Strætóhöfnun, krúttlegir kettir og föstudagsbrandari

14.9.2007 | 10:46

Strætóhöfnun, krúttlegir kettir og föstudagsbrandari

Held að ég sé búin að gleyma því hvernig á að ferðast með strætó ... ég var komin út á stoppistöð þegar Ásta drossíukerling hringdi. Strætó kom þegar ég tók á móti sms-inu þannig að ég sá bara sáran vonbrigðasvipinn á bílstjóranum þegar ég hafnaði honum. Í sárabætur gaf ég honum séðogheyrtið mitt síðan í gær og þá hýrnaði aðeins yfir kauða.

Jóhannes almáttugur, fyrrum tæknimaður minn á Aðalstöðinni, nú tæknitröll á Sýn, eineggja tvíburi, eiginmaður, faðir og ljúfmenni, þarf að losna við kettlinga. Hann á fjóra ketti og vill gefa tvo af þeim. Held að móðirin sé líka orðin ansi þreytt og afkvæmin farin að þrá heimili til að geta búið til kósí, malandi anda. Ég plataði Jóhannes til að senda mér myndir af sætu dýrunum sínum til að birta á blogginu og ef einhvern góðhjartaðan bloggvin (dýravin) langar í kettling þá skal ég koma skilaboðum til Jóhannesar. Hann býr úti á Seltjarnarnesi en er samt ágætur.

Svarti kisi er högni en hinn er læða. Þau eru orðin fimm mánaða, miklu skemmtilegri og meðfærilegri dýr en 2 mánaða kettlingar ... mikill leikur í þeim en samt komið vit í þá. Ég hef harðneitað að taka yngri en 3 mánaða og hef verið með dásamleg dýr. Tommi er eldgamall en samt er heilmikill leikur í honum, hann þýtur stundum eins og eldibrandur um allt himnaríki.

Læt dagsanna sögu af Skaganum fylgja með í tilefni föstudags. Hún kennir manni að nágrannar manns geta leynt á sér:

Dómarinn bað ákærða um að rísa á fætur. „Þú ert ákærður fyrir að myrða kennara með keðjusög.“ sagði hann.

„Lygamörður,“ heyrðist í manni á áhorfendabekkjunum.

„Þögn í réttarsalnum,“ sagði dómarinn og hélt áfram: „Þú ert einnig sakaður um að hafa myrt skokkara með skóflu!“

„Fjandans nirfill og nískupúki,“ kallaði sami maður aftur.

„Ég sagði ÞÖGN,“ æpti dómarinn og sneri sér að hinum ákærða: „Svo ertu ákærður fyrir að drepa stöðumælavörð með vélsög!“

„Svikahrappur og aumingi,“ heyrðist frá sama manninum og áður.

Dómarinn byrsti sig og sagði: „Ef þú segir mér ekki ástæðuna fyrir þessum frammiköllum þínum þá læt ég setja þig í fangelsi fyrir óvirðingu við réttinn!“

„Ég hef sko búið við hliðina á ákærða í tíu ár og hann hefur aldrei getað lánað mér verkfæri þegar ég hef beðið hann um það og ekki þóst eiga!““

Meginflokkur: Bloggar | Aukaflokkar: Ferðalög, Lífstíll, Vinir og fjölskylda | Facebook

Athugasemdir

"Nirfill sjálfur. Verkfæraleiga Húsó á Akranesi hefur þetta allt" - sagði dómarinn.

Glúmur Gylfason (IP-tala skráð) 14.9.2007 kl. 11:41

Kisi minn er svona kolsvartur. Eðalköttur alveg, en hann vill ekki deila heimilsfólki með öðrum köttum, svo ég get ekki boðið kettlingunum að eiga mig og mína.

krossgata, 14.9.2007 kl. 12:03

Hahaha, þetta með Séðogheyrt lesandi strætóbílstjórann slær allt út. Ég sé ekki fyrir mér strætómann með slúðurblað. Ég dey, OMG

Jenný Anna Baldursdóttir, 14.9.2007 kl. 12:03

ég get svo svarið það að ég skil ekki brandarann. Enda ljóska inn við beinið

Jóna Á. Gísladóttir, 14.9.2007 kl. 13:17

Jóna, nágranninn missti af aðalatriðinu ... hann sá bara nískupúkann, nágranna sinn, sem tímdi ekki að lána honum "morðtólin", ekki fjöldamorðingjann ... jamm, ókei, ég hef skrýtinn húmor! Bílstjórarnir eiga nokkrar pásur yfir daginn og þá er gott að fletta slúðrinu, Jenný mín ...

Guðríður Hrefna Haraldsdóttir, 14.9.2007 kl. 13:26

Frábær haustpistillinn þinn í síðustu Viku. Eiginlega meira en frábær. Vissurðu að þú ert í draumastarfinu mínu?

Heiða Þórðar, 14.9.2007 kl. 13:44

Ó, takk, elskan ... mig dreymdi líka um svona þegar ég var yngri, jafnvel barn að aldri, og las gömlu bækurnar hennar mömmu, t.d. Beverly Gray ... mig langaði til að verða svona fréttaritari eins og Beverly!!!

Guðríður Hrefna Haraldsdóttir, 14.9.2007 kl. 14:43

Þegar ég var lítil ætlaði ég að verða rithöfundur eða dýralæknir. Ég skrifaði tvo kafla í æsispennandi glæpasögu, sem ég hef fyrir löngu týnt (heimurinn hefur misst af miklu tímamótaverki í glæpasagnaritun) og hjólaði um fjöll og firnindi að leita að vængbrotnum fuglum að bjarga. Ég varð svo hvorki rithöfundur né dýralæknir.

krossgata, 14.9.2007 kl. 15:16