Heimsóknir í himnaríki og kósí kaffihúsaferð

Mía systir og Bjartur, kötturinn hennar, komu í laugardagsheimsókn.

Langt síðan Bjartur hefur komið en ég passaði hann í nokkra daga í sl. vor. Hann var búinn að gleyma vináttu sinni við Tomma og þeim dásamlegu vináttuslagsmálum og eltingaleikjum sem þeir áttu í. Fyrstu mínúturnar gekk hann um himnaríki eins og klósettbursti útlits.

Kubbur var í felum, enda slökkti ég á ryksugunni þegar Mía hringdi dyrabjöllunni. Fyrst ryksuguskrímsli, síðan gestaköttur ... oj, leiðindadagur fyrir Kubbsu litlu.

Svo birtust Steingerður og Svava Svanborg (SS og SSS) og óvænt Helen systir þeirra í smástund. SSS var með dóttur sína og stuðningsbarn, lítinn og rólegan dreng.

Ekki svo löngu seinna kom Guðrún þannig að nú var fjör í himnaríki.

Systurnar birtust með hnetuköku sem ég sjokkeraðist yfir ... en svo kom meira upp úr pokanum, kanilskonsur og agalega góð lengja sem ég man ekki hvað heitir en er laus við hnetumöndludöðlurúsínu-hrylling.

 

 
Ég dró vinkonurnar með á nýja kaffihúsið og þeim leist ógurlega vel á sig þar. Kaffihúsið var fullt af Skagamönnum sem virtust mjög hressir með nýja staðinn. Það var vitlaust að gera en samt enginn hávaði og læti. Staðurinn er svo stór, mikið um sófasett og kósí horn um allt, við fengum reyndar bara sæti við borð en það var allt í lagi!  

Athugasemdir

[Jórunn Sigurbergsdóttir , 10.2.2007 kl. 18:17]

Til hamingju með daginn.

[Svava S. Steinars, 10.2.2007 kl. 19:35]

Það er eitthvað við þessa stellingu sem ég er í við afgreiðsluborðið.  Sé eftir því núna að hafa ekki reynt fyrir mér sem fyrirsæta, ég er greinilega náttúrutalent...  Takk fyrir góðan dag, kem aftur síðar og læt spá fyrir mér. Kannski verður næst hægt að komast án svalirnar án þess að skríða í gegnum litla gluggann

[Guðríður Hrefna Haraldsdóttir, 10.2.2007 kl. 20:19]

Já, þú pósar flott. Fáum viðkomandi manneskju (sem vill ekki láta blogga um sig) til að spá fyrir okkur báðum, held að í spilunum leynist strákarnir, heheheheheh ekki sé ég þá annars staðar! Og vonandi fer fólkið í Gluggahöllinni að svara símtölunum mínum ... mig vantar svalahurðina sárt!!! 

[Hugarfluga, 10.2.2007 kl. 20:27]

En viðburðarríkur dagur hjá þér  Alltaf gaman að hitta gott fólk!

[Guðríður Hrefna Haraldsdóttir, 10.2.2007 kl. 20:59]

Arna Hildur: Þó það nú væri, ég hef setið ein allar helgar í vetur, sofið til klukkan fimm og svona ... þegar fólk kemur loks þá þurfa alltaf allir að koma í einu. Svo kemur heil rúta á morgun; Hilda systir með fullt af börnum!!! Og ég hlakka ekkert smá mikið til! 

Og takk, Jórunn og Hugarfluga!

[Guðný Pálína (IP-tala skráð) 10.2.2007 kl. 21:08]

Köttur sem lítur út eins og klósettbursti... ;) Hef oft séð svoleiðis - frábær samlíking :)

Kveðja að norðan, Guðný Pálína 

[Guðríður Hrefna Haraldsdóttir, 10.2.2007 kl. 21:16]

Það risu á honum hárin, hann var ógnandi til að Tommi léti hann í friði ... mér finnst kettir með rísandi hárin alltaf líta út eins og klósettburstar!

[Guðrún Eggertsdóttir, 10.2.2007 kl. 21:50]

Takk innilega fyrir frábærar trakteringar.  Alltaf gaman að spjalla við skemmtilegt fólk, fara á kaffihús, sýna sig og sjá aðra.

[Guðríður Hrefna Haraldsdóttir, 10.2.2007 kl. 22:33]

Já, seggggðu!! Takk fyrir komuna elskan, alltaf gaman að fá þig!

[Steingerður Steinarsdóttir, 12.2.2007 kl. 09:48]

Já, það er nokkuð augljóst að Svava hefði átt að vera fyrirsæta en ef geta á í svipinn á mér lítur einna helst út fyrir að tröllið sé að hugsa um kjöt og þá helst vænt mannslæri.