Lottóvinningur, tvær veislur og ritstíflulosandi styttan

Guðdómlegur dagur frá A til Ö. Steig upp í strætó í góðu veðri á Skaganum og út úr honum í allt öðru veðurbelti ... í roki og rigningu! Næsti sem segir að það sé alltaf rok á Skaganum verður kýldur.

Byrjaði á því að kaupa mér lottómiða í Kringlunni og tékkaði á því í leiðinni hvort ég hefði fengið vinning á gamlan miða. Jú, jú, ég hafði unnið 360 krónur. Til að halda upp á það fór ég í snyrtivörubúð og keypti mér kellingadót fyrir 12.000 kall! Allt algjörlega ómissandi! Ég fékk dúndurþjónustu frá konunum í Hygeu og var máluð svo flott af snyrtifræðingi búðarinnar að ég sló öllum við í fegurð í afmæli Hönnu og það var ekkert áhlaupaverk.  

Hilda sótti mig rétt fyrir þrjú í Kringluna, áður hafði ég keypt tvær baðbombur (í lush) handa mömmu en hún á afmæli í dag! Klara bloggvinur afgreiddi mig og pakkaði þeim rosaflott inn. Hún lofaði að fara að blogga aftur. Moggabloggið hefur ekki verið samt eftir að hún tók pásu.

Veisla Hönnu var sjúklega flott, eins og sést á myndinni, og þrátt fyrir að afmæliskakan hafi verið með hnetum og jarðarberjatertan með döðlum eyðilagði það ekki gleði mína. Bakarinn var beðinn um að gera flotta og góða afmælistertu, engin skilyrði sett ... Anna lofaði mér því að segja honum á mánudagsmorguninn að einn gesturinn (ég) hefði látist í veislunni vegna hnetuofnæmis. Það þarf að passa upp á þessa bakara! Ég fór samt og fyllti diskinn minn þrisvar, svo mikið úrval var af tertum. Óli, bróðir afmælisbarnsins, 28 ára, bakaði heilan helling en hann er svona karlmaður sem hefur hendur.

Síðan fórum við Hilda í afmælið til mömmu og ég laug því blákalt að ég hefði borðað voða lítið í hinu afmælinu. Gat því borðað snittur og jarðarberjatertu mínus döðlur af bestu lyst.

Áður en ég kvaddi Hönnu afhenti hún mér styttuna góðu frá Búdapest, þessa af óþekkta rithöfundinum ... maður snertir pennann sem hann heldur á og ritstíflan hverfur. Ómissandi fyrir blaðamenn! Ef þessi færsla verður fáránlega löng er það allt styttunni að kenna. Hanna ætlar að kaupa svona styttu fyrir Katrínu Snæhólm fljótlega. Þegar ég heimsæki Katrínu og kó næst kem ég færandi hendi. Þetta er stór og þung stytta, ég hélt að hún væri MIKLU minni!
Svo fékk ég far með Hönnu og ömmu hennar, Þórunni, á Skagann. Þær kíktu aðeins inn og þáðu ... vatnssopa en hvorug drekkur kaffi.

Svona eiga Formúlulausir laugardagar að vera. Næsta laugardag verður reyndar allt vitlaust. Kosningar, Formúlutímatökur, Landsbankadeildin, Evróvisjón, kosningakvöld ... nokkurn veginn í þessari röð.

Athugasemdir

[Jenný Anna Baldursdóttir, 5.5.2007 kl. 22:11]

Vó, vó kona þú heldur áfram að ofsækja í mér bragðlaukana.  Ég bókstaflega slefa.  Bara 12.000 karl í Hygeu (já ég er að segja að þú sért nísk)?

Takk fyrir færslu.

[Guðríður Hrefna Haraldsdóttir, 5.5.2007 kl. 22:12]

Keli, minntu mig á að kýla þig í klessu næst þegar ég sé þig ... heheheheh!

Ertu að meina þetta, Jenný? Ég mun ekki kaupa snyrtivörur í ár að minnsta kosti eftir þetta eyðslusukk.  

[Björg K. Sigurðardóttir, 5.5.2007 kl. 22:21]

Var að lesa að einhver hefði fengið 21 milljón í lottóvinning og strax og ég sá fyrirsögnina á blogginu þínu var ég viss um að það hefði verið þú og myndir að því tilefni halda tvær risaveislur fyrir bloggvini þína

[Katrín Snæhólm Baldursdóttir, 5.5.2007 kl. 22:29]

gurrí mín ég bíð óendanlega spennt eftir styttunni góðu svo ég geti farið að skrifa heimsbókmenntir. Það bíða svona 17 bindi í kollinum á mér og ef ég fer ekki að gera eitthvað róttækt við þessari stíflu.. og nei ég vil ekki heyra neitt um öll góðu ráðin þín með þessa laxerólíu þína...þá gleymi ég þessum bókum bara og þær eyðast upp áður en þær verða að nokkru!!! Eru þetta flatkökur með hangiketi þarna á veilsuborðinu??? Gossshhh..hvað mig langar í flatköku með hangiketi!!!!

[Guðríður Hrefna Haraldsdóttir, 5.5.2007 kl. 22:49]

Þegar ég kem út til þín, Katrín mikla, mun ég taka flatkökur og hangikjöt með, æ promisss!

[Jóna Á. Gísladóttir, 5.5.2007 kl. 23:11]

Slef slef. Bannað að birta svona myndir. Þakka almættinu fyrir að ég er sjálf að fara í afmælisveislu á morgun. Læt mér því nægja rauðvínssopann núna. Til hamingju með mömmu.