Mergjaður ástargaldur - allt er breytt!

Var að enda við að borða múffuna (sem „aðdáandinn" gaf mér í gær) og komst að því nokkrum sekúndum seinna að galdradufti hafði verið stráð yfir hana. Þau álög hvíldu sem sagt á múffunni að sá fyrsti sem ég horfði á eftir að ég renndi niður síðasta bitanum yrði maðurinn minn og ég myndi elska hann til æviloka.

Hnuss, lélegir galdrar. Ég vitlaus í Hrund, samstarfskonu mína. Það er samt ögn skárra en ef mér hefði verið litið á Eirík Jónsson, hann kannski að slugsast fram í kaffi og ég bara farið að elska hann ...

Eiríkur er nefnilega á föstu.

  

Hrund tekur þessu merkilega vel þótt hún hafi hafnað mér og fékk þá frábæru viðskiptahugmynd að fjöldaframleiða ástarmúffur ... þetta yrði nú flott hrekkjagjöf! Hættan væri þó sú að ef þetta færi út böndunum myndi skilnuðum fjölga til muna en á móti kæmi að ýmsar gjár myndu hverfa. Þá myndi ekkert vera til lengur sem heitir samkynhneigð eða gagnkynhneigð og margir stressa sig svo yfir. Bara alkynheigð. Skemmtileg tilviljun ef það fæðast svo börn í nýju ástarsamböndunum og þegar barnið fær fyrstu múffuna sína passa pabbi og mamma að rétt barn fái fyrsta áhorfið ... Allir myndu ganga út og upplifa rómantík, lika þybbnar konur. Hugsanlega yrðu þó morð framin í kapphlaupinu við að verða fyrst/ur til að byrla George Clooney múffu .. 

 Jamm, best að fara að elta Hrund í kringum skrifborðið!

Athugasemdir

[Margrét Annie Guðbergsdóttir, 9.3.2007 kl. 17:57]

Sko ef ég væri ekki gift og ráðsett kona þá væri ég pottþétt til í að reyna  svona ástarmúffur á Georgie baby.

[Eydís Rós Eyglóardóttir, 9.3.2007 kl. 19:06]

Ástarmúffur, þessi markaðstetning ætti vel rétt á sér um 14 feb ár hvert (Valentínusardag). Hins vegar væri ég til í eitt stk svona ástarmúffur EF hún myndi skila árangri á Clooney, hver gæti neitað sér um eitt stk Clooney???

[Ólafur fannberg, 9.3.2007 kl. 19:21]

múffa namminamm

[Hugarfluga, 9.3.2007 kl. 19:31]

Hahahahahha, Gurrí!! Eiríkur Jónsson af öllum mönnum!!! Jedúdamía!

[Kristín Katla Árnadóttir, 9.3.2007 kl. 20:10]

Múffur eru sko góðar namm

[Guðríður Hrefna Haraldsdóttir, 9.3.2007 kl. 20:34]

Hugarfluga, hann labbar framhjá mér nokkrum sinnum á dag! Örlög okkar virðast vera samtvinnuð, þetta er fjórði vinnustaðurinn sem við vinnum saman á! 

[Guðný Anna Arnþórsdóttir, 9.3.2007 kl. 20:37]

Gangi þér vel með eltingarleikinn, heillin mín. Vona að þú náir góðu skrensi á endunum.......Hrund og Gurrí, ekki galið. Eiríkur og Gurrí er hinsvegar af og frá, sérstaklega af.

[Guðríður Hrefna Haraldsdóttir, 9.3.2007 kl. 20:47]

HAHHAHAAH! Æ, ég legg hann Eirík í einelti með þessu  ...  hann er fínn samstarfsmaður.

[Heiða B. Heiðars, 9.3.2007 kl. 20:57]

Það gleyma allir aðalatriðinu! Hvernig múffa er þessi múffa? Súkkulaði? Vegna þess að ég veit fyrir víst að alvöru ástarmúffa er úr súkkulaði. Hinar eru bara platástarmúffur

[Guðríður Hrefna Haraldsdóttir, 9.3.2007 kl. 21:00]

Þetta var reyndar plat-ástarmúffa. Hvít ... tákn vináttu!

[www.zordis.com, 9.3.2007 kl. 21:47]

Sonur minn er ad blogga med mérog segir ad plásturin hans sé á blogginu þínu ..... Ahhh.... Bangsimon plástur!  Múffur ........... nehhhh dietið mitt leyfir það ekki nema kanski verðlaunin!  alkynhneigð finst mér flott!

[Guðríður Hrefna Haraldsdóttir, 9.3.2007 kl. 21:50]

Þú ert greinilega búin að borða þína ástarmúffu fyrst þú fannst fjallið góða.

Innilegar kveðjur til sonarins, við höfum greinilega svipaðan smekk. Ég ætla að kaupa mér svona plástur!  

[Guðrún Eggertsdóttir, 9.3.2007 kl. 21:52]

Eru til svona múffur í Ameríku?

[Pétur Þór Jónsson, 9.3.2007 kl. 21:54]

Ég tek enga sénsa, sleppi múffunum og held áfram að elska konur, þær eru allar svo fallegar.

[Guðríður Hrefna Haraldsdóttir, 9.3.2007 kl. 22:13]

Já, Guðrún. Þær heita Muffins þarna í Ameríkunni og þú skalt borða þær fyrir framan flottan gæa og gættu þess að hann fái bita líka.

Pétur, þú ert greinilega eðalgæi! Við elskum þig líka allar!

[Hrund (IP-tala skráð) 9.3.2007 kl. 23:54]

Hahahahahhahahah......."byrla e-m múffu". Fast orðatiltæki í mínum orðaforða hérðan í frá, það er nokkuð ljóst. Notist til dæmis ef vinkona verður skotin,dæmi: "Nú nú, var þér byrluð múffa?" :p

Get ekki skrifað meira...svo móð af öllum hlaupunum í kringum skrifborðið;)

Hrund

[Heiða B. Heiðars, 10.3.2007 kl. 12:46]

Vonandi hefur Hrund vit á að fara varlega í að byrla múffur. Þarf að koma sér upp betra þoli fyrst..aldrei að vita nema hún þurfi að spretta úr spori. Maður veit nefnilega aldrei hver fengi sér bita....