Varið ykkur á fornleifafræðingum

Þótt ég sé í opinberu stríði við veðurfræðinga vegna kuldakastsins sem þeir kölluðu hitabylgju á dögunum hef ég svo sem ekkert út á fornleifafræðinga að setja þótt ég ætli að deila með ykkur dagsannri sögu af því þegar ég átti í nánu sambandi við einn slíkan.

Þegar ég kynntist fornleifafræðingnum mínum fann ég fljótlega að honum þótti ég eiginlega of ung. Samt vorum við á sama aldri. Eftir að við byrjuðum saman rýndi hann stundum í andlit mitt og sagði mig of barnalega af þrítugri konu að vera. Eðlilegar konur væru komnar með fleiri árhringi. Fyrst hélt ég að þetta væri öfugsnúið hrós en svo áttaði ég mig á því að honum var rammasta alvara. Með því að sofa lítið og hætta að nota dýr andlitskrem fann ég að ást hans á mér jókst. Mér fannst alveg magnað að hann væri ekki á eftir mér vegna útlitsins, eins og aðrir menn. Vinkonur mínar dauðöfunduðu mig af honum.  

Mamma kom oft í mat til okkar og hann var mjög ljúfur og góður við hana. Mér þótti vænt um það til að byrja með en svo varð hann of ástúðlegur við hana. Hann sagði að hún liti út eins og þrítug kona ætti að gera og horfði þýðingarmiklu augnaráði á mig. Mamma var að sleppa sér af gleði og ég varð að grípa til róttækra aðgerða svo að hann yrði ekki stjúpfaðir minn.

Næst þegar hann heimtaði að ég byði mömmu í mat hringdi ég í hana og sagði að við værum komin á hráfæði og borðuðum kjúklinga-sushi í hvert mál. Vildi hún koma og borða með okkur? Hún vildi það ekki.

Fornleifafræðingurinn var ekki mjög virkur elskhugi. Kvöldunum fannst honum best eytt í að fitla við antíkdótið mitt sem ég hef sankað að mér í gegnum tíðina.

Eitt kvöldið fékk ég eina af snjöllu hugmyndunum mínum. Ég fór í ísjökulkalt bað í tíu mínútur, vafði síðan sárabindum utan um mig og lagðist grafkyrr í rúmið. Þetta virkaði ótrúlega vel og hann varð eiginlega alveg óður.

Nokkrum dögum síðar þegar ég lá á sjúkrahúsi með heiftarlega lungnabólgu kom hann í dyrnar á sjúkrastofunni og hélt á blómvendi. Augnaráð hans var undarlega reikult. Hann kastaði á mig kveðju en í stað þess að koma inn á stofuna sneri hann við og ég sá síðast til hans þegar hann rauk eftir ganginum og afhenti krúttlegri konu sem studdist við göngugrind blómin. Lyflæknisdeildin var á sama gangi og ellideildin, ég hefði átt að sjá þetta fyrir.

Þarna lauk sambandi okkar.

Hann sagði mér nokkru síðar, þegar við hittumst fyrir tilviljun á Hringbrautinni, að sambandið við mig hefði bara verið djörf tilraun, hann hefði langað til að prófa eina unga og svo hafi hann líka gælt við þá hugmynd að kvænast mér til að geta haft af mér helming antíkmuna minna.

Ég vara við fornleifafræðingum.

Athugasemdir

[SigrúnSveitó, 4.5.2007 kl. 22:57]

Sko, fyrst...mér finnst veðrið búið að vera ÆÐI.  Yndislegt vorveður.  En kannski vegna þess að ég horfi ekki á veðurfréttir og veit því ekki hverju var búið að lofa...

Ómægod, já, eins gott að varast fornleifafræðinga...!!!  Greinilega stórhætturlegur *þjóð*-flokkur á ferð þarna!! 

[Jónsi (IP-tala skráð) 4.5.2007 kl. 23:21]

Ææ, hélt að þetta væri þín náttúrulega fegurð - á ekki að fara að vefja utan af sér?

P.s. Þú hefur náttúrulega ætlað að vefja manngreyinu um fingur þér....

[Svava S. Steinars, 5.5.2007 kl. 00:05]

Hef þetta í huga Gurrí.  Er að fara á grímuball á morgun, ef ég sé fornleifafræðing mun ég hlaupa hratt í hina áttina !

[Guðríður Hrefna Haraldsdóttir, 5.5.2007 kl. 00:45]

Gangi þér vel að forðast þá ... í hvernig grímubúningi ætlar þú? 

[Jenný Anna Baldursdóttir, 5.5.2007 kl. 01:00]

Ég hef alltaf verið smá svag fyrir fornleifafræðingum.  Er andlegur hrumi.

[Guðríður Hrefna Haraldsdóttir, 5.5.2007 kl. 01:04]

ja, nú veistu hvernig þeir eru ... þú ert allt of ung fyrir þá! Bíddu í 30 ár!

[Ólafur fannberg, 5.5.2007 kl. 09:44]

stórhættulegir þessir fornleifafræðingar

[Svava S. Steinars, 5.5.2007 kl. 09:56]

Ég verð brúður Frankensteins

[Laufey Ólafsdóttir, 6.5.2007 kl. 03:15]

Takk fyrir þetta! Hef líka verið í kuldakasti en mér hlýnaði við þennan góða hlátur! Fornleifafræðingar semsagt algert nónó svona framyfir sextugt , skal muna það.

[Bertha Sigmundsdóttir, 6.5.2007 kl. 17:36]

Ég skal forðast þá eins og heitan eld, en ég hef aldrei komist í kynni við svona gæja. Ég sé það að þú reyndir allt til þess að eldast nógu mikið fyrir hann, kannski áttu eftir að hitta hann eftir tuttugu ár, who knows, kannski verðurðu þá nógu gömul fyrir hann...