetrum lengra en nef hennar náði sagði við mig þegar ég var 18 ára að ég myndi giftast manni með ættarnafn. Við hina hlið mína sat maðurinn sem síðar varð fyrrverandi eiginmaður minn, enda auðvitað ekki með ættarnafn. Ég hef beðið róleg eftir Thorsurum, Skrömurum eða  jafnvel Grimaldi-um ... en þetta var bara tú möts!!!

Athugasemdir

[Heimir Lárusson Fjeldsted, 23.1.2007 kl. 12:28]

Finndu nú pappírana og myndirnar af kránni og birtu okkur svo opinberlega.

Skilaði kveðjunni og í Kjötborg og tók við annari samstundis sem ég sendi þér nú.

[Guðríður Hrefna Haraldsdóttir, 23.1.2007 kl. 12:30]

Geri það, sir! Heimsótti Kjötborg á Þorláksmessu þegar ég var í bæjarferð en þú varst því miður fjarri góðu gamni.

[Hrafn Jökulsson, 23.1.2007 kl. 12:39]

Lítill heimur. Bíð spenntur eftir frekari upplýsingum! Besta kveðjan.

[Margrét Ingibjörg Lindquist, 23.1.2007 kl. 13:42]

Spennandi... fáum við að heyra  meira..??

[Guðríður Hrefna Haraldsdóttir, 23.1.2007 kl. 13:43]

Leggst í leit um helgina! Held að ég hafi verið nokkuð ódugleg við að fleygja dóti þegar ég flutti.

[kikka (IP-tala skráð) 23.1.2007 kl. 13:53]

Ji, þú ert svo internasjonal. Bíð eftir greininni. Gæti heitið (í anda Vikunnar): Grenntist um 18 kíló á því að eta eintómt svínakjöt...

[Anna (www.blog.central.is/annabjo) (IP-tala skráð) 23.1.2007 kl. 14:13]

Hvað er þetta með kirkjurækna fjöldamorðingja. Edda vinkona mín sem giftist til smábæjar í Noregi var í kirkjukór með fjöldamorðingjanum sem drap fullt af gamalmennum á elliheimili.

[Ólafur fannberg, 23.1.2007 kl. 15:27]

kvitt

[Guðríður Hrefna Haraldsdóttir, 23.1.2007 kl. 15:34]

Já, Kikka, svona mannakjötsmegrun ... hehehe, skamm!

Ég veit ekki, Anna, hvað er í gangi með þessa gaura, ætti að spyrja sálfræðinginn í Seattle ef ég hitti hann einhvern tíma aftur.  

[Katrín Snæhólm Baldursdóttir, 23.1.2007 kl. 17:13]

Guðríður sefur þú alveg rótt umnætur?

Þú hefur lent í svo mörgu spennandi og lesið svo margar spennandi bækur og horft á svo spennandi myndir. Ég fer að kíkja bráðum á efni bannað innan 16. Jafnvel 18 til að fá fútt í líf mitt.

[Gurrí (IP-tala skráð) 23.1.2007 kl. 17:27]

Frú Katrín. Ég sef rótt og vel ekkert nema krúttlegheit þegar ég get. Eitt sumarið þegar erfðaprinsinn fór í sveit ákvað ég að taka spólu og fyrir valinu varð: Home Alone I. Ég elska t.d. myndir á borð við Lassímyndir ... en ókei, mér finnst líka gaman að horfa á geðveika spennu um raðmorðingja og svona ... en þó þurfa þær að hafa smá vit! Skemmi ekki sálina með Föstudeginum 13. eða slíku bulli. 

Maður verður líklega ónæmur fyrir ofbeldinu með tímanum, það gæti svo sem verið. Vertu ekkert að æsa þig við að horfa á eitthvað spennandi, lestu bara bloggið mitt ... hehehehehe