Af tertum, gjöfum og girnilegri Bolungarvík ...

Mikið var þetta góð og dásamleg fermingarveisla! Ég var fyrir fram dómhörð gagnvart tertununum (en mætti samt) því að ég vissi að sjálf fermingartertan væri með döðlum í botninum og stóra ávaxtamarengstertan með súkkulaðirúsínum. Hilda sá við dekruðu systur sinni og bjó til sérstaka perutertu með súkkulaðifrómas ...  og svo voru náttúrlega brauðtertur, of kors! Gleymdi myndavélinni en Ellen frænka ætlaði að senda mér myndir sem ekkert bólar á! Amma Peters kom alla leið frá New York og brast í grát af gleði þegar hann fór að taka upp glæsilegar fermingargjafirnar og eiginlega trylltist af gleði þegar hann fékk óvænt Play Station 3. Hilda hafði boðið fjölda fólks svo að Peter fengi alvörufermingarveislu.

Ef það er eitthvað sem Hilda kann þá er það að hrekkja fólk gjafalega séð ... en hún sagði Peter að ákveðinn pakki á borðinu væri hluti af borðskreytingu, svona upphækkun, þannig að Peter átti ekki von á tölvunni (þótt hún væri efst á óskalistanum), svo rétti hún honum „borðskreytinguna“ og bað hann um að opna hana.

Peter er tímabundið fósturbarn hjá Hildu og er samt með ættarhúmorinn! Hann sagði mér blákalt þegar ég argaði af hrifningu yfir veisluborðinu að hann hefði verið að baka alla síðustu nótt. Peter hefur átt erfitt að ýmsan hátt og er m.a. næstum því blindur. Hann getur horft á sjónvarp með því að vera næstum því upp við það og getur því notið þess að vera í Play Station-leikjum. Þessi elska.

Frú Soffía Vagnsdóttir frá Bolungarvík var í veislunni, enda þekkir hún Peter síðan hann bjó í Bolungarvík um tíma. Hún keyrði mig heim á Skagann og kíkti aðeins á himnaríki áður en hún hélt áleiðis vestur með æðislegum syni sínum sem á þann flotta afmælisdag 11. september. Soffía er virðulegur skólastjóri í grunnskólanum þar og er auk þess í bæjarstjórn. Náfrændi minn (við erum bræðrabörn) er sýslumaðurinn á staðnum og svo þekki ég bæjarstjórafrúna. Ég er alvarlega að hugsa um að flytja til Bolungarvíkur þar sem ég þekki allt fína fólkið á staðnum ... þar sem ég sæti stöðugt í veislum, hugsið ykkur samkvæmislífið á minni ... múahahhahahaha! Svo ef ég færi t.d. á brjálað fyllerí og bryti allt og bramlaði yrði það þaggað snarlega niður af því að ég væri í klíkunni og þyrfti ekki að sitja í steininum! Svo finnst mér líka visst öryggi í því að fá pottþétt ástarviku á hverju ári!  

Athugasemdir

[SigrúnSveitó, 28.4.2007 kl. 22:49]

Frábært að heyra að Peter átti góðan dag

[Jenný Anna Baldursdóttir, 28.4.2007 kl. 22:52]

Til hamó með ástarvikuna og Bolungavík og svo slefar þessi sykursjúka (sko diabetes ekki svona geðveik löngun í sykur) yfir öllum krásarlýsingunum og fer og fæ mér jarðaber.

[Anna Ólafsdóttir Björnsson, 28.4.2007 kl. 22:55]

Gaman að sjá að þú áttir líka svona yndislegan dag í dag.

[Ester Júlía, 28.4.2007 kl. 23:03]

Skelfilegt að lesa bloggið þitt og Jórunnar!  Kökur og aftur kökur.  Ég er með vatn í munninum og fer að sofa með vatn í munninum ( skal fara að sofa með vatn í munninum) , er komin með annan fótinn í buxnaskálmina ( var háttuð) og á leiðina í sjoppuna að kaupa súkkulaði..verð að standast þetta !

Hló mig máttlausa af gjafahrekknum hennar Hildu, þvílík SNILLDARhugmynd!! 

[Guðríður Hrefna Haraldsdóttir, 28.4.2007 kl. 23:06]

Svo fékk ég hálfa veisluna með mér í töpperverdollum (mínus döðlur og rúsínur) ... gott að vera með þeim síðustu út, múahahahhaha! Hilda var líka með dásamlegt kaffi frá Kaffitári, nýju espressóblönduna sem kom svona líka vel út í venjulegri uppáhellingu!

[Hrönn Sigurðardóttir, 28.4.2007 kl. 23:10]

Mér líst vel á þessa ástarviku á Boló.... Ég flyt bara með þér!

[Hrönn Sigurðardóttir, 28.4.2007 kl. 23:11]

PS - ég er ekki að segja að ég sé ástfangin af þér

[Hrönn Sigurðardóttir, 28.4.2007 kl. 23:12]

Ekki það að mér líki neitt illa við þig.......

hætta núna?

ok

[Guðríður Hrefna Haraldsdóttir, 28.4.2007 kl. 23:14]

Þú mátt alveg halda áfram eins og þú vilt! Hahhahaha!

Ég held að það sé passað upp á í Bolungarvík að allir fái sitt þessa viku ... hmmm, ekki amalegt það! Múahahahahha 

[Jónsi (IP-tala skráð) 28.4.2007 kl. 23:42]

Er þetta þá bara eins og hjá sauðfénu - þ.e.a.s. leitt undir í eina viku...

P.s. Hvort kynið er leitt undir?

[Gerða Kristjáns, 28.4.2007 kl. 23:43]

Helgarkvitt eftir langt rot

[Guðríður Hrefna Haraldsdóttir, 28.4.2007 kl. 23:49]

Þetta heitir víst að hleypa til, Jónsi minn, og mikið fjör þessa ástarviku! Fullt af börnum og barnabörnum koma undir, skilst mér, en aðalatriðið er samt skemmtunin við þetta allt saman!

[Jónsi (IP-tala skráð) 28.4.2007 kl. 23:52]

Börnum og barnabörnum...????? Ertu þá að meina að afi og amma eru líka að gera "bíb bíb" ???

[Ragnheiður , 28.4.2007 kl. 23:53]

Vó ! þekkirðu bara allan aðalinn í Boló ? Frábært að fermingardagurinn gekk svona vel og piltur ánægður með sitt.

[Guðríður Hrefna Haraldsdóttir, 29.4.2007 kl. 00:21]

Ég fattaði ekki hvað ég networkaði við Bolungarvík fyrr en í bílnum áðan ... heheheh.

Já, Jónsi, afar og ömmur fá sko sitt líka! Hvernig heldur þú annars að barnabörnin verði til, ég bara spyr?!!?

[Jónsi (IP-tala skráð) 29.4.2007 kl. 01:01]

Nú náttúrlega Þegar börnin eru að leika sér - þess vegna má ekki fara í læknisleik!!! Ég hélt að allir vissu þetta

Að barnið geti barnað barn

barnaskap má kalla,

að halda að barnið barni barn

barnið getur varla.

[Sigríður Jósefsdóttir, 29.4.2007 kl. 20:40]

Jæja já, Pálína systir Sossu leiðir lista Íslandshreyfingarinnar í kjördæminu góða mín, og svo þekki ég sýslumannsfrúna, við erum skólasystur (sýsli hélt reyndar langa ræðu yfir Ómari mínum um vegagerð um Arnkötludal í síðustu reunion, en það er önnur saga).  Kveðjur vestur á Skaga, (við þurfum að fara að drekka kaffibolla saman, skrepp á Skagann við fyrsta tækifæri, erum að plana fund)

[Guðríður Hrefna Haraldsdóttir, 29.4.2007 kl. 23:24]

Frú Sigríður!!! Alltaf hjartanlega velkomin í kaffi!!! Flytur þú ekki bara með mér vestur?