Ófærð, heimsóknir, kynþokki og fótbolti

Margir sunnudagar líða án þess að ég tali við nokkurn nema kettina og Jónas ryksuguróbót. Þessi sunnudagur hefur verið öðruvísi. Ellý kíkti og þegar hún var nýfarin komu Mía systir og Eva, dóttir hennar. Það var eins og við manninn mælt, kettirnir skiptu liði og komu sér vel fyrir í fangi þeirra. Það mætti halda að Kubbi og Tomma væri aldrei klappað heima hjá sér. Þar sem ég píndi mig til að læra á frussudæmið í kaffivélinni gat ég gefið Evu latte og Míu cappuccino sem þær voru mjög ánægðar með. Eva dáðist mikið að Jónasi og segir slíka vél vera jafnnauðsynlega og uppþvottavél.

Jæja, það kom rok en engin rigning enn þótt norska veðursíðan haldi því fram. Sé á mælinum hjá Vegagerðinni að hviður eru komnar upp í 40 m/sek á Kjalarnesi. Það þýðir að það er ófært fyrir strætó! Mía er á leiðinni núna til Stykkishólms með Evu, vona að ferðin gangi vel. 

Ég hef ekkert á móti FH, síður en svo, en mig langar samt svo til þess að Valsmenn sigri í dag. Hér á hlaðinu stendur yfir leikur ÍA og Víkings og miðað við öskrin er mikið fjör. Er með fyrrnefnda leikinn í gangi á Sýn, enda áskrifandi til mánaðamóta, og hinn sést út um eldhúsglugga himnaríkis. Finn ekki litla Rúmfatalagerskíkinn minn til að kíkja á markatöluna, mbl.is segir að staðan sé 1:0, okkur í vil. Breskur áhugamaður um íslenska knattspyrnu, með sérlegan áhuga á ÍA, er á leiknum núna. Við Sigþór mágur komumst að þeirri niðurstöðu í fyrradag að það yrði að redda honum fari á Skagann sem var gert. Strætó er frekar fjandsamlegur farþegum sínum á sunnudögum sem þurfa að bíða í minnst hálftíma í Mosó áður en Skagavagninn kemur. Maðurinn hefði líka þurft að taka strætó í hádeginu vegna langrar síestu vagnstjóranna. Þetta bara kennir mér að vera ekki að þvælast í bæinn um helgar. Var samt spennt fyrir að fara og kveðja Kela á Kringlukránni en bæði veðrið, strætó og gestakomurnar drógu úr mér. Er með þeim í anda.

Úhú, KR-ingar voru að skora glæsilegt mark. Frábært! Eftir að hafa fæðst í Vesturbænum og búið þar síðar í aldarfjórðung eiga KR-ingar alltaf pláss í hjarta mínu þótt uppvaxtarárin á Skaganum hafi mótað mann í sambandi við uppáhaldsliðið ... Ef þetta verða úrslitin gætu þeir haldist í úrvalsdeild.

Alltaf er sama fjörið í bloggheimum. Ég nenni ekki einu sinni að hafa almennilega skoðun á nýja kynþáttahatarablogginu, heldur bara flissaði þegar ég sá það. Get ekki tekið svona bull alvarlega. „Sko af því að við erum svona á litinn þá erum við betri sko.“ Bara hlægilegt. Samt finnst mér kynþáttahatur ekkert fyndið. Kynþokkahatursbloggsíða myndi miklu frekar ná að æsa mig upp.

Athugasemdir

[Guðrún Jóhannesdóttir, 23.9.2007 kl. 20:35]

Alveg sammála þér með þetta kynþáttahatursblogg, bara til að hlægja að, hef ekki trú að að þarna leynist "sannur" kynþáttahatari, er ekki bara verið að lokka okkur í æsing, mér sýnist það. vona að þeim mæðgum hafi gengið vel í Hólminn, það getur blásið í þessari átt þarna á nesinu. 

[Jenný Anna Baldursdóttir, 23.9.2007 kl. 20:55]

No comment.

[Þröstur Unnar, 23.9.2007 kl. 21:25]

Auddað unnum við.

Var ekki Ellý að kaupa sér hús?

[Guðríður Hrefna Haraldsdóttir, 23.9.2007 kl. 21:37]

Jú, Ellý keypti hús á Kirkjubrautinni og er búin að strípa það að innan. Hlakka til að sjá hvernig henni tekst að gera það upp! Hún er snilli. Og auðvitað unnum við ... og líka Valur.

Hef reyndar ekki haft lyst á því að lesa kynþáttahatursbloggið en mér skilst á Jennýju að þetta sé enginn Hrólfur, Bolur eða Svampur að gera grín. Ætla bara að láta eins og það sé ekki til.  

[Þröstur Unnar, 23.9.2007 kl. 21:53]

Þetta er svo skrítið með hana Ellý. Ég er alltaf að "hitta" hana í VEÓ en hún heilsar mér aldrei.

Heldurru að það geti verið af því að hún veit ekki hver ég er? Rosalega besti bloggvinur Gurríar Harr?

[Guðríður Hrefna Haraldsdóttir, 23.9.2007 kl. 22:09]

Þröstur minn, ég skal hundskamma hana Ellýju fyrir þetta! Annað og ekki síður mikilvægara; höfum við hist í Einarsbúð? Ef við hittumst í Einarsbúð heldurðu að þú munir þekkja mig og kannski heilsa mér? 

[Þröstur Unnar, 23.9.2007 kl. 22:23]

Að sjálfsögðu mundi ég heilsa frúnni, en er viss um að hafa ekki hitt hana í VEÓ. Sá hana einu sinni strunsa framhja vinnustaðnum mínum.

Hef samt talað við Ellý, hún virkar á mig sem hin viðkunnulegasta manneskja.

[Jens Guð, 24.9.2007 kl. 02:20]

  Ég á eftir að tékka á þessari rasistasíðu.  Sjálfur er ég svo mikill anti-rasisti að ég verð að kynna mér síðu þessa vesalings.