Elskan hann Davíð (ekki Oddsson)

Sl. haust tók ég eftir því að hávaxinn myndarpiltur elti mig út úr strætó, áfram eftir Vesturlandsveginum, til hægri yfir mýrar og móa og þar til við komumst á bílastæðið þar sem vinnan mín stóð við og Tækniháskólinn hans.

Á gamla blogginu talaði ég um hann sem skólastrákinn minn sem gæti verið að nálgast þrítugt og fannst ekki verra að fá félagsskap í öræfunum þarna. Ef ég hefði dottið og rotast myndu rútur frá Pétri Tyrfingssyni koma í veg fyrir að ég sæist úr vinnunni en mögulega gætu þó hasshundar sem mæta í Tollpósthúsið þarna rétt hjá haft af mér veður. Ég veit það ekki, ég datt aldrei.

Með tímanum kom í ljós að skólastrákurinn minn reyndist vera á svipuðum aldri og ég og kvæntur gamalli skólasystur af Skaganum. Hvort hann er svona unglegur eða gleraugun mín ekki nógu sterk eða ég horfi ekki nóg á strákana ... veit ég ekki ... hann segist vera svona unglegur og konan hans er alveg sammála. Hahhaha. Þau eiga dóttur sem heitir María og í huga fjölskyldu minnar er hún engill í mannsmynd. Hún vinnur á skurðdeild Barnaspítala Hringsins og hefur verið svo góð við hann Davíð í öllu lungnaveseninu. Við vissum auðvitað ekkert um skyldleika Maríu við skólastrákinn lengi vel.

Davíð og Björn Bjarnason (líka lungnavesen) útskrifuðust báðir um svipað leyti nú á dögunum ... en nú er elskan hann Davíð kominn aftur inn á spítala.

María tók á móti Davíð sínum í gær, steinhissa á þessu. Læknar hika eðlilega við aðra stóra aðgerð (svona glenna sundur rifin-aðgerð) til að laga hitt lungað og tala nú um límmeðferð ... eða er það deyfingin?

Önnur æðisleg hjúkka heitir Björk, auðvitað vill svo undarlega til að ég þekki til hennar líka, en hún er systir Röggu í Kaffitári á Bankastræti. Vissulega eru flestir þarna æðislega góðir en Davíð tapar svolítið á því að vera ekki lítið krútt ... hann er líklega 1,90 á hæð og því stórt krútt. Einhver kenndi svefntruflunum hans síðast um að hann héngi í tölvunni á nóttunni ... en reyndin var sú að hann gat ekki sofið eina nóttina og fór í tölvuna eftir að hafa bylt sér hálfa nóttina. Það má ekki skammast í fólki á spítala og vera með svona stæla.

Hilda systir situr eins og gribba hjá honum og passar hann vel og hefur mömmu sér til aðstoðar. Mamma er sko hjúkka, nýkomin á eftirlaun. Guð hjálpi þeim starfsmönnum sem kyssa ekki Davíð og knúsa í hvert skipti sem þeir koma til að sprauta honum eða koma með bekken.

Ég var viðstödd þegar Davíð fæddist (1989) og hef dekrað við hann eins og versta amma ... ja, ég er nú ári eldri en móðir hans. Davíð hefur alveg húmor fyrir dekrinu. Einu sinni gisti ég heima hjá honum og vekjaraklukkan brást. Davíð var að verða of seinn í skólann og ég var send til að koma þessum svefnþunga eftirlætisprinsi mínum á fætur. „Davíð, þú svafst yfir þig og mér finnst það bara flott hjá þér!“ sagði ég við hann. Mamma hans hefur kvartað yfir því að ég mæli allt upp í honum og ég vildi bara sanna það í eitt skipti fyrir öll. Davíð hló svo mikið að hann dreif sig á fætur. Meira að segja honum fannst þetta tú möts! Hehehhe!

Það er allt kattaofnæminu (vælinu) í honum að þakka að ég fékk Kubb, gamla köttinn hans og Ellenar.
Elsku Davíð er svo kvalinn að akkúrat núna er verið að gefa honum mænudeyfingu. Ég sendi mínar allra bestu bataóskir upp á Barnaspítala, og Davíð, hættu svo að klípa sætu hjúkkurnar og læknana! Þær eru manneskjur!

 
P.s. Eftir að hafa rifið mig upp fyrir allar aldir í morgun þá verð ég að lýsa yfir vonbrigðum mínum með öldurnar, þær eru fallegar en ansi litlar. Held reyndar að stefni í vitlaust veður á morgun þannig að þetta getur lagast!

Athugasemdir

[Jenný Anna Baldursdóttir, 10.3.2007 kl. 13:14]

Ég sendi batakveðjur til ofurkrúttsins Davíðs!!

Leiðinlegt að veðrið skuli vera að eyðileggja fyrir þér útsýnið með því að haga sér svona vel.  Smáöldur *hneyksl*. Rjúkandi brim væri nærri lagi.

Takk fyrir pistilinn.  Klikkar aldrei.

[Ásthildur Cesil Þórðardóttir, 10.3.2007 kl. 13:14]

Já ég skal senda Davíð góðar hugsanir og ósk um skjótan bata.

[bara Maja..., 10.3.2007 kl. 13:26]

Baráttukveðjur til hans Davíðs frænda þíns !!!

[Guðríður Hrefna Haraldsdóttir, 10.3.2007 kl. 13:28]

Umm, takk elskurnar.

Og Jenný, held að það komi ólgandi brim á morgun! Jesssss! Sumir elska lygnan og spegilgljáandi sjó ... aðrir brjálað  brim og læti ... ég er í seinni flokknum, auk þess sem sjónvarpið dettur út hjá mér ef hafið er of spegilgljáandi ...

[Björg K. Sigurðardóttir, 10.3.2007 kl. 14:55]

Baráttu- og batakveðjur til frænda þíns

[Hugarfluga, 10.3.2007 kl. 15:42]

Góðan bata, Davíð!!   

[Jenný Anna Baldursdóttir, 10.3.2007 kl. 16:24]

Gurrí mín veit ekkert betra en rigningu, snjóstorma og vindgnauð.  Það er svo hlýlegt eitthvað.  Vil bara ekki að það valdi mannskaða. 

Við Jennslubarn erum að baka pönnukökur.  Myndi bjóða ykkur öllum ef það væri hægt svona netwise.

[Guðný Anna Arnþórsdóttir, 10.3.2007 kl. 16:39]

Heilsukveðjur til hans Davíðs, ömmubarnsins þíns. Vona að mænudeyfingin gangi vel og öldur muni rísa við Langasandinn, þér til ánægju og yndisauka.

[Guðríður Hrefna Haraldsdóttir, 10.3.2007 kl. 17:08]

Mamma verður brjáluð ef ég stel ömmuhlutverkinu af henni ... ussss, ekki segja henni. Hehehhe. Nú er svo hvasst og ég vona að öldurnar tryllist skjótt!

Nú batnar Davíð skjótt ... eftir þessar bataóskir allar! Þið eruð æði! 

[Gerða Kristjáns, 10.3.2007 kl. 19:31]

Baráttukveðjur og vonir um bata sendar til Davíðs

[Anna Ólafsdóttir Björnsson, 10.3.2007 kl. 20:02]

Vona að Davíð gangi vel að losna út úr þessu, alveg ómögulegt að fara svona með svona góðan strák!

[lalla (IP-tala skráð) 10.3.2007 kl. 21:38]

Elsku Gurrí mín

Ástarkveðjur til Davíðs, Hildu og fjölskyldunnar, hugurinn okkar er hjá þeim. Love-Lalla

[Guðríður Hrefna Haraldsdóttir, 10.3.2007 kl. 21:38]

Já, segðu, Anna mín! Þetta er búið að skemma ansi mikið fyrir honum í skólanum. Vona að hann haldi svo ótrauður áfram, þessi elskulegi tilvonandi tölvunörd. 

[Guðríður Hrefna Haraldsdóttir, 10.3.2007 kl. 22:42]

Takk, elsku Lalla mín!

[Hilda systir (IP-tala skráð) 11.3.2007 kl. 15:41]

Það bjargar deginum að lesa svona hlýjar og góðar kveðjur. Kærar þakkir.

Hilda, Davíðsmamma!!