Hrukkur Brads, sætir Bretar, bold og óvænt skutl fyrir okkur Ástu

Var eitthvað svo rosalega snemma á ferðinni eftir vinnu og komin upp í Mosó næstum 40 mínútum fyrir brottför Skagastrætó, allt Halldóri frænda að kenna. Engir bekkir neins staðar til að sitja á í Mosó nema í strætóskýlinu og þangað settist ég með þykka kilju, Tvíburana. Frábær bók um tvíbura sem eru aðskildir í æsku, konur sem hittast fyrir tilviljun á heilsuhæli og rifja upp minningar sínar. Önnur bjó í Þýskalandi og hin í Hollandi. Er bara búin með nokkra kafla og er alsæl só far.

Anna hringdi og þegar hún frétti af þessari bið minni heimtaði hún að fá að skutla mér á Skagann. Svona á maður nú góða vini. Ásta hoppaði svo áður út úr leið 15 og ég lofaði upp í ermina á Önnu að hún fengi far með. Fannst einum of langt gengið að bjóða tryllingslega sætu Bretunum á stoppistöðinni með í bílinn en þeir voru að fara á Esjuna. Þeir segja ekki lengur Eisja, ekki eftir að ég barði inn í þá réttan framburð.

Ásta bauð okkur Önnu upp á kaffi á trépallinum sínum og við nutum sólarinnar í hálftíma eða svo. Ásta fór eitthvað að rifja upp það sem hún gerði mér fyrir tæpu ári þegar hún ætlaði að koma mér út! Þá kynnti hún mig fyrir góðum manni sem kom meira að segja og eldaði mat heima hjá mér. Það hét ekki ástarmál, heldur Ástumál. Einhver þrjóska hljóp í okkur bæði, vildum ekki láta hleypa okkur til ... eða eitthvað. Held að hlutirnir hefðu gengið frekar upp ef við hefðum dottið hvort um annað í Einarsbúð ... eða ég t.d. bjargað lífi hans á einhvern máta, t.d. niðri á Langasandi. Veit samt ekki hvernig ég gæti troðið aðdáanda inn í þéttskipaða dagskrá mína, verð að láta mér nægja að lesa um sæta stráka eða horfa á sæta stráka í myndum. Annars var Ellý að horfa á nýja mynd með Brad Pitt og sagði hann hafa elst alveg ógurlega illa, Angelina Jolie hefði líklega farið svona með hann. Hmmm, útlitsdýrkunin komin í strákadeildina líka. Við tölum reyndar aldrei um svona hluti svona dagsdaglega, enda frekar ómerkilegt umræðuefni.

Þetta skutl hennar Önnu lengdi daginn heldur betur. Við vorum komnar í gegnum göngin þegar strætó var að leggja af stað úr Mosó!

Nú bíð ég spennt eftir afdrifum Hope litlu og líka því hvort Eric reynir meira við fyrrverandi tengdadóttur og eiginkonu, hana Brooke. Eða hvort sonur hans, ekki blóðtengdur, rífur hana frá honum. Eftir að ég sá inn í framtíðina og komst að því að Nick, sem nú er að fara að kvænast Bridget, dóttur Erics og Brooke, verður senn hinn nýi Ridge sem bæði Brooke og Taylor eiga eftir að slást um. Þátturinn var að hefjast. Eric segir Bridget að hann hafi beðið móður hennar en hún hafi sagt nei. Brooke þarf mann í líf sitt, segir Eric, sérstaklega svo að hún stingi ekki undan Bridget. Brooke hefur gert Nick ábyrgan og fleygt honum út af sjúkrahúsinu. Nú háskælir hann í kaþólskri kirkju og rifjar upp góðar stundir með barninu sem Brooke á með manni sem deitaði dóttur hennar, Deacon.  Hope litla vaknar og fyrstu orð hennar eru auðvitað: Nick, Nick. Allt bendir til þess að tilraun Bridget til að giftast Nick renni út í sandinn. Hann endar með Brooke!  Og svo Taylor og líklega aftur Brooke. Hvaða kvennaflokkur bíður Ridge í framtíðinni? Við bíðum bara spennt!

Athugasemdir

[Jenný Anna Baldursdóttir, 14.5.2007 kl. 17:49]

Þetta er nú meiri stóðlífið á þessum boldurum.  Ég get bara ekki lesið þennan veðbjóð

[Guðríður Hrefna Haraldsdóttir, 14.5.2007 kl. 18:09]

Verð bara að fara að skrifa um Nágranna ... sápuna sem kemur á eftir boldinu. Mér ofbýður líka!

[Ólafur fannberg, 14.5.2007 kl. 22:08]

[Guðný Anna Arnþórsdóttir, 14.5.2007 kl. 22:09]

Ég er ær og slæ mér á lær, - ekki frá því að mér sé eiður sær. En þú ert mér kær.

[Guðríður Hrefna Haraldsdóttir, 15.5.2007 kl. 13:30]

Bjargvættur Taylor, listmálarinn, kemur sterkur inn fyrir Bridget. Þeim tókst ekki að giftast, henni og Nick. Alltaf eitthvað. Ridge greyið er bara fórnarlamb aðstæðna og þarf að taka ákvörðun sem fyrst hvort hann velur Brooke eða Taylor. Dauðlangar að hvísla að honum að Nick sé í þann veginn að stela hjarta þeirra beggja ... og hvað verður þá um vesalings Ridge. Vonandi kemur í ljós að hann er ekki blóðfaðir tvíburanna, hann gæti þá deitað þær til skiptis! Það yrði nú spennandi. (Kræst)

[Sigga (IP-tala skráð) 15.5.2007 kl. 15:01]

oj Guðríður  gæti samt alveg gerst. Merkilegt með þetta sápufólk alltsaman hvað það fer lítið af bæ. Þetta er eins og í Mývatnssveit til forna... parast allt innbyrðis. Merkilegt hvað litlu sápukúlurnar eru fagrar... ætti að vera úrkynjað með hala og horn.