Fínasta bæjarferð

Klippingin gekk vonum framar. Ég varð svolítið óttaslegin þegar hárgrisslukonan setti djúpan disk á kollinn á mér og mundaði garðklippurnar en ekkert var að óttast, hún kunni sitt fag.

Við eigum litunarstefnumót næsta mánudag. Ef ég er ómótstæðilega núna þá veit ég ekki hvað gerist eftir mánudaginn ... það leið yfir nokkra menn í Reykjavík í dag!

Strætó kom stundvíslega og við brunuðum í Mosó. Biðin eftir leið 15 var ekki mjög löng en samferðakona mín tjáði mér í biðskýlinu að Skagastrætó hefði lagt af stað á nýja tímanum, 15.45, í gær með hálftóman vagn. Svo kom leið 15 úr bænum með helling af fólki en greip í tómt. Skagabílstjórinn gerði sér lítið fyrir og sneri við, enda ekki kominn langt. Þetta á allt eftir að venjast.

Ég veit núna að nýja tímaáætlunin var búin til utan mig og virðuleika minn. Nú er manndrápsbrekkan úr sögunni, enda engin leið 18 í Stórhöfða sem ég þarf að hlaupa til að ná. Ég get gengið settlega út úr vagninum við Ártún, tölt niður milljóntröppurnar, undir brúna og enn hægar upp lúmsku brekkuna. Dásamleg tilfinning.

Leið 18 kom nokkrum mínútum síðar og óvissuferð hófst þegar vagninn beygði til hægri áleiðis að Árbæ í stað þess að fara niður Höfðabakkann eins og hann hefur hingað til gert. Ég hélt ró minni, enda ekki á hraðferð. Með í för var hópur krúttlegra yngri borgara sem lagði undir sig aftari helming vagnsins. Strætó beygði svo niður í Hálsana og sjúkkitt, ég komst í vinnuna. Átti ekki merkilegt erindi þangað en ákvað að fá mér lærisneiðar að borða í mötuneytinu, hef ekki smakkað þær í mörg ár. Smá vonbrigði, soldið seigar.

Aðalerindið til Reykjavíkur var að heimsækja konu í Grafarholtinu og konan sú á hreint dásamlegan hund sem heitir Rúfus. Við Rúfus hétum hvort öðru ævarandi ást. Konan skutlaði mér svo í Mosó þar sem alltumfaðmandi strætóbílstjórinn sá um að koma mér heim.

Nú þarf ég að hringja í Einarsbúð, kattamaturinn er búinn og kettirnir fáránlega fleðulegir við mig. Svangir.

Athugasemdir

[Saumakonan, 5.6.2007 kl. 18:55]

vertu fegin að það var ekki súpuskál... hefðir getað fest þig á eyrunum eins og Emil í Kattholti!!!

[Pétur Þór Jónsson, 5.6.2007 kl. 19:06]

Tek undir fyrri athugasemd, bíðum spennt eftir nýrri mynd af þér þó svo að þessi sé góð.

[Eva Þorsteinsdóttir, 5.6.2007 kl. 19:15]

Góða skemmtun í lituninni, búin að lita mig..... sjálf ;)

[Doddi - Þorsteinn G. Jónsson (IP-tala skráð) 5.6.2007 kl. 20:24]

Þú ert falleg fyrir og eftir klippingu, sæta dúlla,  enda alltaf falleg. En ég tek undir óskir annarra, að þú birtir nú mynd af þér eftir hárgreissssluna og litunina. Mér líður dálítið eins og dömunum sem voru á tónleikum með Bítlunum í gamla daga: ég er svo spenntur!!!

[Kristín Katla Árnadóttir, 5.6.2007 kl. 20:28]

Já endilega Gurri að senda mynd af þér plís.

[Jenný Anna Baldursdóttir, 5.6.2007 kl. 22:23]

Já er ekki kominn tími á að fara að fjærlægja fermingarmyndina úr blogginu?

[Guðríður Hrefna Haraldsdóttir, 5.6.2007 kl. 22:32]

Myndin er nokkurra ára og jú, ef þú trúir því, kæra Jenný, að ég sé tiltölulega nýfermd þá er þetta fermingarmynd af mér.

[Brynja Hjaltadóttir, 5.6.2007 kl. 22:57]

Flottur tréhestur!

[Svava S. Steinars, 5.6.2007 kl. 23:49]

Ætlar þú kannski að taka við af mér sem ljóshærð ? Spennan eykst

[Guðríður Hrefna Haraldsdóttir, 6.6.2007 kl. 00:04]

Hehhehe, þið eruð skepnur, elskurnar.

[Adda bloggar, 6.6.2007 kl. 01:35]

nýjar fréttir af okkurbestu kv til þín! adda

[Jenný Anna Baldursdóttir, 6.6.2007 kl. 09:58]

Þú ert ótrúlega barnsleg og saklaus í andliti kona (hlýtur að vera genetiskt "vandamál".  Þegar maður hins vegar þekkir blóðuga slóð þína á lífsleiðinni renna á mann tvær grímur Frú Dorian Grey

[Guðríður Hrefna Haraldsdóttir, 6.6.2007 kl. 15:26]

Ég á rosaskrýtið málverk uppi á lofti hjá mér, Jenný ... . Þetta dásamlega unglega útlit mitt tengist líklega því að ég nota Ariel þvottaefni og ferðast með almenningsfarartæki til og frá vinnu. Viðurkenni alveg að ég myndi missa alla bloggvini mína í hvelli ef ég setti debetkortsmyndina mína í staðinn, þó er hún eldri. 

Anna þó, ég myndi aldrei giftast hundi. Sambúð kæmi þó til greina þar sem Rúfusi er víst afar vel við ketti. Gráhærðir menn eru sjarmerandi og ekki eru gráhærðir hundar síðri.