Engin fortíðarþrá

Ég steig hálf feimnislega fram úr rúminu í morgun og tiplaði léttfætt um afmælisbarnið. Ég kveikti á kaffikönnunni og horfði út um annan stofugluggann á meðan hún hitnaði. Rólegheitin eru algjör, líklega eru allir Skagamenn á nýja kaffihúsinu ... hafa farið göngutúrinn sinn þangað en ekki á Langasandinn ... það er reyndar flóð núna og ekkert pláss fyrir fólk. Stór fiskifluga, fljúgandi sushi fyrir kettina, hætti að suða fyrir fimm mínútum ... en Tommi er voða sæll á svipinn. Áttin er austlæg og litlar sem engar öldur, það gæti breyst þegar flæðir frá. Fyrstu dagana mína sat ég löngum stundum við gluggana (í stað þess að taka upp úr kössum) og naut útsýnisins. Er ekki enn orðin leið á því.  

Ég sakna stundum Hringbrautarinnar, þar sem ég bjó í 18 ár, en samt myndi ég ekki vilja flytja þangað aftur. Ég fann gamalt eintak af Húsum og híbýlum þar sem eldhúsið mitt á Hringbrautinni var heimsótt stuttu eftir að ég lét gera það upp.

Það gat verið skrýtið að eiga við iðnaðarmennina. „Ætlar þú ekki að láta mála hurðirnar?“ „Þú skiptir alla vega um hurðarhúna!“ Ég var þrjósk og vildi halda menningarverðmætum íbúðarinnar. Stúlkan sem keypti af mér í fyrra var ekki nema tvo daga að selja hana aftur ... held að upprunalegt útlitið geri hana söluvænlegri.

 

Ljúfu stelpurnar á Nýju lífi gáfu okkur sætu stelpunum á Vikunni brúnkuklúta í gær og engin meining þar að baki, bara einskær góðvild. Mér finnst fyndið að horfa á þessa dökku fegurð okkar í Vikuhorninu og bera hana saman við þá ljósu á Nýju lífi. Held að það sé ráðið eftir hárlit á blöðin. Mig minnir að þau séu öll einkar dökk á brún og brá hjá Húsum og híbýlum. Kannski rannsóknarverkefni fyrir mannfræðinga?

Kári frændi bara hættur í blaðamennsku! Við erum skyld í gegnum hinn frábæra forföður okkar, Jónas frá Hróarsdal, sem átti 33 börn, þar af 26 innan hjónabanda. Hann var hómópati og tók á móti börnum í Skagafirðinum, er meira að segja í ljósmæðratalinu!  

Jæja, ætla að skreppa í göngutúr um bloggheima og fara svo að ryksuga svo að gestir mínir í dag þurfi ekki að vaða rykið og kanínuungana (kattahár í bólstrum).  

Athugasemdir

[Sigga (IP-tala skráð) 10.2.2007 kl. 12:53]

Takk fyrir kveðjurnar og sömuleiðis til hamingju með Himnaríkis-vatnsberann! :)

[Ólafur fannberg, 10.2.2007 kl. 12:57]

helgarknús

[SigrúnSveitó, 10.2.2007 kl. 13:15]

Hamingjuóskir til afmælis"barnsins"

[Heiða B. Heiðars, 10.2.2007 kl. 13:21]

Til lukku með daginn bæðí tvö.

Eru fiskiflugur á Akranesi í febrúar eða ræktarðu sushi sérstaklega fyrir köttinn??

[Guðríður Hrefna Haraldsdóttir, 10.2.2007 kl. 13:34]

Ég hef séð fiskiflugur hérna á öllum árstímum (well, búin að búa hér í ár), held að þær vakni til lífsins í sólinni og komi sér svo inn í hitann ... og beint í kattakjaft! Þegar Davíð frændi kíkti upp á háaloft sá hann enga fjársjóði fyrri eigenda þar, bara dauðar fiskiflugur. Kannski er eitthv. eldi þar án vitundar minnar og svo smjúga þær niður þar sem leiðslur og snúrur koma niður rétt við baðdyrnar. 

[Katrín Snæhólm Baldursdóttir, 10.2.2007 kl. 13:35]

Afmælisbarn, himnaríki, öldur, kaffi ilmur og kattamal. Útsýni, flóð og fámenni. Guðríður, ég vona að þú gerir þér grein fyrir að þu lifir fullkomnu lífi. Slepptu því bara að ryksuga. Smjúts

[Guðný Anna Arnþórsdóttir, 10.2.2007 kl. 14:35]

Það er engin smá gæfa að eiga þess kost að fara inná bloggið þitt, Guðríður Himnaríkisdrottning, og upplifa það að allir brosvöðvar i andlitinu taki við sér og um brjóstið flæði friður og tilfinning fyrir því að margt sé gott og skemmtilegt undir sólinni.  Þetta er sannkallað mannræktarblogg! Til hamingju með daginn og ég sendi gleðívíbra og brandarabúst í afmælisveisluna!

[Doddi - Þorsteinn G. Jónsson (IP-tala skráð) 10.2.2007 kl. 14:45]

Eftir einungis örfá innlit á bloggið þitt sér maður strax hversu góð og skemmtileg persóna þú ert. Ég held að ég sé stálheppinn að hafa hitt þig hér og hlakka til frekari samskipta á blogginu. Svo eigum við það líka sameiginlegt að Guðríður og Þorsteinn eru okkur svolítil stíf nöfn, jú ... hljómar eins og mamma sé að skamma mann! :-) Þannig að Doddi er það hjá mér og Gurrí hjá þér.

Ég segi því: til hamingju með daginn Gurrí, og vonandi muntu eiga yndislega helgi! 

[kikka (IP-tala skráð) 10.2.2007 kl. 14:48]

Til hamingju með daginn og kaffidrykkinn

Og Margrét biður að heilsa, var að kíkja á skjáinn yfir öxlina á mér og bað mig að skila kveðju þegar hún sá myndina af þér. 

[Guðný Anna Arnþórsdóttir, 10.2.2007 kl. 22:22]

Dásamleg að dagurinn var góður. Góður dagur er gulli betri. Þvi hvers virði er gull í sjálfu sér?

[Guðríður Hrefna Haraldsdóttir, 10.2.2007 kl. 22:34]

Takkkkk og takkkk, elsku bloggvinir!!!

[Guðný Anna Arnþórsdóttir, 10.2.2007 kl. 23:05]

Huxaðu þér, hvað þú vekur mikla gleði og hamingju. Er ekki einusinni að djóka eða smjaðra*. Meina þetta.

* sögnin að smjaðra: "vegna þinnar miklu maktar munu þínir óvinir smjadra fyrir þér. " Þetta segir í orðabók ...sem dæmi um notkun þessa orðs.