Mrs happy skatt-woman

20.3.2007 | 23:10

Skilaði skattframtalinu mínu áðan á Netinu og það hefur aldrei verið svona tryllingslega auðvelt. Eina sem ég þurfti að gera var að fara inn í heimabankann minn og senda skattinum alla mína vesælu bankasögu, hringja í Eignastýringu (elsku fasteignasöluna mína) og fá að vita hve há þóknun þeirra var þegar þeir seldu Hringbrautina fyrir mig. Búið!

Þetta hefur verið martröð síðan pabbi dó. Hilda systir hefur hjálpað mér, þessi elska, og einu sinni fékk ég endurskoðunarfyrirtæki til að gera þetta og það kostaði sitt ...

Réttið upp hönd sem elskið Skattstofuna??? Well, ég geri það! Vona líka að þetta kerfi geri á einhvern hátt skattsvikurum erfiðara fyrir, ég nenni ekki að standa ein í að borga allt; t.d. malbikun á götunum, skólakerfið og heilbrigðiskerfið. Hehehhehe, eða þannig.

Svíarnir eru víst ansi meðvitaðir um skyldur sínar gagnvart Skatta frænda og það er frekar algengt að þeir klagi hver annan, frétti ég, ef þá grunar að maðkar séu í mysunni. Vinur minn, eitt sinn bláfátækur námsmaður í Svíþjóð og býr þar enn, fékk lánaðan glæsibíl hjá vini sínum á meðan vinurinn brá sér úr landi. Góða nágrannakonan hans sem vissi hvað vinur minn var blankur lét skattayfirvöld vita af þessari grunsamlegu bifreið, samband þeirra var ekki nánara en það að hún vissi ekki að þetta væri lánsbíll. Þau mættu í heimsókn og spurðu út í bílinn. Brostu svo og kvöddu þegar ekkert reyndist vera athugavert. Vinur minn hætti að tala við góðu nágrannakonuna.

Skyldi vera eitthvað um þetta hérna? Eða er okkur kannski skítsama?

Flokkur: Bloggar | Facebook

Athugasemdir

Held okkur sé skít sama, öfundum bara þann sem á fína bílinn.....en gott hjá þér þetta með skilin á skýrslunni..........góður og nýtur þjóðfélagsþegnn

Annars held ég hafi verið að vinna með henni Sigþóru sem vildi ekki fara í pikknikk í dag í hávaðaroki. Við unnum saman á sjúkrahús-leikskólanum ef þetta er sú sama, ef svo er bið ég að heilsa henni.

Diana Sigurðardóttir (IP-tala skráð) 20.3.2007 kl. 23:17

Ég spyr Sigþóru bara í strætó í fyrramálið ...

Guðríður Hrefna Haraldsdóttir, 20.3.2007 kl. 23:18

Gerðu það, hún var alveg ótrúlega hress og skemmtileg.

Diana Sigurðardóttir (IP-tala skráð) 20.3.2007 kl. 23:19

Guð minn góður, sagan af bílnum er skelfileg. Er "þetta" sænska leiðin?

Þakka þér fyrir að hrista í mig kjark og að minna mig á að ég gleymdi að sækja um frest ... *gúlp*

Klara Nótt Egilson, 21.3.2007 kl. 00:52

Hér á landi held ég að algengast sé að klaga einstæðar mæður sem eru ekki skráðar í sambúð en búa samt sem áður með maka. Leikskólar eiga að tilkynna ef þeir hafi minnsta grun um svoleiðis, held örugglega að þeir hafi tilkynningarskyldu gagnvart skattinum en ég veit ekki hversu algengt það er að þeir klagi. Mér finnst hálfömurleg sagan af nágrannakonunni sem kvartaði yfir bílnum , þetta er jú ekkert nema öfund.

Ester Júlía, 21.3.2007 kl. 05:29

Fyndið að fátækustu "skattsvikararnir" séu eltir uppi og drepnir ... eða næstum því, einstæðu mæðurnar. Þær hafa það ógeðslega skítt og þegar þær lifa sæmilega mannsæmandi lífi (einhver karl kominn til skjalanna) þá verður allt vitlaust. Ja, hérna! Sorrí, gamlar minningar hrönnuðust upp ...