Miðvikudagar til mæðu ... megrunar, miðilsskapar og mittisminnkunar

Kvenlegt sjónvarpskvöld í kvöld! Ég, kvenleg fram í fingurgóma, velti því fyrir mér af hverju við konur látum telja okkur trú um að við höfum gaman af tilfinningaþrungnum Opruh-þáttum um megrun og slíkt. Og hvers vegna við erum taldar hafa gaman af því að sjá fólki breytt úr útlitsgölluðum einstaklingum í fullkomnar verur samkvæmt tilbúnum fegurðar-stöðlum. Enn einn útlitsþátturinn, nema leikinn, tekur við á eftir en þar eru firrtir fegrunarlæknarnir sem prakkarast einhver ósköp í einkalífinu á milli þess sem þeir fegra fólk, aðallega konur, auðvitað.

Hvaða samsæri eru í gangi, strákar? Erum við svona ljótar? Erum við svona feitar? Heheheheheh, hvað á maður að halda? Ég áttaði mig á stóra verslanasamsærinu fyrir nokkrum mánuðum, einmitt hérna á blogginu. Konur „elska“ verslunarferðir, karlar ekki. Allt í einu rann upp fyrir mér ljós ... með því að ljúga því að okkur að við vildum ólmar vera í búðum sleppa þeir við viðbjóðinn. Þarna er ég vissulega ekki að tala um Einarsbúð! Þar er gaman að koma til að kaupa í matinn!

Já, og þetta er ekki búið á miðvikudagskvöldum því að svo tekur við ofurkvenlegur spennuþáttur um miðilinn Allison sem finnur á sér hverjir eru vondu karlarnir og hjálpar saksóknaranum við að taka þá úr umferð. Hún er ekki svona klár ... hún er bara svona heppin að geta séð framtíðina. Ágætisþættir samt ...  

Það versta er samt eftir, eða kvensjúkdómaþátturinn ... Þá skelli ég mér bara í kalda sturtu og hugsa um fótbolta til að hormónarnir taki ekki öll völd! Aumingja karlmenn, þetta er algjörlega ónýtt sjónvarpskvöld fyrir þá ... nema þeir séu svo skynsamir að horfa á RÚV en á SkjáEinum er líka eitthvert kvenlegt kjaftæði!

Jamm, útrás kvöldsins var í boði Guðríðar sem ofbýður allt þetta estrogen á einu kvöldi ... þótt kvenleg sé!  

Athugasemdir

[www.zordis.com, 21.3.2007 kl. 23:01]

Er hægt annað en að væla yfir þessari kvenlegu færslu og mótþróa á kvenlegri fegurð!  Ég var að koma heim og Tomb Rider er í sjónvarpinu með ofur flottu Angelinu Jolie.  Ég ætla að verða svona töffari eins og hún með blæðandi vör!  Verst hvað mér finst blóð vont!

[Guðríður Hrefna Haraldsdóttir, 21.3.2007 kl. 23:09]

Now you´re talking! Angelina er flott!

[Kleópatra Mjöll Guðmundsdóttir (IP-tala skráð) 21.3.2007 kl. 23:09]

ójbarasata... held að estrogen framleiðslan mín sé fín hef ekki þörf á of stórum skammti að halda í boði stöðvar tvö.... meika ekki svona þætti nema kannski í örlitlum skömmtum örsjaldan.... held samt að ég sé ekkert minni kvenmaður fyrir vikið...

[halkatla, 22.3.2007 kl. 17:17]

svona þættir eru til þess að hlæja að en ekki lifa sig inní - það síðarnefnda gæti verið hættulegt.... nema náttúrulega Medium sem eru svo yndislega skemmtilegir afþví að Allison er alltaf í óðaönn að ala upp börnin og svona 

[Guðríður Hrefna Haraldsdóttir, 22.3.2007 kl. 17:27]

Ég meika alveg "kvenlegt" sjónvarpsefni ... en ekki ef því er troðið öllu á sama kvöldið!