Horfnar svalir og óvænt páskaegg

Óvæntur hússtjórnarfundur klukkan hálftíu í kvöld. Þar kom m.a. í ljós að búið er að rífa niður gömlu svalirnar mínar sem snúa í austur og ég tók ekki eftir neinu ... hef líka sama og ekkert tollað inni í stofu síðan allt þetta vesen hófst, suðursvaladyr og slíkt. Svo neyðist ég til að fara að sofa fljótlega til að ég geti vaknað snemma því það á að dúndra upp nýjum svölum, litlum og sætum, strax í fyrramálið. Og það er kosningadagur og Formúla og fótbolti (ÍA-FH) og Evróvisjón! Kannski ég kjósi bara á meðan mesti hávaðinn gengur yfir, það þarf að bora í gegnum svaðalega þykkan vegg. Líklega langar mennina til að komast í Skotastúku, sjá leikinn alveg frítt og drekka góða kaffið mitt á meðan. Það er alveg velkomið.

Hússtjórnarfundurinn var voða næs, Níels formaður bauð upp á kaffi og páskaegg! Var nú að vonast eftir rækjusalati en það eru ekki alltaf jólin, stundum þarf að afplána páska.

Mikið býr nú gott fólk hérna í húsinu. Ég tek aftur að það búi alltaf leiðinleg kerling eða ömurlegur karl í hverju húsi. Upplifði það nokkrum sinnum en þetta hús er sannkallað himnaríki. Frétti að einu sinni hefði staðið til að gera tilboð í allar íbúðirnar og gera lúxusrándýrasnobbarablokk, enda er staðurinn góður, en ekkert varð úr því. Langt síðan, held ég.

Mun því demba mér í háttinn eftir nokkrar mínútur og pína mig til að vakna fyrir allar aldir, svona um níuleytið, og það á laugardegi. Mun án efa dorma yfir kosningasjónvarpinu annað kvöld.

Athugasemdir

[Ágúst H Bjarnason, 12.5.2007 kl. 00:28]

Gott kvöld mitt íðilfagra fljóð. Ég vona að það hafi ekki verið svalirnar sem snéru að mér sem voru látnar fjúka. Hvernig eigum við þá að geta horfst í augu í stjörnusjónaukum okkar? Er þetta ekki augað þitt hér fyrir neðan sem blasti við í augngleri hins ofursterka sjónauka míns?

Ástarkveðjur frá Vingólfi  (austan fjalls og sunnan mána).

[Guðríður Hrefna Haraldsdóttir, 12.5.2007 kl. 00:32]

Essgan mín, ég verð sko með tvennar svalir frá og með morgundeginum og þá verður fjör í himnaríki, alla vega einstaklega hreint loft. Kannski verða litlu svalirnar tilbúnar þegar leikurinn hefst um tvöleytið á morgun, hver veit. Við getum haldið áfram að haldast í augu yfir hafið um ókomin ár!

[Ágúst H Bjarnason, 12.5.2007 kl. 01:01]

Mikið er ég feginn að heyra þetta. Ég mun stilla fókusinn næstu kvöld.

Vingólf tóku
Viðars þegnar,
Fornjóts sefum
fluttir báðir;
iðar ganga,
æsi kveðja,
Yggjar þegar
við ölteiti.

Veist þú ekki allt um Hrafnagaldur Óðins?

[www.zordis.com, 12.5.2007 kl. 08:11]

Þú getur smellt sín hvorri fléttunni út þegar riddarar biðla til þín með blóm og konfekt!  Æðisleg íbúðin þín

[Katrín Snæhólm Baldursdóttir, 12.5.2007 kl. 08:57]

Tvennar svalir???? Þýðir það þá tveir elskhugar og daður bæði bæði austur og vestur á sama tíma. Þú lifir ekkert venjulega viðburðarríku lífi frú Guðríður. Vona að þú hafir sofið vel og notir atkvæði þitt vel í dag og haldir með FH!!!!

[Guðríður Hrefna Haraldsdóttir, 12.5.2007 kl. 09:30]

Tvennar svalir, tveir elskhugar ... of kors. Daður í suður og daður í austur! 

Anna, það er sko ekki hryllilegt að búa nálægt íþróttavelli, bara stuð þegar andstæðingar okkar móðgast yfir tapinu alltaf hreint og reyna að leggja bæinn í rúst. Löggan er alltaf svo vel á verði þannig að það tekst illa. Svo erum við  með ágæta hreinsunardeild líka. Heilu öskubílarnir bíða tilbúnir til að stafla upp FH-ingunum í dag ef þeir reyna .... að sigra ...  

[Jenný Anna Baldursdóttir, 12.5.2007 kl. 10:23]

Af hverju finnst mér ekkert undarlegt við að þú hafir ekki vitað að svalirnar væru farnar???? Svo mikið þú eitthvað.  Njóttu dagsins.

[Guðríður Hrefna Haraldsdóttir, 12.5.2007 kl. 10:50]

Hahhaahhaah, þú þekkir mig bara ansi vel. Er ekki annars gáfumerki að vera utan við sig? Vona það ...