Rússnesk kynni, ekki ólétt og nýr bókaflokkur

Undarleg tilviljun... ég hálfpartinn svaf yfir mig í gær, eða tók þá yfirveguðu ákvörðun vegna þreytu að taka strætó kl. átta í stað sjö. Svo svaf Ásta yfir sig í morgun, ekki mikið, en ætlaði á bílnum og bauð mér far. Ég var komin í strætó þegar sms-ið kom frá henni, alveg að verða komin ofan í göngin. Þegar maður sefur yfir sig þarf að velja ögn skárri tíma en þetta til að vakna.

----              -------              ------------             ------------

 

Ég hugsa að ég hefði valið að fara samferða henni, hlusta á Led Zeppelin og spjalla. Sat við hliðina á rússneskri konu (held ég) í strætó, voða sætri og ljúfri. Samskiptin voru í gegnum bros. Hún sat við gluggasætið og fór út í Mosó ... þetta hefði getað verið vesen ... en ég ákvað að hleypa henni ljúflega úr sætinu þótt ég hafi yfirleitt meira gaman af því að neyða fólk alla leið í bæinn með mér.

 -            -              -              -                    -

 

Sama veðurblíðan að vanda á Skaganum en í veðurbeltinu sunnan við rör var allt annað upp á teningnum... bara rigning. Til að hræða engan Reykvíking vil ég benda á að þetta er ekki súrt regn ... bara rómantísk og yndisleg rigning, lóðrétt þar að auki. Ég er alltaf eitthvað svo sæt á morgnana núna ... síðan ég eyddi stórfé í snyrtivörubúðinni á laugardaginn. Það er bara vandræðalegt að koma inn í strætó númer 18. Þeir fá næstum tár í augun karlarnir af hrifningu. Strákarnir í Skagastrætó eru vanari mér þótt þeir hrífist auðsjáanlega, þeir vita fram yfir hina gaurana að ég er óforbetranleg piparjúnka.

 

Ég á tíma klukkan 14.15 í Heilsugæslunni á Akranesi. Ég er ekki ólétt, sver það. Miðað við dásamlega óléttu íslenskrar konu á sextugsaldri (sjötugsaldur er hið nýja miðaldra, segir Eva frænka) verð ég að passa mig á strákunum.

Fæðingar aldrei fleiri en nú í sumar, segir Fréttablaðið. Aðrar fréttir segja að ekki takist að manna sjúkrahúsin og þurfi að draga seglin enn meira saman. Vonandi skammast ríkisstjórnin sín fyrir þetta afleita ástand í heilbrigðismálum. Urrrr!

 

Ég er eiginlega handviss um að bókaútgáfur blómstri samt á þessu ástandi og fari að gefa út Do it yourself-bækurnar. T.d. í fæðingarhjálp, uppskurðum, hjartaþræðingum, botnlagaskurðum, að setja saman fótbrot og gifsa o.fl. o.fl.

---------------------------------------                              ------------------------

Jæja, best að vinna á fullu núna, fyrst ég þarf að taka hádegisstrætó heim.

Athugasemdir

[Ingibjörg Gunnarsdóttir, 10.5.2007 kl. 09:50]

Ég er svo glöð í hjarta mínu að þú sért ekki ófrísk núna - enda nógur tími fyrir okkur ungu stelpurnar.  Ég ætla að bíða fram að sextugsaldrinum........

[Kristín Katla Árnadóttir, 10.5.2007 kl. 10:08]

Ég var að kaupa mér snýrtivörur  það er alltaf  mikið að gerast hjá þér Gurrý mín.

[Katrín Snæhólm Baldursdóttir, 10.5.2007 kl. 11:01]

Ég er einmitt að upplifa það hvernig er að vera yndisfögur bæði að utan sem innan. Er komin með neglur og lakk á þessr fínu klær og það er erfitt að pikka á lyklaborðið. En þetta gera konur í banka alla daga svo ég hlýt að geta þetta líka. Í gær fékk ég nýtt sjampó hárnæringu og einhvern úða með fyrir blástur og í morgun nýtt gloss. Verður maður eitthvað fegurri?

Að innan rennur svo spriklandi vatn með múslíi og ávöxtum um æðar mér og það er sólskin í kolli mínum. Og ég er ekki mjög létt en ólett er ég samt ekki. Við erum flottastar og eigum enn tuttugu fín ár áður en við verðum" hið nýja miðaldra". Lífið er gott.

[Jenný Anna Baldursdóttir, 10.5.2007 kl. 13:08]

Það hlýtur að vera erfitt að vera svona afburðafögur.  Enginn friður fyrir strákunum nottla.  Ef ríkisstjórnin verður áfram við völd þá er eins gott að fólk fari að kynna sér "dúitjorself" bókmenntir, hvað varðar hjartaþræðingar, uppskurði ofl. óáran (biðlistarnir kona).

[Doddi - Þorsteinn G. Jónsson (IP-tala skráð) 10.5.2007 kl. 14:18]

Eru botnlagaskurðir ekki eitthvað fyrir netaframleiðendur eða fiskveiðimenn?

[Guðrún Geirsóttir (IP-tala skráð) 10.5.2007 kl. 15:12]

Sæl - datt niður á síðuna þína einhern tíma í andleysiskasti og hef lesið hana af einstakri gleði og ánægju allar götur síðan. Átti í nokkur ár heima í næsta himnaríki við þig og hef því deilt með þér útsýninu þó ég hafi kvatt Skagann fyrir göng og strætó. Það er spurning um að fara að þínum ráðum og flytja aftur til baka með köttinn.

Það getur vel verið að þú sért ekki með vinninginn í fjöldavinsældatölunni á blog.is - en þú ert sú eina sem ég skoða daglega þar (heyrðu nú hætti ég svo þú haldir ekki að ég sé ein af strákunum í númer 18).

Bestu kveðjur og áfram með smjörið!

[Guðríður Hrefna Haraldsdóttir, 10.5.2007 kl. 18:49]

Hæ, Guðrún, endilega komdu upp á Skaga aftur, það er æðislegt að búa hérna! Takk fyrir innlitið.

Það er ekkert erfitt að vera svona fögur, Jenný, auðveldar margt ... Doddi, þú misskilur, botnfiskveiðar er eitt, botnlangi annað ...