Samsæri álrisanna og Hansaplast-mafíunnar?

7.2.2007 | 13:50

Samsæri álrisanna og Hansaplast-mafíunnar?

Ég skar mig á þumalfingursbroddi á hurðarhúni í vinnunni í fyrradag, ekkert merkilegt, lítill, grunnur skurður á svo vondum stað að sárið opnast aftur og aftur. Auðvitað keypti ég plástur í fyrradag en hvar er gamla, góða og mjúka grisjan? Nú er bara eitthvað hart, silfurlitt sem kemur ofan á sárið og meiðir mann virkilega við snertingu. Held að þetta dragi t.d. ekki blóð inn í sig, heldur virkar eins og blóðdreifari! Ég notaði góða kremið frá Móu og það dró úr mesta sársaukanum en harði plásturinn var að drepa mig ... hér er mynd af plástrinum vonda!

Stuttu eftir að saumarnir voru teknir úr hnénu á mér eftir frægt fall á ógæfumölinni í september sl. datt ég aftur í tröppum í Kaffitári í Kringlunni, fyrsta plásturslausa daginn minn. Það kom blóð og allt og góða stúlkan sem bjó til fullkomna kaffið fyrir mig kom hlaupandi með nákvæmlega svona plástur frá helvíti og þá fyrst fann ég til. Nema það sé kvalaaukandi efni í þessum plástri („Hans, látum þau virkilega kveljast!“) Annað hvort er silfur eða ál þar sem áður var mjúk, hvít grisja og er miklu verra viðkomu en grisjan í gömlu plástrunum. Geri ráð fyrir að þetta sé komið til að vera ... en ekki lengi ef þessi bloggfærsla hittir í mark! (djók)

Ég þarf að finna alvöruplástur til að eiga, ég dett illa á u.þ.b. 40 ára fresti þannig að þurfi að sauma mig! Ef það er ekki að vera hrakfallabálkur ....

Flokkur: Bloggar | Facebook

Athugasemdir

Hvað um nýja rækjuplásturinn sem allir eru að tala um? Svo er hægt að éta hann þegar sárið er gróið.

Hlynur Þór Magnússon, 7.2.2007 kl. 14:12

Já, segðu!!! Þetta er snilld. Best að kaupa svoleiðis næst!

Guðríður Hrefna Haraldsdóttir, 7.2.2007 kl. 14:13

Jossens, bæði veikindi og slys og vondur plástur. Minnir mig á þegar tannkremið hætti að vera í "járntúbum" og kom í plasttúbum, ætlaði aldrei að geta sætt mig við það, fannst ég aldrei geta klárað almennilega úr plasttúbunum. Minnir mig líka svolítið á flugvélamat. einu sinn var hann heitur og jafnvel góður, núna er hann líka úr plasti og eins gott að borða vel áður en maður fer í flug.

kikka (IP-tala skráð) 7.2.2007 kl. 14:40

Ég mæli með Þórunnarplástrinum ef einhver grasalæknir hefur náð að rita niður uppskriftina hennar. Þórunn er nú látin og mörg herrans ár síðan! Kanski að uppskriftin komi til þín í draumi. Lítur hrottalega út að sjá þessa stálgráu fyllingu í plástrinum!!!! Vont er um bágt að binda með þessum plástri!

www.zordis.com, 7.2.2007 kl. 14:47

Þú hefðir bara átt að biðja nærstaddan kroppaling að kyssa á bágtið og sleppt öllum plástrum og kremaveseni...

Silja Dögg (IP-tala skráð) 7.2.2007 kl. 16:02

Prinsessuplástur, auðvitað. Kaupi svoleiðis næst, hef ekki trú á því að álið sé notað á sannar prinsessur!

Silja Dögg; ég bað lækninn á Heilsugæslunni hérna á Skaganum að kyssa frekar á bágtið ... en hann harðneitaði því og saumaði níu spor, ormurinn. Sigrún sveitó, bloggvinur með meiru, bjargaði mér, enda hjúkka, og ók mér á spítalann. Síðan hefur hún gengið undir nafninu Flórens!

Guðríður Hrefna Haraldsdóttir, 7.2.2007 kl. 16:22

Alveg er ég viss um að Disney-plásturinn virkar allra best. Það er a.m.k. ekki eins leiðinlegt að vera með þannig umbúið sár!

Guðrún Eggertsdóttir, 7.2.2007 kl. 16:26

Elskan mín, þú átt ekki að kaupa svona sadistíska plástra. Hvað um einn svona bara?

Virk innihaldsefni: Etinýlestradíól, Norelgestrómín,
getnaðarvörn. Verðflokkur: 0. Lyfseðilsskylt

ALMENNAR UPPLÝSINGAREvra inniheldur tvö virk efni (hormón), norelgestrómín og etinýlestradíól. Plásturinn er ætlaður konum á barneignaraldri sem getnaðarvörn. Aðalverkunarmáti lyfsins er að hindra egglos en breytingar á leghálsslími og legslímu stuðla hugsanlega að verkun lyfsins. Etinýlestradíól hefur sömu áhrif og kvenhormónið estradíól en estradíól er áhrifamest og algengast af estrógenunum. Norelgestrómín hefur sömu áhrif og kvenhormónið prógesterón.

NOTKUNVARÚÐ

Lyfjaform:
Forðaplástur á húð.

Venjulegar skammtastærðir:
Meðferð hefst á 1. degi tíðablæðinga. 1 plástur er settur á líkamann og hafður þar í 7 daga. Skipt um plástur á sama degi í hverri viku. Fjórða vikan er plástursfrí en hún byrjar á 22. degi tíðahrings. Síðan er þetta endurtekið. Fara þarf nákvæmlega eftir leiðbeiningunum til að ná hámarksvirkni.

Hversu langur tími líður uns verkun kemur fram:
Verkun er frá 1. degi ef byrjað er á 1. degi blæðinga.

Verkunartími:
Meðan plásturinn er á húðinni.

Þörf á að breyta mataræði meðan lyfið er tekið:
Engin.

Geymsla:
Geymist í lokuðum umbúðum við stofuhita þar sem börn hvorki ná til né sjá.
_____________________________