Flottur Fiat, sviðsetning lögreglu og leigubílstjóri með minni

29.3.2007 | 20:37

Flottur Fiat, sviðsetning lögreglu og leigubílstjóri með minni

Missti af strætó 18 niður í Ártún skömmu fyrir hálffjögur og var bara flott á því þegar ég hringdi á leigubíl. Áður en gat romsað upp heimilisfanginu varð gemsinn batteríslaus. Gerðist ótrúlega djörf og bað mann sem stóð á stoppistöðinni með mér, líka búinn að missa af strætó, að lána mér bara gemsann sinn. Það var auðsótt mál. Maðurinn var ekki á leið upp í Mosfellsbæ, annars hefði ég boðið honum far.

Leigubílstjórinn: „Varst þú ekki alltaf í Sundhöllinni í gamla daga?“
Ég: „Ja, ég fór nokkrum sinnum … fyrir ógurlega mörgum árum! Svona 35 …“
Leigubílstjórinn: „Já, einmitt! Ég man líka vel eftir systur þinni.“

Er þetta ekki óhugnanlegt? Ef mér dytti í hug að fara huldu höfði, skipta um nafn eða eitthvað hefði það ekkert upp á sig. Sumir Skagamenn hafa sagt að ég hafi ekkert breyst síðan ég var lítil stelpa! Til hvers að leggja á sig að safna hrukkum og gráu hári með árunum til að fólk fari að virða mann? Mér er skapi næst að eldast ekki meira í útliti … það tekur því ekki!

Ég sá flottasta Fiat í heimi fyrir utan vinnustaðinn minn í dag.

Svo þegar ég hljóp niður á stoppistöðina til að ná ekkistrætó var „árekstur“ í fullum gangi. Fullt af löggunemum á fullu að skrá, mæla, álykta og hvaðeina.

Miðbærinn hvað? Það gerist allt í 110 Rvík!

Flokkur: Bloggar | Facebook