Vorboðinn ljúfi ... kattahár!

Tvær af mestu og bestu uppáhaldsfrænkunum komu í heimsókn í dag og mættu með hálft Mosfellsbakarí með sér. Bollur og allt! Þær hrifust mjög af svölunum en söknuðu þess samt að sjá ekki beint út á sjó.

Kunni ekki við að segja þeim að troða sér út um litla gluggann, eins og ég geri, til að komast út á svalir. Maður er nú veluppalinn ...

Svo var Laufey vinkona að hringja, var á rúntinum í Mosfellsbæ með manni og móður, og datt í hug að kíkja ... hún er á leiðinni núna og ég verð að fara að ryksuga. Kettirnir byrjuðu nefnilega að fara úr hárum í dag. Svörtu buxurnar hennar Margrétar frænku voru orðnar hvítar eftir Kubb og himnaríki er allt loðið!

Það var Evróvisjón-fílingur í frænkunum og þeim fannst hræðilegt að vita til þess að ég yrði ein í kvöld. Ég verð sko ekki ein, lítil vinkona ætlar að koma í heimsókn (ekki pössu, segir hún) og vera mér til samlætis! Mér finnst reyndar yndislegt að vera ein ... er í svo góðum félagsskap ... og ég er ekki að tala um kettina! 

Uppáhaldsfrænkurnar sáu hluta af Boldinu, þær langaði að sjá X-Factor sem var ekki byrjaður ... og við skemmtum okkur vel yfir rifrildi Taylor geðlæknis og Brooke um hönkið!

Athugasemdir

[Ester Júlía, 17.2.2007 kl. 17:32]

æ já nú fara hárin að fjúka af köttunum... þá fer skapið að versna í manninum mínum, þetta fylgist alltaf að sko .   Ég keypti einmitt bollur í dag en fannst þær ekki góðar.  Keypti nokkrar til að setja á og þær verða pottþétt góðar með búðing á milli og sonna.  .  En skemmtu þér vel í kvöld með litlu vinkonu þinni . Kær kveðja.

[www.zordis.com, 17.2.2007 kl. 17:36]

Fury heaven .... Ég held að himnaríki megi alveg vera loðin og mjúk.  Tala nú ekki um þegar maður er ógeðslega vel upp alinn og allir hafa skilning á himnaríki!  Kisutútturnar eru bara fínar!  Yndilsega kvöldstund með besta félagsskap ever!  Skil hvað þú meinar þegar þú talar um góða félagsskapinn .....  

[Svava frá Strandbergi , 17.2.2007 kl. 17:55]

Kettirnir mínir tveir sem eru innikettir fara úr hárum allt árið um kring. Ég þarf helst að rykmoppa parketið á hverjum degi ef vel á að  vera. En þar sem ég nenni því ekki er heimilið yfirleitt mjög loðið og vinalegt.

[Hugarfluga, 17.2.2007 kl. 19:33]

Ég held að það sé margt verra en að vera einn. Sérstaklega þegar maður er svona skemmtilegur eins og þú .... og ég ... tíhí. Og rosalega kíkja margir í kaffi til þín! Verst að ég er með soddan hroðalegt kattaofnæmi og hrædd um að kettirnir myndu veiða svona flugu eins og mig. Annars væri ég á leið í kaffi til þín.

[Guðríður Hrefna Haraldsdóttir, 17.2.2007 kl. 19:45]

Æ, hugarflugan mín ... ofnæmi!!! Þú værir sko velkomin í kaffi til mín! Ég gef bara kettina ... múahahhahaha!  

Þetta var svo góður dagur, fullur af gestum, svakalega góðum gestum!  

[Guðríður Hrefna Haraldsdóttir, 17.2.2007 kl. 20:37]

Færslurnar hjá mér eru mörg þúsund talsins síðan ég byrjaði að blogga fyrir mánuði eða svo. Ætla því að reyna að svara þér HÉRNA, ekki benda þér á færsluna, held að ég finni hana ekki sjálf ... Ég vissi ekki að Taylor væri dáin ... en svo rak ég augun í þetta dásamlega bu.., ég meina sápuþátt! Sko, Taylor átti aðdáanda, greifa eða prins eða kóng í fjarlægu landi, hann mútaði sjúkrahússtarfsmanni, líklega lækni, til að gefa Taylor eitur svo að hún félli í dá og læknirinn gaf svo út dánarvottorð. Kannski missti hún minnið í fjögur ár þar sem hún lifði væntanlega í vellystingum í höllinni (nú er ég farin að giska) og svo hefur minnið komið aftur því að þegar Bridget var að fara að giftast honum þarna sem á barn með mömmu Bridgetar, Brooke, ljóshærðu sem giftist ekklinum sem var ekki ekkill af því að Taylor er á lífi, þá sá Ridge ekkill látinni konu sinni bregða fyrir og gerði svo mikil læti að brúðkaupinu var frestað. Svona held ég að þetta hafi verið! Svo er bannað að skrifa Gurrí með Ý!!! Annars kem ég til Bolungarvíkur og giftist syni þínum sem eldist jafnvel jafnhratt og börnin í Boldinu. Tvíburarnir eru orðnar gjafvaxta og Tómas var farinn að deita Amber á tímabili en hann var 5 ára þegar hún eignaðist barn sem dó og stal barni af frænku sinni, hjólhýsapakkinu, og lét sem það væri hennar eigið barn. Hjúkkitttt. Eriddanóg?

[Guðný Anna Arnþórsdóttir, 17.2.2007 kl. 23:43]

Við maðurinn minn # 1 fórum í framhaldsnám til USA 1979. Þar sem ég var með lítinn son minn nokkurra vikna gamlan og vinkonu mína (íslenska) í næsta stúdentaraðhúsi, horfðum við alltaf á General Hospital um klukkan þrjú okkur til ómældrar lífsfyllingar. Næst þegar ég kom til USA til dvalar, 1993 (líka til framhaldsnáms..) skrúfaði ég frá imbandum og gat haldið áfram að horfa á Lauru og ..hvað hann nú hét...í General Hospital eins og það hefði bara liðið ein helgi milli atriða. Er ekki einu sinni að ýkja. Þetta er auðvitað listgrein sem ekki á sinn líka í menningarsögunni....

[Guðríður Hrefna Haraldsdóttir, 18.2.2007 kl. 00:28]

Svona þættir eru snilld!!! Svo hringdi einn aðdáandinn í mig seinnipartinn og spurði hvað hefði gerst í föstudagsþættinum ... og ég gat ekki svarað því! Miðað við þetta sem þú segir GAA skiptir einn þáttur engu máli! Þú misstir af mörgum árum án þess að það kæmi niður á þér ...