Góðir skankar ...

15.5.2007 | 22:36

Grilluðu skankarnir voru voða góðir, salatið æði og bökuðu kartöflurnar dúndur. Annars á Alexandra, eldri dóttirin, heiðurinn af því að hafa grillað, hún sá um það á meðan móðirin gerði sósur og salat.

Við kíktum í Bónus-vídeó til að kaupa okkur ís í eftirmat. Þar kom í ljós að Ellý hafði unnið 750 kall í lottói. Veit ekki hvað er í gangi. Ég vann svipaða upphæð um daginn og hún núna. Þetta veit á eitthvað ... Ísinn var rosalega góður en hann fæst bara yfir sumartímann. Skagamenn virðist vera lystarlausir á ís þegar kalt er úti. Það var mikill hátíðisdagur hjá Ellýju þegar sumardagurinn fyrsti rann upp. Hún var fyrsti viðskiptavinur dagsins, held ég. Ís er ágætur, fæ mér stundum barnaís en yfirleitt ungbarnaís!

Fékk að setja nokkra miða um sumarbúðirnar á áberandi stað í Bónus-vídeó. Nú stendur skráning yfir og gengur bara vel. Vona að Skagamenn verði duglegir að senda gömlu Skagastelpunni börn. Kannski að börnin sem hún passaði í denn eigi sjálf börn á sumarbúðaaldri? Ef þið hafið áhuga þá er hægt að kíkja á www.sumarbudir.is. Ef þið farið á myndasafnið þá hef ég tekið margar myndirnar en bara þessar góðu ... Ég verð örugglega þarna meira og minna um helgar í sumar. Þetta er besti staður í heimi. Hver haldið að leiki dulbúnu spákonuna á 17. júní? Þessa sem segir stelpunum ekki endilega að þær geti orðið flugfreyjur eða hjúkkur ... heldur læknar og flugmenn ... hehehehe. Innrætingin í hina áttina er nógu mikil og það er flott að geta aðeins svona ... hmm ... Vildi að einhver hefði sagt mér þegar ég var lítil að ég gæti orðið kjarneðlisfræðingur, mamma var voða hvetjandi en þegar ég ólst upp sá ég t.d. aldrei kvenkynslækni á spítalanum á Akranesi!

Ellý ætlar að vinna í sumarbúðunum í sumar og sjá um karaókíkeppnirnar og kannski myndlist. Hún hefur unnið þarna meira og minna öll sumur í bráðum 10 ár.

Ohhhh, hvað ég hlakka til heimsóknanna þangað í sumar!

Flokkur: Bloggar | Facebook

Athugasemdir

Ég reyndar strauk úr Ölveri ... í heilan hálftíma og hékk í rigningu inni í runna í nágrenninu. Við vorum t.d. allar læstar inni í svefnskála með eina skúringafötu til að pissa í. Hún var alltaf full þegar ég loksins vaknaði og kannski hálftími í að konurnar vöknuðu til að hleypa okkur út. Þar fyrir utan minnir mig að þetta hafi verið ágætt! Systir mín ákvað að stofna sérstakar sumarbúðir þar sem er mikið að gera allan daginn en börnin geti alltaf valið hvað þau vilji gera. Fara í sund, búa til skartgripi, fara í gönguferð og ég man ekki hvað og hvað ... Þetta hefur virkað og er yfirleitt fullt út úr dyrum hjá henni. Það er líka flott að hafa eingöngu fullorðið fólk til að gæta barnanna. Þau eru öruggari þannig og mjög lítið um heimþráð ... eins og það er kallað.

Guðríður Hrefna Haraldsdóttir, 15.5.2007 kl. 23:05

Gaman að skoða vefsíðu Sumarbúðanna!

Ágúst H Bjarnason, 15.5.2007 kl. 23:23

Óska ykkur stelpunum góðrar skemmtunar í sumar. Flott sumarbúðir. Hvernig skankar voru þetta (þú gleymir aðalatriðinu manniskja). Lamb eða eitthvað annað?

Jenný Anna Baldursdóttir, 15.5.2007 kl. 23:32