Smitandi sagnorðasukk og sjúkir sjónvarpssálfræðingar

Ég er að breytast í nöldurskjóðu dauðans. Ég tala ekki fullkomna íslensku, frekar en flestir, en er samt ótrúlega pirruð yfir nýja/nýlega tungumálinu sem ég samþykki ekki að flokkist sem tungumál í þróun. Við höfum oft kallað þetta íþróttamállýsku eða sagnorðasukk. Dæmi: „Hann er að aka vel.“

Mér finnst Stöð 2 verri en Sjónvarpið og mætti málfarsráðunautur hennar taka nokkra aðila í gegn. Enn hef ég ekki heyrt þetta í fréttunum, bara hjá viðmælendum, enda er líklega farið yfir málfarið áður en fréttir eru lesnar.

Viðmælendur af öllum gerðum, meira að segja ráðherrar, taka svona til orða.

Skömmu áður en ég sýktist sjálf alvarlega af þessu skrapp ein samstarfskona mín á Kaffi París. Eftir máltíðina fór hún að afgreiðsluborðinu til að borga. Afgreiðslumaðurinn sagði við hana: „Hvar voruð þið að sitja?“ HVAR VORUÐ ÞIÐ AÐ SITJA! Þegar hún sagði okkur frá þessu vaknaði ég til vitundar um þetta og ákvað samstundis að hrista þennan hryllilega, bráðsmitandi sjúkdóm af mér en hann er ekkert skárri en þágufallssýki.

Stöð 2 í kvöld:  

Íþróttir: Allt landsliðið var að leika vel ... í stað Allt landsliðið lék vel!
Veður: „Ég er að gera ráð fyrir að ...“ í stað „Ég geri ráð fyrir að ...“
„Lægðin er lítið að hafa áhrif á landið ...“

Allir veðurfræðingarnir (eru að) tala svona, mismikið þó. Þeir gera ekki lengur ráð fyrir neinu, heldur eru þeir að gera ráð fyrir öllu.

 Annað ... smitandi heilaæxli?

Það virðist vera sem heilaæxli séu að ganga meðal sálfræðinga í spennuþáttum í sjónvarpinu. Í Illu blóði grét samstarfskonan við fréttina um þetta en í miðlaþættinum á miðvikudögum veit Allison miðill ekki að sálfræðingurinn hennar, eða sá sem er að skrifa bók um hana, er með banvænt heilaæxli.

Hmmm, ætti ekki góður miðill að vita þetta?

  

Athugasemdir

[Ólafur fannberg, 24.1.2007 kl. 08:12]

kvittkvitt

[Kennarinn (IP-tala skráð) 24.1.2007 kl. 21:13]

Takk fyrir að vekja máls á þessu nýja málfari hjá þjóðinni. („Hvar voruð þið að sitja?“)  - Annað hvort er að málfarsráðunauturinn hjá RÚV er ekki hótinu betri eða þá að búið er að leggja stöðu ráunautarins niður.  - -    Þetta svokallaða fjölmiðlafólk sem sloppið er sumt gegnum æðri menntastofnanir án þess að kunna að lesa eða skrifa stjórnar nú orðið hvernig hlustendur tala.  - - Sennilega eru þeir bestir sem ekki segja meira en til nafns og tiltölulega skammlaust hvað klukkan er á milli laga. 

Förum í stríð við alla málníðinga.  

[Guðríður Hrefna Haraldsdóttir, 24.1.2007 kl. 21:17]

Gefumst ekki upp! Það hlýtur að vera erfitt að vera kennari þessi misserin! Þegar ráðherrar og hátt sett fólk heyrist tala svona í sjónvarpi er ekkert skrýtið þótt unglingar lepji þetta upp. Takk fyrir komuna!