Vindhviður og afmælisbarn dagsins

Fegin er ég að vera heima núna í stað þess að berjast í rokinu. Var að hugsa um að fá mér frískt loft ... taka strætó í kaffihúsið og ná sama vagni til baka með kaffi í götumáli ... Ég opnaði annan stofugluggann og fauk fram á gang ... þannig að það er ekki víst að maður hitti á strætó í slíkum vindi. Hviðurnar fara upp í rúmlega 30 m/sek á Kjalarnesi, sá ég á Netinu, þannig að það er öruggara að drekka kaffið sitt bara heima. Það á víst að fara að rigna líka og þá kemur sér vel að vera tilbúin með handklæðin.

Matarsnillingurinn og ein/n þeirra sem fékk mig til að horfa á Formúluna, Nanna Rögnvaldardóttir, á stórafmæli í dag og er loks orðin löglega miðaldra, samkvæmt tímatali ættarinnar minnar. Innilega til hamingju, Nanna! Eins og ég hef líklega 100 sinnum sagt vinum og vandamönnum þá hjálpaði Nanna mér stundum að gera dönskustíla þegar ég var í landsprófi á Sauðárkróki (þegar hún kom heim í frí frá MA) og það kom kennaranum mínum mjög á óvart hvað ég var misgóð í dönskunni.

Hér er mynd úr afmælinu mínu ... Nanna situr í sófanum, ásamt Gerði Kristnýju og Kristjáni. Afmælin mín eru stranglega bönnuð börnum þannig að Kristján heldur á dúkku sem líkist fallega syni þeirra hjóna. (Hann var alla vega þægur eins og dúkka).

Glæsikvendið sem stendur fyrir aftan sófann er gömul samstarfskona, Íris Alma, sem rústaði Moggablogginu fyrir nokkrum vikum og náði með ljóshraða á toppinn! Í speglinum má sjá andlitið af Hildigunni tónskáldi ...   

Athugasemdir

[Nanna Rögnvaldardóttir, 20.3.2007 kl. 11:18]

Takk, takk. En ég er reyndar búin að vera miðaldra árum saman ...

Svo má vitna í Mark Twain: ,,Age is an issue of mind over matter. If you don't mind, it doesn't matter.”

 Sé þig á föstudaginn, er það ekki?

[Ester Júlía, 20.3.2007 kl. 11:23]

Flott dúkka.  Mjög raunveruleg.  Hvar ætli maður fái svona?  Klikkað veður úti , ég þarf að fara út í búð en glætan að ég nenni því! Er sko í próflestrarfríi í vinnunni .  Til hamingju með daginn Nanna

[Guðríður Hrefna Haraldsdóttir, 20.3.2007 kl. 11:35]

Auðvitað kem ég á föstudaginn Annars heyrði ég ágæta konu (55 ára) segja að fólk yrði miðaldra um 35 ára aldurinn! Þetta skeið stæði yfir til 67 ára og þá yrði maður gamall! Samkvæmt þessu mun ég eiga miðaldra barn eftir átta ár! Jibbí!

Já, Ester, dúkkan var bæði ofboðslega sæt og mjög raunveruleg.  

[Steinunn Helga Sigurðardóttir, 20.3.2007 kl. 11:43]

bara ad kvitta, kær kvedja

steina

[Ester Júlía, 20.3.2007 kl. 11:52]

Samkvæmt lífeðlisfræðingnum mínum er fólk miðaldra í dag, 55 ára gamalt. Við erum nefnilega alltaf að verða eldri og eldri . ..

[Arna P (IP-tala skráð) 20.3.2007 kl. 11:56]

Til hamingju með vinkonu þína.

[Diana Sigurðardóttir (IP-tala skráð) 20.3.2007 kl. 12:10]

Gott að heyra að þú ert bara heima í sús og dús eins og kötturinn í ævintýrinu, hafði áhyggjur af því að þú værir að þvælast í strætó á Kjalrnesinu !! Brjálað veður þar eins og svo oft áður. Minnist feða á milli Skagans og Rvk. í gamla daga. Hafðu það bara gott heima með þitt heimalagaða kaffi.

[Kristín Katla Árnadóttir, 20.3.2007 kl. 12:31]

Til hamingju með vinkonu þína. verst með kaffið þitt

[Jenný Anna Baldursdóttir, 20.3.2007 kl. 12:33]

Rosalegt veðravíti þarna í himnaríki. Ég myndi slíta af mér handlegg til að fá að búa á svona stað.

[Sigþóra Gunnarsdóttir (IP-tala skráð) 20.3.2007 kl. 12:41]

Nú misstir þú af ævintýri og drama Gurrý mín. Ég fór ekki suður fyrr en með 9.47 vagninum og viti menn vorum langt komin í Grundahverfið þegar strætó fauk útaf já Gurrý við lentum úti í móa ekki kannski veður til að vera í piknik akkúrat þarna en svona fór það. Þvílíkt drama sem betur fer fann ég eftir smá leit :) nothæft öryggisbelti þannig að ég hentist ekki til hahaha en það meiddist enginn sem betur fer allt fór vel. Hafþór kom svo á lítilli rútu og sótti okkur og LÖGGAN kom og allt.  Svo keyrði elsku Hafþór okkur heim á Skaga og keyrði mig meira að segja alveg heim að dyrum hefur ekki treyst því að þessi miðaldra kona gæti fótað sig vel í rokinu. Jæja svo við erum báðar heima í dag og höfum það bara gott    Sjáumst vonandi á morgun í STRÆTÓ

[Guðríður Hrefna Haraldsdóttir, 20.3.2007 kl. 13:08]

Elsku Sigþóra mín!! Dúllan mín. Ég var að skrifa færslu um þetta ... vissi ekkert og sá síðan kommentið frá þér. Skellti því bara beint upp í færsluna ... nema ég breytti á tveimur stöðum Gurrý yfir í Gurrí!!! Hehehheeh. Hittumst kátar og hressar í fyrramálið, vona að þú jafnir þig fljótt á sjokkinu. P.s. Ég elska öryggisbelti!

[Hildigunnur Rúnarsdóttir, 20.3.2007 kl. 15:49]

haha, aldrei hefði ég tekið eftir mér nema af því þú sagðir þetta! 

[Guðríður Hrefna Haraldsdóttir, 20.3.2007 kl. 15:59]

Það þarf nú að stækka myndina til að það sjáist ... en þarna varstu heillin, falin í speglinum!