... og það var fjör

21.9.2007 | 08:07

... í strætó í morgun. Tommi var glaðvakandi, glaður og glaðbeittur. Ég hlammaði mér við hliðina á smiðnum (konunni sko) og gerði ítrekaða tilraun til að myrða hana þegar ég setti á mig öryggisbeltið. Þ.e.a.s. ég losaði alltaf beltið hennar. Eins og allir vita eru smiðir með geðbetra fólki þannig að hún flissaði bara og festi sig aftur. Aukabíllinn, sem er alltaf aðeins og undan okkur, var búinn að hirða upp allt hirðanlegt á leiðinni, og þá er ég ekki að tala um rusl, því að aðeins einn, örlítið seinn karl, var á sætukarlastoppistöðinni og engin Karítas í Lopabrekkunni í Mosó.

Las Loforðið að mestu í gærkvöldi, þrátt fyrir allt of skemmtilegt sjónvarp, og er ekkert smá hrifin af henni. Ætlaði að ljúka við hana í strætó í morgun en við blöðruðum svo mikið að það tókst ekki alveg og munar bara nokkrum blaðsíðum. Rosalega er ég nú annars mikill snillingur í leikrænni þjáningu. Það kom hrikalega sorglegt atriði í bókinni og tárin byrjuðu að lauma sér Í STRÆTÓ!!! Ég teygði aðeins úr mér og tókst með lymsku og ljóshraða að þurrka augun, eins og ég væri bara sybbin eða eitthvað. Það tókst því að smiðurinn reyndi ekkert að hugga mig og Tommi dró ekki úr hraðanum, fullur af sjokki. Maður grenjar sko ekki í svona stuðvagni!

Meginflokkur: Bloggar | Aukaflokkar: Bækur, Ferðalög, Vinir og fjölskylda | Facebook

Athugasemdir

Hæ gurrí! Vildi bara þakka fyrir rabbarbarapæið, það vakti stormandi lukku þó aðallega 100g+ af suðusúkkulaðinu. Skemtilegt blogg hjá þér.

Bkv. Hilmar

Hilmar Sigurðsson (IP-tala skráð) 21.9.2007 kl. 11:42

Heheheh, bíddu þá eftir uppskriftinni að eplapæinu sem kemur í kökublaði Vikunnar í nóvember. Þar eru 200 g af rjómasúkkulaði ... algjört sælgæti. Gott að rabarbarapæið vakti lukku ... best að hafa samband við Huldu og sníkja matarboð!!!

Guðríður Hrefna Haraldsdóttir, 21.9.2007 kl. 11:50