Moggabloggið slær í gegn ...

7.3.2007 | 12:05

Moggabloggið slær í gegn ...

Í nýjustu Vikunni (sem kemur í síðasta lagi í verslanir á morgun) er grein um Moggabloggara!!! Múahahahah!

Þarna verður heil opna um þennan guðdómlega þjóðflokk gáfukvenna/-menna og annarra gimsteina.

Ég var ekkert smáspæld þegar ég sá grein um Moggabloggið í Króníkunni í síðustu viku en þessi grein er gjörólík henni. Léttara yfirbragð hjá Vikunni og tekið öðruvísi á þessu.

Þegar greinin var skrifuð var Íris nokkur Alma (gömul samstarfskona) með slúðurblogg um fræga og fína fólkið, hún þaut hratt upp í fjórða sætið og skaut þar með ansi mörgum pólitíkusum og nölduskjóðum aftur fyrir sig (múahahahahah), djók ... Á meðan blaðið dúllaði sér í gegnum prentsmiðjuna og allt ferlið þar hætti Íris að blogga og hefur síðan hrapað niður listann.

Eins kallaði ég Katrínu Önnu formann Femínistafélagsins en hún er talskona þess! Annað er gjörsamlega fullkomið.

Fannst ég hafa allan tíma í heiminum í morgun. Ellý þurfti að vera á ferðinni eldsnemma í bæinn, á leið upp í Lyngháls í sama hús og ég vinn í ... og bauð mér far. Yfirleitt á morgnana geng ég fumlaus að skylduverkunum. Kveiki á kaffivélinni, klæði mig og snyrti (strái yfir mig vellyktandi þvottadufti ... ), fæ mér kaffi, athuga hvort gemsinn sé í töskunni, lyklarnir og rauða kortið í kápuvasanum, hleyp niður og fer í strætó.

Núna var ekkert svona kjaftæði ... mér tókst næstum að hreingera íbúðina í morgun á meðan ég beið eftir Ellýju. Alla vega tókst mér að fylla innkaupapoka af lesnum og ólesnum dagblöðum sem hafa safnast upp og koma þeim niður.

Allt annað að sjá himnaríki!

Flokkur: Bloggar | Facebook