Samkvæmistímabilið, Feng Shui og ... stefnumót

Stoppistöðin mín var full af körlum í morgun. Þegar ég mætti á svæðið stóðu þeir kyrrir og horfði á steinahrúgu fyrir framan einhvern bílskúr. Ekki þarf nú mikið til að skemmta þessum elskum. Að sjálfsögðu sneru þeir sér að mér þegar ég birtist þótt ekki væri ég í hælaháum skóm eða með rauðan varalit, Skagamenn þurfa ekki slík blekkingartæki til að meta sanna fegurð. "Hvað sagði bílstjórinn í gær þegar þú bentir honum á að öryggisbeltin virkuðu ekki sums staðar?" spurði einn þeirra með rómantískum hreim. "Nú, hann sagðist ætla að koma þessu til skila," svaraði ég daðursfull og svo kom strætó. Allt í lagi var með öryggisbeltið mitt í morgun, kannski eitthvað búið að laga ... Labbaði með gerviliðasmiðnum frá Vesturlandsveginum og við skiptumst á sögum um byltur og dettirí úr brekkunni. Hann virðist líka vera sæll með bílstjórana sem flestir aka ögn lengra en stoppistöðin segir til um okkur til þægindaauka og minni slysahættu.  

Heldur var þetta stutt sumar ... en ég er þakklát fyrir fallegar öldur í gær og fyrradag. Stórar og háværar Miðjarðarhafsöldur sem einstaklega gott var að sofna við í gær. Ég verð að snúa rúminu aftur þannig að ég geti horft á sjóinn þegar ég er að fara að sofa ... og snúa því svo til baka þegar næturnar verða dimmar aftur. Betra Feng Shui eins og það er núna með höfðalagið í suður en ekki vestur ...  vestur er víst versta áttin mín, sagði mér ógurlega vitur kona. Hún bætti þó við að það skipti ekki öllu máli ... verra væri að snúa hausnum í rétta átt og vera ósátt við það! Ekki það að ég trúi á svona ... þetta er bara skemmtilegt og margt mjög lógískt. Þetta er eins og skynsamlegum ráðum hafi verið breytt yfir í eitthvað galdradæmi.

Rauði liturinn á Bagua-kortinu stendur fyrir suður, sá dökkblái norður.

Ég á einn strætómiða eftir ... tókst ekki að kaupa Gula kortið (sem virkar í hálfan mánuð), það var aldrei til, eins gott, sumarfríið hefst á morgun. Man ekkert hvað ég ætla að gera á morgun, líklega sofa til hádegis, en ég á stefnumót við karlmann á fimmtudaginn (jesssss) í Reykjavík og fer síðan í stúdentsútskriftarveislu á föstudag hjá elskunni henni Möggu Völu minni, dóttur Gumma bróður. Ég hélt að samkvæmistímabilinu væri lokið í vetur en það er greinilega misskilningur.

 

 

 

Athugasemdir

[Ester Júlía, 22.5.2007 kl. 08:58]

Helduru í alvöru að sumarið er búið?  *dæs* .. ja kannski bara.  Og nú fáum við bara snjóstorm, haglél og hríðarveður útí eitt.  Spurning um að fresta sumarfríinu fram að jólum..lengja jólafríið?   Ég var lengi að átta mig á snjónum í gærmorgun, hélt þetta væri þokuslæðingur, svona hvítur og fallegur

[Guðríður Hrefna Haraldsdóttir, 22.5.2007 kl. 09:05]

Bara í morgun kom slydda á framrúðuna á strætó ... en bara á Kjalarnesinu. Ekki vetrarguðs útvalda þjóð þar.

[Jenný Anna Baldursdóttir, 22.5.2007 kl. 10:10]

Gurrí mín samkvæmistíma vetrarins er lokið og nú hefst samkvæmistímabíl sumarsins hvíta.  Rosalega verður gaman að hafa þig í sumó!  Þá verður nú bloggað í himnaríki maður minn.

[Doddi - Þorsteinn G. Jónsson (IP-tala skráð) 22.5.2007 kl. 10:45]

Daðursfull ... og með rómantískum hreim .... hversu yndisleg þú ert að búa til svo rómantískar og skemmtilegar lýsingar af hversdagslífinu !

[Kristín Katla Árnadóttir, 22.5.2007 kl. 11:00]

Skemmtilegar lýsingar alltaf hjá þér Gurrí mín

[Nanna Rögnvaldardóttir, 22.5.2007 kl. 11:38]

Þú mátt nú alveg kíkja í heimsókn við tækifæri. Jafnvel í kvöldmat. Þarft ekki einu sinni að hjálpa mér að saga í sundur eldhúsinnréttinguna í staðinn.

[Guðríður Hrefna Haraldsdóttir, 22.5.2007 kl. 12:04]

Takk, Nanna ... tek þig örugglega á orðinu, er orðin sársvöng eftir Nönnumat.

[Jóna Á. Gísladóttir, 22.5.2007 kl. 20:46]

Tek heilshugar undir með Dodda.