Svefnlækningar og dramatík

Allt afskaplega rólegt að frétta úr himnaríki. Hálsbólga og slappleiki herjaði á 1/3 heimilismanna sem sváfu þennan óskapnað úr sér í dag milli símtala. Hinir tveir möluðu bara sáttir og tóku heilmikinn þátt í svefnlækningunni.
Síminn í bakaríinu er kominn í lag og stór terta, eins og sú sem ég pantaði í morgun, hefur hækkað um 1.500 krónur síðan í fyrra. Samt er hún ódýrari en víða annars staðar.
Ég er heilmikið að hugsa um að láta veisluna hefjast kl. 15, klukkutíma fyrr en venjulega. Þar sem þetta er opið hús getur fólk vissulega mætt þegar það vill eftir opnun. Síðustu árin finnst mér flestir vilja koma snemma og það er frekar rólegt á kvöldin.

Sá boldið í morgun og það er allt við það sama, svona nokkurn veginn. Nick grátbiður Brooke endalaust um að láta vaða, hætta með Eric og hefja nýtt líf með honum. Bridget fór í sónar og sá ítalski (bjargvættur Taylor) bankaði upp á og var hjá henni á meðan. Bridget vill ekki Nick en hugsar samt stundum til hans. Stefanía segir Eric, fyrrverandi sínum, að hún viti nú að allar eignabreytingar sem gerðar hafi verið á Forrester-tískuhúsinu séu ólöglegar og að hún eigi það ein. Hún segir honum að hún sé nú nýr framkvæmdastjóri og sýnir honum það í verki með því að fleygja nýrri brúðkaupsljósmynd af Brooke og Eric niður af skrifborði Brooke.  Drama!

Athugasemdir

[Jenný Anna Baldursdóttir, 8.8.2007 kl. 17:07]

Sendi þér meil á vinnuadressuna, hélt þú værir í vinnu.  Batakveðjur.

[Ólöf Anna , 8.8.2007 kl. 17:19]

Heyrru ættla kaupa mér bækur fyrir ferðalagið mitt á morgun. Mæliru með einhverri (ekki H.Potter) hef ekki farið inn í bókabúð svo lengi.

[Elín Arnar, 8.8.2007 kl. 17:36]

Láttu þér batna Gurrí mín!  Gat verið að flensa herjaði í fríinu.

[Guðríður Hrefna Haraldsdóttir, 8.8.2007 kl. 18:06]

Já, Ólöf, ég mæli sko með Móðurlaus í Brooklyn. Hún er bæði spennandi og rosalega vel skrifuð. Svo eru auðvitað sögurnar okkar Steingerðar algjört æði ... hún heitir 50 sannar, íslenskar lífsreynslusögur. Sögur sem við skrifuðum fyrir Vikuna fyrir nokkrum árum, ekki skáldsögur reyndar, skráðum frásagnir fólks og ég tók saman í bók. Kannski leynast góðar hugmyndir fyrir þig þar.  

Sjáumst hressar á morgun, Elín! Er sko öll að koma til. 

[Heiða B. Heiðars, 8.8.2007 kl. 19:27]

Úps! Aldrei verið góð í tímasetningum sko..... :)

[Hrönn Sigurðardóttir, 8.8.2007 kl. 20:10]

Ó - ég hélt að Móðurlaus í Brooklyn væri partur af boldinu.....

....ætla einmitt í bóksafnið á morgun, bezt ég kíki eftir þessari

Hvar í Reykjavík get ég keypt bókina þína? Er jafnvel að spá í að leggja land undir fót á laugardag og langar að svipast um eftir bókinni.......

Láttu þér batna ljúfust

[Guðríður Hrefna Haraldsdóttir, 8.8.2007 kl. 20:18]

Lífsreynslusögubókin fæst í Pennanum Eymundson og kostar eitthvað um 1.500 kall, virði hverrar krónu!

[Ásdís H (IP-tala skráð) 8.8.2007 kl. 23:12]

Kærar þakkir fyrir upplýsingar um Boldið. Gaman að frétta af gömlum kunningjum öðru hvoru, þótt það sé alltaf það sama að gerast hjá þeim, ár eftir ár . Upplífgandi að fylgjast með skrifunum þínum. Hvaða sumarbúðir ert þú að tala um? Bara forvitni.

[Guðríður Hrefna Haraldsdóttir, 8.8.2007 kl. 23:32]

Sumarbúðirnar heita Ævintýraland og að mínu mati eru þær í algjörum sérflokki, þar er t.d. fullorðið starfsfólk (ekki unglingar eða sjálfboðaliðar), metnaðarfull námskeið í leiklist, myndlist, kvikmyndagerð ofl. sem krakkarnir elska. Sorrí, ég missi mig alltaf þegar ég byrja að tala um sumarbúðirnar, ég er svo hreykin af Hildu systur fyrir að reka þær svona flott! Vest að samkeppnisaðilarnir geta fest sig svo vel í sessi með milljónastyrkjum á ári hverju ... sérhannaðar úthlutunarreglur fyrir þá, eins og t.d. sú að borgin styrkir bara þá sem eru með vetrarstarf líka ... eins og vetrarstarf geri sumarstarf þeirra eitthvað betra? Hinir eru eflaust með ágætisstarfsemi en óréttlætið er geigvænlegt og til skammar fyrir þá sem úthluta styrkjum. Annað hvort að styrkja alla eða engan, ekki skekkja samkeppnisstöðuna svona. 

[Ásdís H (IP-tala skráð) 9.8.2007 kl. 11:49]

Stelpan mín var tvisvar í Ævintýralandi, fyrst á Reykjum í Hrútafirði og svo á Hvanneyri og ég veit að þetta eru frábærar sumarbúðir. Vonandi komist þið á kortið hjá styrkveitendum ... og það strax!