Varúð, Keflvíkingar eða Kanar, og matarbylting í himnaríki

Þegar íbúfenið hætti að virka á hádegi var mér allri lokið og fór heim. Var svo heppin að fá far alla leið. Vinkona sem hafði ætlað að koma með mér klukkan fjögur breytti bara áætlun sinni, sótti mig í vinnuna, skoðaði himnaríki, drakk einn kaffi og fór fljótlega heim. Hún var hálfsslöpp líka.

Smáviðvörun!

Dökkt ský stefnir nú óðfluga til Keflavíkur!!!

Sjá mynd sem ég tók rétt áðan.

Ef Keflvíkingar sleppa við óveðrið þá vara ég Ameríkana við en stefnan er í westur!

Já, og ég er orðin matreiðslubók ríkari. Nú verður mataræði himnaríkis aldeilis tekið í gegn. Frá og með kvöldinu í kvöld verður allt annar matur á boðstólum og má segja að nú fái ég aðeins mat við hæfi.

Í kvöld:
Túnfisk-carpaccio
Fylltur lambahryggur með madeirasósu
Kókosís

Á morgun:
Ristaður skötuselur á lauk og beikonmauki með rauðvínssoðnum smjörbaunum
Ofnsteikt heiðagæs með bökuðu grænmeti í Savoykáli, kartöflukrókettum og Calvadossósu
Vanillu Créme Brulée með jarðarberjakompot

Verst að allar uppskriftirnar miðast við tíu en ef ég borða bara mjög hægt ...

Matreiðslubókin heitir Matreiðslubók íslenska lýðveldisins og eru í henni aðeins uppskriftir sem hafa verið notaðar í fínum kónga-, forseta- og ráðherraveislum íslenska lýðveldisins í gegnum árin.

Ég hef aldrei komist „fínna“ en að borða hádegismat niðri á alþingi þegar vinkona mín, fv. alþingiskona, bauð mér. Mér fannst fyndið til þess að hugsa að sá matur hafi komið frá Múlakaffi. Þá hélt ég að Múlakaffi væri bara með risakleinur og mat fyrir glorhungraða verkstæðiskarla og trukkabílstjóra ... en mikið skjátlaðist mér. Maturinn var afar góður og líka sá sem við fengum á árshátið fyrirtækis sem ég vann hjá og kom frá Múlakaffi, algjör dýrðarmatur.

En nú þarf ég að fara að networka svolítið og reyna að komast í þessar fínu kóngaveislur fyrst ég er að komast á bragðið í orðsins fyllstu merkingu.

Myndin sem fylgir er af mataræfingu sem ég hélt áðan, kisunum og mér til mikillar gleði ...   

Athugasemdir

[Ólafur fannberg, 19.2.2007 kl. 17:09]

skötuselur nammi namm

[Guðríður Hrefna Haraldsdóttir, 19.2.2007 kl. 17:53]

Úps .... þetta verður greinilega konunglegt bloggvinamót á Skaganum!

[www.zordis.com, 19.2.2007 kl. 17:55]

Þetta er svona MOUTHWATERING færsla ........ tala nú ekki um þegar maður er búinn að hríðhorast í dag af ávaxta áti og grænmetisdjúsdrykkju.  Líst rosalega vel á matseðilinn og óska þér velfarnaðar með heilsubrestinn.  Skrái mig í smakk til frú Guðríðar .... get verið aðstoðarsmakkari

[Katrín Snæhólm Baldursdóttir, 19.2.2007 kl. 18:08]

Reykt ýsa sett í álpappír og fullt af sméri með í ofninn..sjóða kartöflur og Voila!!!

Himnesk máltíð. Heimilisfólkið umlaði, slefaði og kjammsaði á þessu góðmeti og voru leiðir þegar allt var búið. Stundum er einfalt líka gott.

[Guðríður Hrefna Haraldsdóttir, 19.2.2007 kl. 18:29]

Hljómar eins og sannur herramannsmatur (frúarkonumatur) ... kannski er þetta uppskriftin sem fengi mig til að borða reykta ýsu ...

Zordis er hér með ráðin sem aðstoðarsmakkari!  

[Guðmundur G. Hreiðarsson (IP-tala skráð) 19.2.2007 kl. 18:30]

Siggi leigubílstjóri vinur minn fékk sér eitt sinn kvöldmat á Múló. Daginn eftir mætti hann aftur og bað um að fá að ræða við kokkinn. Kokkurinn kemur fram - eitt spurningarmerki. "Það er nú ljóti viðurgjörningurinn sem gestum er boðið upp á hérna, eftir að hafa étið hér situr maður bara á dollunni það sem eftir lifir vaktar"!

"Já en það hefur enginn annar kvartað".

"Auðvitað ekki - upp úr svona löguðu rísa bara alhörðustu menn..."

[Guðríður Hrefna Haraldsdóttir, 19.2.2007 kl. 18:47]

Hehehehehe

[Svava S. Steinars, 20.2.2007 kl. 01:08]

Mmmm, slurp slurp !  Verst með þessar matreiðslubækur, flestar gefa upp skammtastærðina fyrir 4-6.  Keypti reyndar eina um daginn sem heitir Cooking for two.  Það er nær lagi. Vantar bara Cooking for one fyrir vikurnar sem Hilda er hjá pabba sínum