Gaman að vera tvíburi ...

21.3.2007 | 13:06

Ágætar kjötbollur í hádeginu og þær runnu ljúflega niður í félagsskap mjög sætra manna sem ég sat ein að allt hádegið.

Umræðuefnin voru svolítið kerlingaleg í fyrstu, eða svona umræðuefni eins og sumir halda að konur tali bara um, eða þar til mér tókst að ná þeim á betra plan. Nenni ekki svona nöldrandi körlum yfir engu ... og þvílíkt áhugaleysi á Formúlunni ... skil bara ekki svona karla, en sætir voru þeir samt!

Ég hefði ekki þurft að drekka Pepsi Max til að falla í hópinn

Einn við borðið er eineggja tvíburi. Þegar hann var nýbyrjaður með sinni heittelskuðu og þau bjuggu á Kjalarnesinu voru þau svo heppin að fá íbúð hins tvíburans (og kærustu hans) lánaða yfir helgi þar sem árshátíð stóð fyrir dyrum.

Hann fékk einstaklega kuldalegt augnaráð frá nágrannakonunni á sunnudeginum þegar hann dröslaðist þynnkulegur fram á gang, enn í ballfötunum því að það gleymdist að taka önnur með og með þessa líka flottu gellu með sér sem líktist ekki konunni á heimilinu nokkurn hlut!

Þegar bróðirinn kom síðan heim eftir að hafa lánað okkar manni íbúðina, sýndi nágrannakonan honum ómælda fyrirlitningu og þeim mun meira samúðaraugnaráð fékk vesalings sambýliskonan sem vissi greinilega ekki neitt ... Næsta dag fór sambýliskonan niður í þvottahús ... skömmu síðar mætti nágrannakonan ábúðarfull og sagðist ekki geta horft upp á þennan ósóma ... svo blaðraði hún öllu sem hún hafði orðið áskynja um helgina. Sambýliskonan fór að hlæja og sagði þetta bara eðlilegt, maðurinn hennar ætti eineggja tvíburabróður ... osfrv. Nágrannakonan hnussaði og trúði ekki einu orði. Þær eru stundum skrambi góðar þessar tvíburasögur!

Flokkur: Bloggar | Facebook