Hugleiðingar um hárgreiðslufólk og annað gott fólk

Nú hefst vika hins mikla dekurs. Það er margt hægt að gera en ég er frekar andlaus, finnst ég dekra við mig á hverjum degi. Ef þið hafið einhverjar vænar hugmyndir sem innihalda ekki vélsleðaferð á jökli, gönguferðir í fárviðri eða sundferð og heitan pott þá væri vel þegið að fá eitthvað í kommentahornið.

Þetta hefst svo sem ekki nógu vel. Eini lausi tíminn í klippingu strax er klukkan níu í fyrramálið, arggg. Ég ætla að láta mig hafa það í von um smá höfuðnudd ... ummmm. Sumir kalla klippingu dekur, ég lít reyndar meira á það sem skyldu. Fór síðast hjá elskunni honum Skildi Eyfjörð núna fyrir síðustu jól en þá var hárið komið á það stig að vera bara flott ef ég hafði sofnað með það blautt ...

Einu sinni var ég með indæla hárgreiðslukonu ... nema hún talaði mikið um að ég ætti að gera meira fyrir sjálfa mig, elska mig meira og slíkt. Ég skildi aldrei almennilega hvað hún átti við, við þekktumst sama og ekkert. Kannski hefur henni þótt þetta bera vott um umhyggju fyrir kúnnunum ... en svakalega var þetta þreytandi. „Mundu svo að fara vel með þig, þú átt það skilið!“ voru iðulega kveðjuorð hennar. Fallega sagt en samt fannst mér þetta óvirðing og á endanum skipti ég um klippara. Svona misskilningur á hamingjustigi kúnnans er samt bara fyndinn. Kannski hefur þessi elska lesið yfir sig af sjálfsræktarbókum. Mér finnst líka óþægilegt þegar hálfókunnugt fólk gerir sér dælt við mig á þennan hátt, eins og það viti allt um líf mitt og reyni sitt til að stjórna því. Ef hún hefði bara vitað um allar trylltu hamingjustundirnar sem ég átti yfir nýjum spennubókum, ilmandi kaffi og í þægilegum sófa. Um samverustundir með góðu vinunum og margt fleira.

Ég er yfirleitt alltaf í góðu skapi en það er eins og sumir eigi erfitt með að trúa því. Einu sinni hitti ég gamlan vin á djamminu og hann spurði hvernig mér liði. „Bara ljómandi vel,“ svaraði ég. Þá fór hann að skamma mig fyrir að vera svo yfirborðskennd, ég segði alltaf bara allt gott. Ég var voða sár því að mér datt ekki í hug að fara að barma mér við hann yfir blankheitum, ástarsorg eða einhverju slíku sem ég var eflaust þjáð af, ekki svona á djamminu og ekki við hann, við vorum engir trúnaðarvinir. Nógu margir glíma við alvörusorgir og áhyggjur og því finnst mér engin ástæða til að væla yfir smámunum við kunningja.

Anna, guðdómleg vinkona til rúmlega 20 ára, á afmæli í dag.

Til hamingju, elsku krútt. Einnig Árni Magnússon, fv. félagsmálaráðherra, en við unnum saman á Stjörnunni í gamla daga og var hann hinn vænsti maður þótt hann hataði lagið To know him is to love him!

Þið frábæru manneskjur, til hamingju með afmælið!

Athugasemdir

[Heiða B. Heiðars, 4.6.2007 kl. 15:15]

Arg! Skil nákvæmlega hvað þú meinar! Þoli ekki þegar fólk er svona yfirmáta yndislegt.. virkar bara slepjulega á mig. Svo má maður barasta "segja allt gott" ef það er það sem maður vill segja. Ef fólk vill fá að heyra eitthvað annað verður það bara að vera tilbúið að sitja undir því þegar ég segi því hvaða álit ég hef raunverulega á því

[Ingibjörg Gunnarsdóttir, 4.6.2007 kl. 15:24]

Mundu bara að fara vel með þig - þú átt það skilið!

[Saumakonan, 4.6.2007 kl. 15:27]

Prófaðu Capilli... bláu húsunum í skeifunni.   Þær eru snillingar!!  Eini staðurinn sem ég læt klippa mig á jafnvel þótt ég þurfi að bíða heillengi eftir suðurferð!   Að vísu er ég hliðholl þar sem elskuleg systir mín klippir þar en mmmmmm nuddið maðuuuuuur!!!!   Oftar en einu sinni verið að því komin að dotta í stólnum

[Guðríður Hrefna Haraldsdóttir, 4.6.2007 kl. 15:27]

Hhahahahahaha! 

[Guðríður Hrefna Haraldsdóttir, 4.6.2007 kl. 15:28]

Var ekki að hlæja að þér, saumakona. Prófa Capilli næst, er bara búin að panta á Skaganum í fyrramálið hjá einni sem er víst ansi góð. 

[Saumakonan, 4.6.2007 kl. 15:30]

hehehe ein að draga í land     btw... "hin hliðin" á mér er orðin aktív aftur

[Kristín M. Jóhannsdóttir, 4.6.2007 kl. 17:12]

Ég fór einu sinni í klippingu til íranskrar konu. Þetta var seint að degi og enginn annar kúnni á staðnum, en maðurinn hennar var þarna. Einhvern veginn fór spjallið yfir í óvæntar áttir, svo sem framhjáhöld. Mér varð fljótt ljóst á því að hlusta á þessi tvö tala að karlinn hélt fram hjá konunni í gríð og erg og kerlingunni fannst ekkert varið í það. Hann gaf nefnilega skýrlega í skyn að karlmenn þurfi meira kynlíf og því ættu þeir að eiga rétt á því að leita út fyrir hjónabandið, og kerlingin virðist vera þeirrar skoðunar að hún væri bara ánægð með að losna við að hafa hann á eftir sér allan tímann. Ég þoli ýmislegt enda vann ég í Slippnum á Akureyri í mörg ár, en mér varð nokkuð misboðið þarna og fór aldrei aftur þarna í klippingu, þótt það tæki mig aðeins tvær mínútur að labba á stofuna heiman frá mér.

[Guðríður Hrefna Haraldsdóttir, 4.6.2007 kl. 17:26]

Yfirleitt er bara virkilega gaman að spjalla við hárgreiðslufólkið sitt en við höfum greinilega ekki lent á því allra besta ... heheheh!

[Katrín Snæhólm Baldursdóttir, 4.6.2007 kl. 18:31]

Æ ég fæ illt í magann og hnút í sólarplexus að hugsa um hárgreiðslufanta. Rifjast upp fyrir mér mínútur þar sem ég hefi getað breyst i kaldrifjaðan hálfklipptan morðingja...en sem betur fer hef ég einstaka sinnum hitt á öðlingsfólk sem sinnir klippistörfunum...en alltof sjaldan. Það er eins og ég tali sjaldgæfa útlensku þegar ég reyni  að útskýra hvernig hárið á mér á að vera...Það skilur mig enginn!!! Hvar er næsti bar??

[Laufey Ólafsdóttir, 5.6.2007 kl. 02:35]

Sleðaferðir, sundferðir og gönguferðir!!! Oj bara . Ég er hardcore antisportisti og mæli frekar með sófalegu, ískápsferð og langri baðmeðferð, helst í ilmolíu og með nuddi .

[gua, 5.6.2007 kl. 10:42]

Mér finnst andlitsbað og slökunarnudd vera dekur ummmmm