Morgunsprengju varpað, grátur og gott hopp

Við norpuðum úti í „hlýjunni“ á strætóstoppistöðinni í morgun. Það var ekki fyrr en ég lét sprengjuna falla sem karlarnir mínir gleymdu kuldanum. „Tommi bara hættur að keyra strætó!“ sagði ég með grátstafinn í kverkunum.

„Æ, æ,“ sagði einn þeirra, „Tommi er svo fjári skemmtilegur!“ Svo grétu þeir í fanginu á mér þar til strætó kom ... Það er alltaf skrýtið að sjá karlmenn gráta, enda er ég alin upp við að karlar eigi að vera tilfinningalausir spýtukarlar. 

--------------                   ------------                     --------------                     ----------------  

Ásta situr oftast fremst en þegar ég hlammaði mér við hlið hennar í morgun var hún í næstfremstu sætaröð. Mikið fór illa um lappirnar á mér á leiðinni, þetta var eins og í flugvél ... þarf að tala alvarlega við hana svo að þetta endurtaki sig ekki. Hún er sætaveljarinn, enda kemur hún inn á fyrstu stoppistöð hjá Skrúðgarðinum!

Ferðin í bæinn gekk fáránlega vel ... við erum nokkrum mínútum á undan brjáluðu átta-traffíkinni og það munar um það.

        ---------            ----------------            -------------

Við Sigþóra stukkum út á ferð við Vesturlandsveg og létum okkur rúlla niður vegkantinn. Hressandi morgunleikfimi, maður vaknar sko almennilega við þetta ... eða myndi gera ef bílstjórinn væri aðeins ævintýragjarnari!

Athugasemdir

[Kristín Katla Árnadóttir, 30.4.2007 kl. 09:59]

Æ það er leiðinlegt að Tommi sé hættur að keyra strætó.

[Guðríður Hrefna Haraldsdóttir, 30.4.2007 kl. 10:07]

Já, alveg hundfúlt! Hann er svo skemmtilegur.

[Jenný Anna Baldursdóttir, 30.4.2007 kl. 10:59]

Það kemur manneskja í manneskju stað Gurrí mín.  Hugsaðu þér kona, etv kemur einhver strætóbílstjóri sem er tabula rasa, þið vitið ekkert um hann.  Heldurðu að það verði fjör hér á blogginu þegar þú ferð í rannsóknarvinnuna og við fáum svínspennandi pistla um viðkomandi.  Ég get ekki beðið.  Vona að bílstjóri nr. 2 verði amk jafn skemmtilegur og Tommi, leyndardómsfullur, með sægræn augu óendanleikans eins og hafið, feiminn, undurblíður og keyri ykkur upp að dyrum.  Smútsj.

[Hrönn Sigurðardóttir, 30.4.2007 kl. 12:21]

En..... hvað fór Tommi að gera?

[www.zordis.com, 30.4.2007 kl. 13:10]

Þótt að maður komi í manns stað þá er oft söknuður sem við hin þurfum að díla við!  Vona bara að Tommi meiki það í því sem hann gerir næst!

[Saumakonan, 30.4.2007 kl. 13:33]

hmm.... spáðu í ef nýji bílstjórinn verður kona!!!   ó ó ó.... karlarnir þínir gætu orðið ástfangnir!

[Guðríður Hrefna Haraldsdóttir, 30.4.2007 kl. 13:40]

Hey!!! Ég svaraði kommenti hér fyrr í morgun en mér var hent út af eigin bloggi (eða gleymdi að ýta á Senda).

Tommi er farinn að keyra olíubíl, þessi elska!

Það væri mjög spennandi ef nýi bílstjórinn er kona. Þá getum við barist grimmilega um strákana í strætó!!! Úhú!!!

[Heiða B. Heiðars, 30.4.2007 kl. 14:04]

Kannski nýi bílstjórinn verði ævintýragjarn, getur þá æft strætóstökk út um allann bæ

[Hrönn Sigurðardóttir, 30.4.2007 kl. 14:22]

hvernig hljómar strætóteygjustökk? Þið bindið ykkur í teygju við komuna í vagninn og skutlið ykkur svo reglulega út alla leið í mosó

smá jaðarsport.....

[Ólafur fannberg, 30.4.2007 kl. 14:26]

strætóstökk nýtt sport,verð að prófa það hehehe

[Steingerður Steinarsdóttir, 30.4.2007 kl. 15:40]

Mikið var gott að þú skyldir vera þarna til að hugga þá.

[Jóna Á. Gísladóttir, 30.4.2007 kl. 18:59]

Ég bara verð að spyrja að þessu Reykvíkingurinn sjálfur: er fólk að taka strætó alla leið frá skaganum. Ég bara spyr? hvað tekur það langan tíma? Og hvar vinnurðu? og hvernig gengur að ná strætó til baka seinnipartinn. Vilt þú ekki bara taka að þér að keyra vagninn fyrst Tommi er hættur? Sakna kisurnar þín ekki þegar þú ert svona lengi í burtu? Vill smiðurinn ekki flytja til þín á meðan hann vinnur verkið? Eða býr hann kannski á Skaganum? Kannski vill hann frekar keyra strætó? Kynntistu Sigþóru og Ástu í strætó?

[Guðríður Hrefna Haraldsdóttir, 30.4.2007 kl. 19:13]

Það tók mig stundum 30 mínútur að komast úr Vesturbænum í vinnuna, skammt frá Ártúnsbrekku. Núna er ég 40 mínútur á morgnana í fyrstu ferð frá Akranesi (kl. 6.47). Blunda í þægilegri rútu fullri af Skagamönnum. Fékk helmingi stærri íbúð en ég átti í bænum sem var 2 millj. ódýrari og sofna nú við sjávarnið í stað umferðarhávaðans við Hringbraut. Og hef flottasta útsýni í Evrópu. Er aðeins lengur heim en ég næ leið 15 í Ártúni kl. 1/2 4 eða 1/2 5 og næ Skagavagninum 20 mínútum seinna frá Mosó. Ég þori ekki að keyra strætó. Kisurnar sofa allan daginn og eru sáttar ef þær hafa nægan mat. Kona smiðsins myndi örugglega ekki sætta sig við ef hann flytti til mín. Já, ég kynntist Sigþóru og Ástu í strætó en þekkti þær smá í gamla daga þegar ég bjó hérna frá 2ja-12 ára. Sjúkkittt, svarar þetta öllu, krúsídúll? 

[Jóna Á. Gísladóttir, 30.4.2007 kl. 20:03]

hahaha. Bjóst ekki við svona greinargóðum svörum en nú get ég svo sannarlega snúið mér að öðrum verkefnum í kvöld, sátt og sæl. Takk fyrir það. Ótrúlegt hvað við Reykvíkingar getum verið full of it og alltaf talið að Rvk sé miðpunktur alheimsins. Mér finnst þetta stórkostlegt hjá þér og nákvæmlega þetta með helmingi stærra húsnæði fyrir miklu minni pening en betra en Rvk íbúðin þín að öllu leyti. Good for you Skagamær

[Guðríður Hrefna Haraldsdóttir, 30.4.2007 kl. 20:08]

Ég flutti líka vegna þess að það kom strætó! Þegar ég frétti af því fannst mér þetta mjög góður möguleiki, vinna í bænum og búa í himnaríki! Sama og ekkert af geitingum og býflugum ... og ferlega gott fólk sem býr hérna!

[Guðný Anna Arnþórsdóttir, 30.4.2007 kl. 21:44]

Og svalir með pálmatrjám og sundlaug, og kaffihús og Flórens næturgali í næsta húsi. Gurrí, þú gefur Akranesi nýjar og áður óþekktar víddir, - hefurðu ekkert komið til greina sem bæjarlistamaður á Skaganum?