Englar úti um allt

Símtal frá Flórens í dag: „Ég er heima að gera ritgerð og þú hringir bara ef þú þarft eitthvað!“
Maturinn frá henni í gær var svo vel útilátinn að ég gat hitað afganginn upp í kvöld. Flórens er gimsteinn, engill ... heitir reyndar Sigrún.

Það er enn vont að ganga og mér sýnist á öllu að það sé bara fáránlegt að reyna að komast í vinnuna á morgun. Get ekki setið nema í nokkrar mínútur í einu, hvað þá í 40 mínútur í strætó og þurfa svo að hlaupa/ganga hratt til að ná öðrum strætó ...  

Smiðurinn hleypti sér bara inn sjálfur eftir hádegi og er nú búinn að múra upp í gatið sem Glerhallarmenn gerðu fyrir mistök í vegginn.

Allt að verða matarlaust í kotinu og þá var bara leitað á náðir Einarsbúðar ... svona klukkutíma eftir að ég pantaði fór ég á fætur og eiginlega stóð við dyrabjölluna þegar sendill Einarsbúðar hringdi. Fékk svo góða hjálp við að ganga frá öllu frá sendlinum.

Held ég skelli mér bara í bólið núna með íbúfen í mallakút, hitakrem á bakinu og á hitapokann góða. Skemmtið ykkur vel við brimið á myndinni ... sjaldgæft hérna við Langasandinn en stundum koma nú ansi góðar svona skvettur yfir Faxabrautina sem liggur fyrir neðan Sementsverksmiðjuna.

Athugasemdir

[Bertha Sigmundsdóttir, 24.4.2007 kl. 20:18]

Æi, elsku besta Gurrí mín, mikið er leiðinlegt að heyra að þér líður ennþá svona illa. Við erum góðar saman, slappar báðar á sama tíma, ussussuss...en við hörkum þetta af okkur einhvernveginn. Gott að heyra að þú ert með svona góðan stuðning í kringum þig, og enn betra að vita að það er bara símtal í fullan ísskáp...

Ég vona að þér fari nú að líða betur, ég sendi þér alla mína góðu orku og vona að hún fari beint í bakið á þér og lækni þessa verki

[Gunna-Polly, 24.4.2007 kl. 20:23]

batakveðjur úr borg óttans

[Guðríður Hrefna Haraldsdóttir, 24.4.2007 kl. 20:24]

Sendi þér sömuleiðis fullt af bataóskum og orku og alles!!!

[SigrúnSveitó, 24.4.2007 kl. 20:27]

Sjórinn var ansi flottur hérna fyrir neðan þegar ég fór út að sækja Jóhannes rétt fyrir 4...einhverra hluta vegna varð mér hugsað til þín

Vona að þér batni fljótt, ljúfust

[Jenný Anna Baldursdóttir, 24.4.2007 kl. 21:33]

Rosalega er hún Flórens góð við þig.  Og Einarsbúð krúttleg að senda heim alveg eins og fyrir daga stórmarkaðanna þegar kaupmennirnir á hornu töldust til fjölskylduvina, tóku þátt í gleði og sorgum viðskiptavinanna.

[Anna Ólafsdóttir Björnsson, 24.4.2007 kl. 22:37]

Góðan bata, þú verður að vera orðin góð á laugardaginn 5. maí kl. 15 (ath. breyttur tími) í þrítugsafmælið hennar Hönnu sem haldið verður í sal Álftanesskóla (ath. breyttur staður) - óbreytt afmælisbarn!

[Guðrún Jóhannesdóttir, 25.4.2007 kl. 00:47]

Æ Gurrí mín, ætlar þetta ekkert að lagast hjá þér, þarftu ekki bara að láta pota aðeins í bakið á þér?  ég er að læra Bowen og það virkar oft ansi vel á svona lagað  ;)

Kveðjur af Sunnubrautinni :) 

[Guðný Anna Arnþórsdóttir, 25.4.2007 kl. 01:38]

Á ég að senda Æsu á þig? Hún læknar allt, getur allt, ber með sér bjarsýni, kraft og trú. Mögnuð manneskja. Viltu?

In the meantime: góðan bata, góða íbúfenvímu, þú ljósa man ! (þú veist að maður þarf ekki að vera blondína til að vera hið ljósa man.....)

[www.zordis.com, 25.4.2007 kl. 06:14]

Ljótt er að vera svona slæmur í bakinu,það skemmir nánast allt   Láttu þér batna og njóttu velvild góðra manna og kvenna !!!

[Ólafur fannberg, 25.4.2007 kl. 08:03]

væri alveg til i að synda þarna hehe

[Ester Júlía, 25.4.2007 kl. 08:16]

Æ hræðilegt að heyra þetta með þig GurrÍ mín.  Vonandi fer þetta að lagast.  Vinkona mín fékk þurstabit um daginn og það jafnaði sig á eitthverjum dögum. Komst ekki í vinnu í nokkra daga þó.    Æðisleg þjónustan þarna í Einarsbúð! 

Ps. Geggjuð mynd í blogginu. 

[Steingerður Steinarsdóttir, 25.4.2007 kl. 09:51]

Láttu þér batna Gurrí mín. Vona sannarlega að þetta skrambans tak fari að ganga yfir.

[Guðríður Hrefna Haraldsdóttir, 25.4.2007 kl. 11:20]

Þetta er allt að koma! Ég þigg Æsu, frú Guðný Anna! Einarsbúð er best ... og ég kem sko í afmæli Hönnu.