Eðalkonur allt í kring og fossandi táralækir

Samstarfskona mín hér á Vikunni, Hrund almáttugur, fékk í gær Íslensku barnabókaverðlaunin. Mikið er ég montin af henni. Finnst líklegt að ég fái bókina hennar í dag og hlakka mikið til að lesa hana. Þær eru margar góðar sem hafa fengið verðlaunin í gegnum árin, og er Benjamín dúfa í sérstöku uppáhaldi. Erfðaprinsinn náði Benjamín af mér strax seinnipart útkomudags og þar sem hann er fljótur að lesa eins og mammasín þá var bókin laus strax eftir sjónvarpsfréttir. Drengurinn sagði karlmannlega þegar hann rétti mér hana: „Ekkert skrýtið þótt þessi bók hafi hlotið verðlaunin!“ og ekki sá ég blika tár á hvarmi. Drengurinn fékk líka afar hörkulegt uppeldi ... en ég held þó að hann hljóti að hafa farið inn á bað til að skæla því að klukkutíma seinna flaut sjálfur naglinn, móðir hans, út úr sófanum í fossandi táralæk og hér er sko ekki verið að tala um neina sprænu. Svo má alveg segja að ég sé föðursystir Benjamíns dúfu þar sem Gummi bróðir lék pabba hans í samnefndri kvikmynd. Strákurinn sem lék Benjamín er líka ansi líkur Eyjó Braga, eldri syni Gumma.

Ásta, ljónshjartað mitt hreina, er nú meira krúttið. Það fer að komast upp í vana að hún bjargi mér. Ég vaknaði nokkrum mínútum EFTIR að strætó hirti upp samfarþega mína á stoppistöðinni við Garðabraut. Af því að ég nenni ekki að vera spæld á morgnana og hef hvort eð er engan til að urra á, ákvað ég að breyta þessu í kósímorgun himnaríkis. Sveif um, kveikti á kaffikönnunni, horfði á öldur út um gluggann, dáðist að mér í spegli, gaf kisunum og margt fleira, allt nema kíkja á gemsann minn. Var jafnvel að hugsa um að blogga pínupons áður en ég tæki strætóinn kl. 7.41 síðdegis ... en þá hringdi síminn. „Jæja, ertu ekki að koma?“ Það sem ég vissi ekki var að fyrr um morguninn, þegar ég lá enn í kóma, hafði Ásta sent SMS um að hún væri á bíl ... Ég ákvað að vera fórnfús af því að ég var ekki tilbúin og sagði henni bara að drífa sig, ég tæki næsta strætó. Ásta mátti ekki heyra á það minnst ... Tommi og Kubbur tvístruðust því í allar áttir þegar ég þaut um himnaríki til að ljúka við morgunundirbúninginn sem tókst á einni mínútu sléttri. Mundi meira að segja eftir því að slökkva á kaffikönnunni sem var ekkert notuð í morgun. 

P.s. Skellti inn kvöldsólarmynd sem ég tók fyrr í vikunni. Nú get ég kíkt á bloggið mitt ef ég sakna himnaríkis ógurlega í dag. Sementsverksmiðjustompurinn er að verða mér eins og t.d. Eiffelturninn Parísarbúum og Nálin þeim í Seattle ...

Athugasemdir

[Ágústa Kolbrún Jónsdóttir, 20.9.2007 kl. 09:20]

yndislegur morgunn hjá þér

[Jenný Anna Baldursdóttir, 20.9.2007 kl. 09:42]

Vó hvað líf þitt er spennuhlaðið.  Kveðjur og knús.

[Hrund (IP-tala skráð) 20.9.2007 kl. 10:26]

Takk mín kæra. Ég get nú ekki verið annað en ánægð með þetta nýja millinafn mitt

[Guðríður Hrefna Haraldsdóttir, 20.9.2007 kl. 10:54]

Ég var að prófa að breyta einhverju í stjórnborðinu hjá mér og skilst að nú sé auðveldara fyrir óinnvígða að kommenta. Vonandi er það rétt, fáránlega erfitt annars. Hvaða útlagi er til í að prófa nýja kerfið og segja mér hvort þetta gangi?

[Kristín Katla Árnadóttir, 20.9.2007 kl. 11:24]

Gaman til hamingju Hrund.

[Jóhanna Hafliðadóttir (IP-tala skráð) 20.9.2007 kl. 11:40]

Ég skal prufa - langar líka til að vita hvort mér verður boðið upp á rabbabarapæ ef ég prufa Skagastrætóinn :-)

[Jóhanna Hafliðadóttir (IP-tala skráð) 20.9.2007 kl. 11:41]

Alveg ertu tölvusnillingur Gurrí

[Guðríður Hrefna Haraldsdóttir, 20.9.2007 kl. 12:06]

Mig langar að mæta, þarf að sjá hvort ég geti frestað ákveðnu sem til stendur ... veit af þessu!

[Ásdís Sigurðardóttir, 20.9.2007 kl. 13:30]

Til lukku með vinkonu þína. Það hefur verið góður morgunn hjá þér, alltaf soldið kósí að sofa yfir sig.  Maður sér eiffel turninn þinn úr borginni, enginn smá turn :):)

[Glúmur Gylfason (IP-tala skráð) 20.9.2007 kl. 14:50]

Átti kvöldsólar-stromp-myndin ekki að fylgja næsta bloggi á undan? Viðreynslublogginu???!!!

[Rannveig Lena Gísladóttir, 20.9.2007 kl. 15:23]

Skilaðu hamingjuóskum frá mér til samstarfskonunnar   Ég var svo lánsöm að hitta hana í sumar og hafði bara gaman af...  aldrei að vita nema að ég spjalli við ykkur aftur ( ef áhugi er fyrir hendi ) 

[Jóna Á. Gísladóttir, 20.9.2007 kl. 15:52]

Til hamingju með vinkonu þína og samstarfskonu.

kl. 7:41 síðdegis hehehe. Reyndar var ég á þeim tíma að koma úr sturtu eftir lóðatíma hjá JSB svo það var kind of síðdegis.

[Hrund (IP-tala skráð) 20.9.2007 kl. 15:54]

Skila bara sjálf kveðju til baka Rannveig Lena; ég hafði sömuleiðis gaman af

[Anna Ólafsdóttir (anno) (IP-tala skráð) 20.9.2007 kl. 20:43]

Já, deffinetly Effelturninn - múhahahaha!

Það er ljóst að ef maður veltir einhvern tímann fyrir sér að flytja suður aftur verður það örrgla frekar til Parísar (ég meina Akraness)  en Reykjavíkur. Það er greinilega allt að gerast þar