Haraldarbúð horfin - útdráttur úr Blóðskömm og bældum beddum

Nú er það ljóst að eldsupptök voru í Fröken Reykjavík, ekki í Pravda, og það ætti að slá á kjaftasögur um íkveikju skemmtistaðareigenda ...
Er alltaf veik fyrir slökkviliðsmönnum, finnst þetta algjörar hetjur. Löggur líka.

Bæði mamma, sem hringdi áðan, og konurnar indælu sem ég hitti í Skrúðgarðinum seinnipartinn töluðu með söknuði um Haraldarbúð sem var staðsett þar sem Pravda var/er. Þær sögðu mér frá snjalla tækinu þar, eins og lítilli lyftu, sem tók við peningum, hviss, bang og gaf svo til baka. Mjög nútímalegt og flott á þeim tíma. Man ekkert eftir að hafa heyrt um þessa búð, man bara eftir Karnabæ þarna í eldgamla daga. Segir mér að ég sé enn kornung.

Hitti Skagakonuna Ásu hárgreiðslukonu og Gróu prófarkalesara á DV í næstum þrjá áratugi og settist hjá þeim á kaffihúsinu á meðan Ásta lét kíkja á hóstann sinn á heilsugæslunni. Gróa er flutt í Hafnar í Hornafirði og var í bæjarferð.
Ásta kom til baka með lyfseðil fyrir pústi og ég heimtaði að fá að gefa henni kaffi og meððí fyrir bílfarið báðar leiðir í dag.  

 -   -   -   -   -   -   -   -   -   -   -   -   -   -   -   -   -   -   -   -   -   -   -   -

BLÓÐSKÖMM OG BÆLDIR BEDDAR: (takk, Jónsi)
Ridge er brjálaður yfir því að Tómas, sonur hans, kvæntist Gaby sem annars hefði orðið að fara úr landi (ólöglegur innflytjandi þótt hún hafi fæðst í landinu ... held ég) Lögfræðingar munu sjá um skilnaðinn og það strax. Ridge er ömurlegur.

Rétt áður en hjartalæknir Stefaníu kjaftaði af sér við Jackie pípti friðþjófurinn hans og Jackie fór á bömmer. Það munaði bara einni mínútu að henni tækist með viðbjóðslegum klækjum að rústa Stefaníu fyrir að rústa lífi Brooke og barnanna.

Sæti gaurinn sem bjargaði Taylor frá Ómari soldáni er orðinn ástfanginn af Bridget og reynir ákaft að ná henni frá Nick, segir Nick vera blýfastan í lífi tilvonandi tengdó og fyrrverandi kærustu (held að þau hafi ekki gifst) og barna hennar. Go, Bridget, go!!!  

P.s. Mikið er sjórinn fagurlega himinblár í dag. Ég elska hann! Sorrí, strákar.

Athugasemdir

[Jenný Anna Baldursdóttir, 18.4.2007 kl. 20:26]

Ég man bæði eftir peningavélinni og lyftunni sem sendi vörur á milli hæða.  En í Haraldarbúð voru leikfimibuxur fyrir Melaskóla seldar.  Úje

[Guðríður Hrefna Haraldsdóttir, 18.4.2007 kl. 20:39]

Miðborgargellan hún móðir mín (ólst upp á Laugaveginum) hefði nú alveg mátt kynna okkur Skagabörn sín fyrir Haraldarbúð í fátíðum höfuðstöðvarferðum ... kannski hefur hún haldið að búðin yrði eilíf ...

[Guðný Anna Arnþórsdóttir, 18.4.2007 kl. 21:30]

Oh, Haraldarbúð, oh, Haraldarbúð. Ja hussa sér amen, sagði stelpan. Ég man óljóst eftir þessari lyftu og reyndar líka kassanum. Þetta eru svo óljósar minningar, að ég held þær jaðri við að vera "false memories". Svona er ég nú bráðung, Gurrí mín, þó ég hafi ekki við að fela gráu hárin og stinna kinnar, sem síga suður eins og allt annað.

Já, slökkivmennirnir eru yndislegir. Hrikalegar hetjur og eins og slíkum sæmir, algerlega lausir við gort, grobb og über-töffarastæla. Svona eiga menn að vera. Þrautgóðir á raunastund. Þeirra heill.

[Egill Harðar (IP-tala skráð) 18.4.2007 kl. 21:43]

Já, þar fuðraði það upp. Nú er bara að sjá hvaða bákn þeir byggja þarna í staðinn. Vonum bara að það verði ekki óþarflega ljótt.

[Hugarfluga, 18.4.2007 kl. 22:50]

Leit út um gluggann í vinnunni minni í dag og hugsaði með mér "ó, þarna hefur einhver tekið of alvarlega beiðni um well done steik" og leit síðan undan. Æ, svo trist. En sem betur fer slasaðist enginn.

[Anna Ólafsdóttir Björnsson, 18.4.2007 kl. 23:03]

Höldum borgarstjóra við efnið, hann sagði í ,,hita" leiksins að hann vildi endurbyggingu. Ætla rétt að vona að hann standi við að vinna að því.

[Jenný Anna Baldursdóttir, 19.4.2007 kl. 01:49]

Sáuð þið Willis í slökkviliðsbúningnum?  One m-f sexy hunk

[Sigga (IP-tala skráð) 19.4.2007 kl. 02:59]

Það er ógó flott þegar sannleikurinn í B&B kemur í ljós.  Skandall með meiru og Sally fer í fýlu því hún fékk ekki að vera vitni að því.  Það er eftir eina eða tvær vikur minnir mig.........

[Guðríður Hrefna Haraldsdóttir, 19.4.2007 kl. 16:24]

Sannleikurinn um veikindi Stefaníu? Eða eitthvað enn alvarlegra? Úúúúú