Af kaffimáli, alþingissamferðamanni og norskum veðurvef

Mikið er gott að helgin er loksins komin. Þusti með leigubíl í Mosó undir hálfsjö og náði síðustu síðdegisferðinni. Þar var fyrir nýr bílstjóri, ósköp indæll eins og allir hinir. Farþegarnir voru heldur ekki af verri endanum; gaur af sætukarlastoppistöðinni (sem aukabíllinn stelur í heild sinni frá mér í morgunferðinni) og svo Gutti, þingmaðurinn okkar. Við ræddum gáfulega saman á leiðinni, m.a. um verndun svæðislýsinga smárása í hálfleiðurum og fleiri kúl frumvörp. Gutti hefur verið í „alþingismannafríi“, þeyst um kjördæmi landsins og setið ýmsa nefndarfundi. Nóg að gera þótt þingið sé í fríi. Hann kenndi mér þegar ég var í 12 ára bekk hérna á Skaganum og þótti okkur bekkjarsystkinunum rosalega gaman að fá tilbreytinguna en hérna í eldgamla daga sátum við uppi með sama kennarann svo árum skipti og hann kenndi ALLT nema leikfimi og sund. Við vorum reyndar heppin með Rögnvald, hann var frábær. Mig minnir að við höfum verið afar góður bekkur og ekkert kvalið kennaranemann Gutta neitt svakalega mikið, eiginlega bara ekkert. Þá hefði hann líka ekki yrt á mig í strætó.

Mamma hringdi í mig í gær og sagði mér að hún hefði prófað að setja fyrst kaffið í bollann sinn og síðan mjúlkurskvettuna ... og það væri svo miklu betra. Ef hún hefur byrjað að drekka kaffi á unglingsaldri, eins og ég, þá hefur hún drukkið það á rangan hátt, eða sett mjólkina fyrst, í heil 60 ár! Það er heilmikill bragðmunur!

Veðuráhugafólk athugið. Hér er spennandi veðurvefur: www.yr.no og loks hægt að sjá veðurhorfurnar nákvæmlega á hverjum stað fyrir sig. Ég skellti inn orðinu "Akranes" og fékk staðfestingu á að hér verður mikil veðurblíða að vanda á næstunni. Munið bara að skrolla svolítið niður síðuna. 

Athugasemdir

[krossgata, 14.9.2007 kl. 20:52]

Frábært skref hjá mömmu þinni, en sagði hún þér af hverju hún hefði alltaf gert þetta á hinn háttinn?

[Guðríður Hrefna Haraldsdóttir, 14.9.2007 kl. 20:59]

Bara ávani hjá henni, held ég.

[Glúmur Gylfason (IP-tala skráð) 14.9.2007 kl. 21:03]

Brýtur hún eggið upp á mjóa endanum?

[Anna Ólafsdóttir (anno) (IP-tala skráð) 14.9.2007 kl. 21:12]

Mér finnst þetta með hana mömmu þína og kaffið alveg yndislegt. Það er örugglega grundvallarmunur á bragðinu

[Guðrún Jóhannesdóttir, 14.9.2007 kl. 22:12]

maður verður að fara að drekka kaffi með mjólk til að komast að þessu :) drekk sjálf alltaf svart, nema ef ég fæ rjóma í kaffið og þá... ja þá drekk ég rjóma með kaffilögg út í hehehehe

Eins gott að það gerist ekki nema á stórhátíðum og tyllidögum 

[Jenný Anna Baldursdóttir, 14.9.2007 kl. 22:37]

Er kaffiblind, þannig að ég skil ekki málið.  Hm... er að hugsa.

Gurrí vefur um veður! OMG

Who the f..k is Gutti?

[Guðríður Hrefna Haraldsdóttir, 14.9.2007 kl. 22:48]

Úps, hann heitir Guðbjartur Hannesson og situr á þingi fyrir Samfylkinguna ...

Þegar maður býr við hliðina á veðrinu vill maður eitthvað vita um það ... á að loka gluggum í nótt, kaupa álteppi, dósamat og vatnsbirgðir? Og slíkt.

Held að mamma sé orðin fullkomin eftir að hún vandi sig af þessum mjólkinfyrstósið, Glúmur.