Frosið sjónvarp, góðar kiljur og guðdómlegur granni

Ég fékk skemmtilega, eiginlega guðdómlega æðislega, sendingu rétt fyrir kvöldmat. Sveitamærin, hún Sigrún Flórens, sendi mér fiskrétt sem átti eftir að elda inni í ofni. Hún hefur bloggað um þennan fiskrétt (karrí, sveppir, brokkoli) og ég slefaði áfergjulega á kommentakerfinu hjá henni en var ekki búin að prófa þetta sjálf. Vá, þvílíkur fiskréttur, líklega sá besti sem ég hef smakkað og sá fallegasti og sumarlegasti! Takk, elsku Flórens!

Heroes-þátturinn er farinn út í einhverja vitleysu, því miður. Týpískt, um leið og eitthvað nær vinsældum er reynt að teygja lopann út í það óendanlega! Ég nennti ekki að láta Lost plata mig lengur og hef lifað góðu lífi í nokkrar vikur án þess þáttar. Nú eru það eiginlega bara fréttir, 24 og mánudagskvöldin sem stjórna lífi mínu. Sorrí, bévítans boldið líka.

Ákvað að hlusta á American Idol á meðan ég vinn en vantar sárlega kafarann Fannberg til að busla fyrir utan Langasandinn. Speglun á sjónum veldur því að myndin frýs ... Nágranni minn í hinni risíbúðinni er tölvunörd og notast við eitthvað svo miklu fullkomnara en loftnet og það frýs aldrei neitt hjá honum. Það var fínt að fá hann í heimsókn (þrátt fyrir tímasetninguna: hálftíma fyrir Evróvisjón), ég varð enn ánægðari með himnaríki á eftir. Það var svo gaman að gaman að heyra hann hrósa því.

Það bíða mín bækur í hrönnum, eins gott að ég fer í sumarfrí eftir þriðjudaginn næsta.

Nú var ég að fá Sakamálaþrautir, glæpsamleg heilabrot, í hendurnar. Ohhhhh, hvað ég hlakka til að lesa hana og pæla svolítið í morðum og glæpum.

Ég lýsi yfir velþóknun minni með alla þessa dásamlegu kiljuútgáfu undanfarin misseri.

 Það er svo undarlegt að horfa út um gluggann núna. Fallegir litirnir, sjórinn blár og fjólublár og himinninn eitthvað svipaður. Gleymi því aldrei þegar Erró sagði einu sinni í viðtali að fyrsta verkefni hans í listaskóla erlendis var að mála himinn og hann þurfti að nota 3.000 tilbrigði af bláum lit ... eitthvað svoleiðis, kannski 300 ...  

Athugasemdir

[SigrúnSveitó, 14.5.2007 kl. 22:46]

Gaman og gott að heyra að þér líkaði rétturinn

[Hrönn Sigurðardóttir, 14.5.2007 kl. 22:47]

mér finnst alltaf svo skringilegt að eitthvað sé í hrönnum - hvað þá þegar hrín við hrönn

[Guðríður Hrefna Haraldsdóttir, 14.5.2007 kl. 22:50]

Hahahhahah, má ég nota þetta orð áfram, kæra Hrönn?  

Já, þetta var snilldarréttur ...  

[Hólmgeir Karlsson, 14.5.2007 kl. 23:11]

ég slefa (áfergjulega) hér í kommentið .....  kannski fæ ég líka fiskrétt, he he  ...

[Jenný Anna Baldursdóttir, 14.5.2007 kl. 23:27]

Eftir stendur spurningin hvað ertu að æða í sumarfrí svona snemma?  Ertu að fara eitthvað?

[Guðríður Hrefna Haraldsdóttir, 14.5.2007 kl. 23:31]

Já, Hólmgeir, mætum óvænt til Sigrúnar eitthvert kvöldið. Ég skal njósna hvenær hún eldar þetta næst. Eða þú kemur bara í mat til mín.

Jenný, ég er orðin lúin eftir erfiðan og skemmtilegan vetur ...vantar þrjár vikur til að hlaða batteríin. Tek rest síðar. Ætla bara að vera heima og dingla mér. Kannski taka himnaríki ofsavel í gegn ... liggja í sólbaði á nýju svölunum ... lesa, lesa, lesa! Tók fríið mitt líka snemma í fyrra og fannst það rosalega gott. Ég er meiri áhugamanneskja um innivist en útivist þannig að sólin í júlí truflar mig ekki frá hamingjuríkri vinnunni!

[hildigunnur (IP-tala skráð) 15.5.2007 kl. 09:04]

haaa, ég er ósammála með Heroes. Við erum gersamlega límd við það (en steinhætt að horfa á Lost, samt)

[Guðríður Hrefna Haraldsdóttir, 15.5.2007 kl. 12:18]

Þolinmæði mín minnkar hraðar yfir sumartímann, alveg búin að sjá það. Enn var kalt úti þegar ég hætti að horfa á Lost. Mun halda áfram að horfa á Heroes þangað til ég fatta eitthvað plott um að þættirnir muni ganga í þrjú ár áður en kemur að uppgjörinu sem allt stefnir á, sprengjan og það allt!