Sumarboðinn besti

Nú er runninn upp sá tími árs sem ég þarf að ganga í síðerma. Skrifborðið er við gluggann, hægri handleggur snýr að sólinni og nú er hann að verða kaffibrúnn á meðan sá vinstri er eins og undanrenna að lit.

 

Enn einn sumarboðinn birtist í morgun þegar krúttleg smábörn fjölmenntu á hlaðinu sunnanmegin. Dagur Bláfánans svo loks sjá Skagamenn hvaðan vindurinn blæs, minnihluti okkar þó, eftir að strompurinn var felldur. Vonandi fær Bláfáninn að vera uppi í allan vetur líka. Ströndin er vottuð bláfánaströnd allt árið nefnilega (og mikil þörf fyrir að sjá hver vindáttin er yfir vetrartímann).

 

Fyrsti kaffibolli dagsins var alltílæ en þessi númer tvö miklu betri. Ég er óðum að læra. Eftir að ég flóa mjólkina þarf að ýta á takka og láta vatn renna úr freyðistútnum þar til ljós kviknar og ... Alls konar svona er að komast inn í vöðvaminnið. Verst að ég er með frekar dýrt og fínt kaffi í þessum tilraunum mínum. Nú bíð ég bara eftir Einarsbúð með fullt af vörum sem ég pantaði, m.a. nýmjólk (aldrei léttmjólk í kaffi, bara alls ekki) til að geta búið til þann þriðja og kannski besta.

 

Vinkona mín fullyrti í gær að allur kaffikorgur ætti að fara í vaskinn, ekki í ruslið, losa þannig um stíflur og fitu og annað í pípunum ... ég var ekki alveg sannfærð en steingleymdi að spyrja elsku píparann sem kom í tíu mínútur í morgun, alltaf eitthvað.

 

Málarinn kemur eftir gluggaskiptin sem standa nú yfir hjá húsfélaginu, og eftir það get ég loksins látið mæla fyrir og keypt rúllugardínu. Sólin er að drepa mig, Costco-viftan bjargar mér og afskaplega ósmekklegt „gluggaskraut“ sem inniheldur bókabunka, flík á herðatré og mynd sem færist vestar eftir því sem sólin hreyfir sig. Vona að gestir Guðlaugar og Langasands og áhorfendur á völlinn lyfti höfðinu aldrei nógu hátt upp til að þeir sjái.

 

Hvernig kemur maður af stað rigningu? Ég er búin að prófa að vökva gróðurinn hérna úti, skilja eftir liggjandi hrífu með tindana upp (sem getur alveg verið fyndið) og hengja út þvott ...  ekkert virkar 

Athugasemdir

[Þorsteinn Briem, 20.5.2021 kl. 18:02]

BA-ritgerð um kaffi og kaffikorg

Er gott eða vont að nýta kaffikorg í garðinn til ræktunar? - Vísindavefurinn

11.6.2020:

Reykjavíkurborg vill að borgarbúar geti flokkað lífrænt sorp í sérstakar tunnur

[Guðríður Hrefna Haraldsdóttir, 21.5.2021 kl. 10:41]

Hmmmmm, takk. En má korgur fara í vaskinn? :) 

[Þorsteinn Briem, 21.5.2021 kl. 12:12]

Undirritaður lætur ekkert sorp fara í vaska, hvorki lífrænt né annað, þannig að á mínu fróma heimili stíflast vaskar ekki.

En rúmlega klukkutíma eftir athugasemd undirritaðs hér í gær birtist þessi frétt:

Til skoðunar að við öll heimili á höfuðborgarsvæðinu verði fjórar sorptunnur, fyrir pappír, plast og málma, lífrænt og blandað sorp