Kannabislykt og skakkur lampi ...

Mikið var dásamlegt að fá far heim með Ástu og það með viðkomu í Húsasmiðjunni/Blómavali. Ég á eitthvert tæki sem maður setur vatn í og dropa af góðri lykt og það er eins og við manninn mælt, það verður tryllingslega hreint og gott loft um allt himnaríki. Ég keypti lykt sem heitir Cannabis ... í alvöru, og hún er dúndurgóð.

Tækið er komið af stað og ef ég fer að verða eitthvað drafandi hér á Moggablogginu þá ætti ástæðan að liggja fyrir! Svo keypti ég ógurlega flottan lampa, seventís-lampa sem á eftir að njóta sín vel í kósíhorninu þar sem tölvan var áður. Lög með hljómsveitinni Bread, já, og John Denver, fóru að hljóma í hausnum á mér þegar ég sá lampann.

Hann er svolítið skakkur ... það er kannski bara alveg við hæfi.

Mér tókst að plata Ástu með á nýja kaffihúsið, sá á henni að hún nennti ekki heim, þessi elska. Ég er eini kúnninn þar sem hefur mætt daglega frá opnun!

Við Ásta pöntuðum kaffi og kökur, flettum húsbúnaðarblöðum, Vikunni og öðrum dásamlegum tímaritum og ég er að volgna aftur í sambandi við að láta gera upp eldhús og bað! Og ég verð sífellt vissari um barborðið og barstólana út á svalirnar. Þoli ekki að liggja í sólbaði, enda finnst mér útlitið hvít postulínsbrúða eiga vel við mig, en myndi afplána útiveru með bestu lyst ef ég gæti horft út á sjóinn og þá eru barstólar málið. Veit ekki með barinn ... en gestir mínir fá alla vega kaffi!

Athugasemdir

[Kleópatra Mjöll Guðmundsdóttir (IP-tala skráð) 12.2.2007 kl. 19:02]

cannabis lykt er góð ....

[Hugarfluga, 12.2.2007 kl. 19:04]

Keyptirðu lampann í Blómavali?? Hann er gjörsamlega geggjaður og mjög við hæfi bústinnar býflugu!!!

[bara Maja..., 12.2.2007 kl. 19:07]

Varð lampinn skakkur EFTIR að þú kveiktir á Cannabis lyktinni ? bara smá pæling...

[Hugarfluga, 12.2.2007 kl. 19:10]

Hahahaha MajaG!!!!!

[SigrúnSveitó, 12.2.2007 kl. 19:44]

Lampinn er geðveiktl flottur.  Hvað kostar svona lampi??

Uuuummm, eru góðar kökur á kaffihúsinu?  Kannski ég kíki á það áður en ég fer til Dk... 

[Guðríður Hrefna Haraldsdóttir, 12.2.2007 kl. 19:52]

Ég reyndi að koma því nett að að lampinn væri "skakkur" af kannabislyktinni ... Tíhíhíhíhí! Lampinn kostaði innan við 2.000 kall, var á 40% afslætti, kannski bara nær 1.000 kallinum. Hefði átt að kaupa fleiri! Er með ranga peru í honum eða kann ekki á hann ... kannski vantar stykki einhvers staðar sem þarf að skrúfa, best að kíkja betur. Gengur ekki að hafa skakkan lampa ... eða eins og Halla frænka myndi segja; ekki þegar maður er með merkúr í meyju! 

Ég hef fundið alvörukannabislykt og hún líkist ekki þessum góða ilm sem hamast við að troða sér inn í hvert horn í himnaríki!  

[www.zordis.com, 12.2.2007 kl. 20:13]

Ekkert eins gott að setja góða lykt.  Manni líður eins og stormsveip á eftir!  Lokar augum og allt tandurhreint!  Lampinn er vissulega flottur og verðið bara nokkuð gott!  Lotus lykt er rosalega góð! 

[Ester Júlía, 12.2.2007 kl. 20:29]

Vá geggjaður lampi!!  Já cannabisilmur er ótrúlega góður ef hann kemur ekki frá pípu.., þegar ég var unglingur var mjög í tísku að fara í 1001 nótt og kaupa þar hasslykt í lítilli flösku (musk) man ekki hvað hún hét en í þá daga var hasslykt af öllum unglingum.. ( úr flösku auðvitað :)   

[Guðríður Hrefna Haraldsdóttir, 12.2.2007 kl. 20:37]

Og eitthvað sem hét Patjúlí var líka voða vinsælt ... (skrifað eftir framburði) ... gaman að fara í 1001 nótt, ég elskaði þá búð. Minnir að hún hafi fyrst verið á Hverfisgötu 50 þar sem Bára flutti síðar inn með fínu kjólana sína.

[Guðríður Hrefna Haraldsdóttir, 12.2.2007 kl. 20:54]

Hæ elsku nýi bloggvinur! Er ekkert kaffihús í Bolungarvík?

[Margrét Annie Guðbergsdóttir, 12.2.2007 kl. 21:30]

Æðislegur lampi. Ég er eins og þú, finnst ekkert gaman að liggja í sólbaði, geri það stundum fyrir kallinn þegar við förum til Spánar, honum finnst gott að láta sólina sleikja sig, en ég er bara oft undir sólhlífinni og les.

[Guðný Anna Arnþórsdóttir, 13.2.2007 kl. 00:24]

Vá, lampinn minnir á góðar pælingar í góðra vina hópi og rótsterkt kaffi í GLASI (mjög nauðsynlegt) og koníka fyrir svolana. Uhmmmm. Mér finnst líka best að vera undir sólhlíf, en það er líka himnaríki í suðurlöndum (ekki eins og himnaríkið hennar gurríar, en  svona á svipuðu kalíber..) Cannabislykt já, man einhver hvernig hún er?

[Svava S. Steinars, 13.2.2007 kl. 00:37]

Groovy lampi, ekki spurning.  Ég greinilega missti af hass-ilmvatnstískunni, en fannst mjög gaman að fara og versla eitt og annað í 1001 Nótt.  Var reyndar alltaf spes lykt í búðinni, kannski einmitt hasslykt ?

[Guðrún Eggertsdóttir, 13.2.2007 kl. 08:32]

Til hamingju með lampann, það verður alltaf meira og meira kósí í himnaríki!